عملت حادثة باللانسر.... (مخنوووووق جدا جدا)العربية عاملة 1200 كيلو بس

امبارح راجع من خروجة لذيذة ماشى فى امان الله
وخارج من شارع جانبى مقابل للشارع اللى ساكن فيه يا دوب بخرج بالكبوت عشان اشوف حد جاى ولا لأ
وموتسيكل جاى طاير لبس فيا من غير حتى ما يفرمل ناحية الباب اللى جانب السائق
انا اتجننت ونزلت واذا بالمفاجأة
الاكصدام كلو واقع على الارض والعربية بتنزل مية كتير تقريبا من القربة بتاع المساحات والرفرف داخل لجوة من فوق كدة وحكيتين جامدين جدا فى الرفرف برضو
انا لما نزلت من العربية سبتها دايرة ومختش بالى كنت نازل هقتل الواد لقيت جيرانى اتلمو وحشونى وواحد خدنى على جنب وقالى هتعمل ايه خلاص يعوض عليك ربنا هتاخد منو كام يعنى بقيت هتجنن العربية لسة زيرو بقالها شهر بس معايا مش معقول انا حاسس انى فى كوكب تانى
المهم لما لقيت مفيش صوت تخبيط فى الموتور قلت الحمد لله انها جات فى الاكصدام
النتيجة الاجمالية الاكصدام سليم جدا خدوش بسيطة
القربة بتاعة المساحات اتكسرت الاكصدام فيه كذا خبطة الكبوت مكنش بيقفل بعد ما فتحتو
المهم الناس لصمو الاكصدام وركنتها فى الجراج لحد الصبح
الحج طبعا زعقلى بعد ما الشارع سيحلو قبل ما يجى البيت وجاب تانى يوم سمكر اقل ما يتقال على استاذ
ظبط العربية والكلبسات بتاعة الاكصدام كلها اتكسر ظبطتها تانى وخد 80 جنيه بس وكمان لحم القربة بمعجون اسمو معجون حديد
المشكل بقى ان الرفرف شكلو زبالة بعد ما رد الحتت اللى دخلت لجوة والدهان كمان طلع بس مش كتير اوى بس واضح
بس عموما الحمد لله الحمد لله الحمد لله انها جت على قد كدة
بس بجد الاحساس ده صعب اوى ويا رب محدش يحس بيه
عموما انا مش هخرج بالعربية كمان شهر كدة لحد ما انسى
الحمد لله على كل شىء
واسف على التطويل

اسف على الغلطة (سمكر اقل ما يتقال على استاذ)
الحج جاب سمكرى اقل ما يقال عليه انو استاذ

ان شاء الله ترجع زي الاول ......و ربنا يكفيك شر الطريق

ادهن الرفرف و العربية لسه دهانها جديد فمش ها يبان فرق لون
بس طبعا ادهن سكينز

معلش احمد ربنا على كل شئ وكل دا هيتنسي اومال لما تجيب ال 750il
هتعمل ايه احمد ربنا انها جت على قد كدا

اقتباس:

---

المشاركة الأصلية كتبت بواسطة sabbagh

ادهن الرفرف و العربية لسه دهانها جديد فمش ها يبان فرق لون
بس طبعا ادهن سكينز

---

معلش لو سمحت هو ايه دهان ال سكينز دا ؟؟؟؟ لو سمحت

قدر الله و ماشاء فعل

متشكر جدا على المشاركات
بس بليز ايه هوا دهان السكينز ده؟
وسعرو كام؟
وبعدين العربيه لونها شامبين فيه دهان سكينز لونو شامبين ؟
بابا راح يسال على دهان قالولو كلو سيلفر مرضاش يجيبو عشان مش زى لون العربية اوى مع ان الشامبين قريب من السيلفر جدا

السكنز دة نوع دهانات
سعر الكيلو منة 320 جنية
واكيد هتلاقى شامبين إن شاء الله
ومتشريش لون مقارب او مشابة , اصبر لحد ما تلاقى لون عربيتك بالظبط
لإن اكيد العربية ليها كود للون
اللى هو تقريبا A17 (من موقع متسوبيشى مصر)
بص وإتأكد برضو

صورة فيها توضيح للألوان

http://www.mitsubishi-motors.com.eg/...ges/colors.jpg

ربنا يسترها معاك ومعانا
وترجع عربيتك زى الاول ان شاء الله

rabena ye3awad 3alik we kadar allah we masha2 fa3al wel mohem enak saleem ya 3am
matz3alsh nafsak kda

we ha2olak nasi7a 3ahan 7asaly haga zayak kda, so2 el 3rbya 3ala tool law a3adt shahr haterg3 hateb2a me2ala2 awy we law mesh mestahel, khod balak enta bas we el7dl enha gat saleema

قدر الله و ما شاء فعل ....كان ممكن تبقى أوحش من كده بكتير ....لو كل واحد أتخبط قعد شهر في البيت ....الشوارع كلها حتفضى ....هون عليك يا أخي الفاضل

يراجل هى دى حادثة انا فكرت حاجة جامدة الحمد لله انها جت على قد كدا و عادى اتعود على كدا احنا فى مصر يعنى

اخي انا مقدر والله شعورك ولكن قدر الله وماشاء فعل والحمد للة احمد ربنا انك سليم والحج بخير ودي في الاخر دنيا ومسيرك تسبها ولعل الله فعل ذلك لرفع بلاء عنك
راي انك تروح لواحد بتاع دكو كويس جدا جدا جدا ومش عتحس ان العربية فيها حاجة وبكرة تنسي ياسيدي اكتر من اننا بننسي ال مات من اعز الاهل لو انت من اسكندرية انا اعرف واحد بتاع دوكو كويس خلي بالك الموضوع مش موضوع نوعية البوية المهم الخدمة ال تحته والصنعة وانصحك غير القربة علشان تنسي

الأخ عز أنا من الإسكندرية
ممكن تعرفنى حد بتاع سمكرة ودكو كويس عشان أنا أحترت فى الموضوع دة
بس متؤليس حد من الى بيرشو العربية فى الشارع زى بتوع الأظريطة
عاوز سمكرة محترف
وبتاع دوكو محترم وأسعارة حنينة
يعنى من الأخر واحد عندة ضمير فى الزمن ده

روحت التوكيل فى عند المأمون
كان عندى حكة فى الرفرف والباب عربية كرتة خيشت فى العربية فى أبو قير

المهم روحت عند حمادة وأشرف ( توكيل لانسر وهوندا ) قالى من الأخر 650 جنية وبالحجز

المهم عمالتها عند محترفين وأساتذة صح وقدام عنيك وعلى يدك
اتكلف الموضوع كلة 350 جنيه

80 سمكرة
270 دهان ألمانى بالفرن وليس بالشارع
لآن الدهان بالشارع ده مش صح
+ ورنيش

حمدا لله على سلامتك يا اخ محمود , و تاكد ان "الى يجيى فى الريش بقشيش " و دة مثل شعبى بس فى عبرة كبيرة, و ان شاء العربية تتصلح و ترجع احسن من الاول .

زى ما كل اخوانا قالوا سكينز ده ماركة البوية و دى افضل نوعية
سعر الكيلو 550 شامل المصلد و التنر و الورنيش
فى انواع تانية اقل فى السعر زى ليكلير ايطالى و الكيلو 280 جنية
بس انت ها ترش حتة صغيرة و العربية جديدة
رفرف ها ياخد 1\8 مش اكتر بس انت ممكن تجيب 1\4 عشان لو ها يلقط بالمرة الاكصدام أو غيره
اللون بالكمبيوتر زى بويات الحوائط
و بما نا انت عربيتك جديدة اللون لسه ما غيرش فمش محتاج ان اللون يتضرب يدوى
يبقى ها تاخد رقم اللون الى تحت الكبوت و تروح على واحد يكون معروف بالكفاءة تشترى منه
طبعا الدهان لازم يبقى فى الكابينة (الفرن زى ما بيقولوا)

بالنسبة للدوكو في واحد في صلاح الدين امام مسجد المقدسي اسمة حمادة عيسي عندة ورشة كويسة وعندة صنيعية كويسة وبيتابع الشغل كويس جدا جدا ورقم الموبيل بتاعوا 0123455769 وممكن هو ال يدلك علي سمكري كويس علشان الافضل ان هو ال يستلم منة السمكرة علشان تطلع البوية صح روح واعرض علية الشغل وشوف سعرة بس هو في الصنعة كويس جدا جدا وطمني قولي عملت اة

الف شكر يا جماعة وربنا يخليكو ليا
انا فعلا ظبط العربية ورديت الرفرف على البارد وهسيبو كدة شوية بالخرابيش اللى فيه ياخد العين شوية وركبت الاكصدام والحمد لله كل حاجة كويسة
انا على فكرة من بنها وعندنا ناس كويسين اوى بس الضمير بقى
والف شكر على المشاركة بالموضوع

السلام عليكم
بداية احب أهنئ كل الاخوة والاعضاء الكرام بشهر رمضان المعظم.
بالنسبة للحادث الذي قد جري لك يا اخي mahmoudzaied
احب اقوللك انه بالظبط حصل معنا الصيف الماضي، كنا لسا جايبين العربية لانسر ٢٠٠٧ رمادي، وركنينها في الشارع و اذا بموتسيكل خبطها من المام ، وهرب بعد كدا.ونزلت اشوفها بعد ما البواب طلع يحكيلي اللي حصل بكل اسف، لقيت الاكصدام كله واقع علي الارض، والكليبسات كلها مكسرة...والواضح انها ضعيفة جدا
هوا انا معاك انه شعور صعب، بس والله انا صلحتها كلها من غير ما اجيب اي صنايعي او اوديها مركز خدمة،
انا كل اللي عملتو اني طلعت الكصدام في البيت، واستخدمت ميه سخنة مغلية فعدلت الجزء المخبوط الي اقرب ما يكون، وبعد كدا اشتريت ٨ مسامير مقاس ٨ و٨ صواميل وكذلك ١٦ وردة معدنية بدلا من البرشام الالومنيوم الضعيف إللي كان فية الاول، وبالنسبة للكليبسات لقيتها كلها سليمة والحمد لله....
هية حاجة سهلة جدا، ولعلمك عمرك ما هتلاقي حد يخاف علي عربيتك اكتر منك انت، لذلك لو كان في اي مشكلة فيها وانت شايف إنك ممكن تصلحها بنفسك ..يكون افضل.
و لو احتجت اي مساعدة مني في اي حاجة انت تحت امرك
الإيميل بتاعي
mabasiry@hotmail.com
و السلام عليكم
http://www.nilemotors.net

اقتباس:

---

ولعلمك عمرك ما هتلاقي حد يخاف علي عربيتك اكتر منك انت، لذلك لو كان في اي مشكلة فيها وانت شايف إنك ممكن تصلحها بنفسك ..يكون افضل

---

احمد ربنا علي قد كدة دة في بلاوي جامدة الواحد بيشوفها في عربيات زيرو ادبح حاجة للغلابة وخلي اثار الخبطة شوية عشان تاخذ العين ولما تيجي تعملها ما تسترخص فيها حاجة وانا متفق مع الاخ/mcomics http://www.nilemotors.net/Nile/image...ser_online.gif
في وانا بعمل كده في عربيتي

معلش يا احمد دا ممكن تكون عين محترمة فقعتك او ممكن يكون قدرها كدا
قدر الله وماشاء فعل
بعد كده اول تركب العربية وقبل ما تدورها تقول دعاء الركوب عشان ربنا يحميها ويحميك
:(سبحان الذى سخر لنا هذا وما كنا له مقرنين)

وطبعا يا احمد لازم تتطلع حاجة لله اول ما تجيب اى حاجة مش جديدة بالذات لان العين بتبقى عليها ولما تكون حاجة كبيرة زى كده عربية بيت اى حاجة زى كده لازم تدبح لان الدبح بيبعد الحسد والحقد والعين والغل من قلوب الناس
اخوك يوسف

بص أنا معايا عربية لانسر 2008 بوما وهي واقفة بتيتخبط ماكونتش بصلحها مع أنى مأمن عليها وبعديو وديتها التأمين و صلحتها ويوم أستلامها من التوكيل بعد الدهان بليل جت بنوتة زى القمر راحت شايلة ألكسدام الخلفي والعربية واقفة وأنا بقولك دة عادي في بلدنا