من فترة وانا واقع في حيرة اجيب انهي تليفزيون زي اي مرة بتجيب فيها حاجه وتلاقي كذا إختيار .
بس المرة دي كانت اسهل شوية عشان الاختيارات مكنتش كتير .
انا كان عندي تليفزيون قديم باناسونيك كتر الف خيره عاش معانا كتير كان 23 بوصة تقريبا و CRT قديم بقي :)
ومن فترة بفكر اجيب تليفزيون جديد خصوصا إن هيبقي ليه كذا استخدام من توصيل اللاب بيه ومشاهدة افلام او توصيل يو اس بي او تلعب عليه او تعرض صور وحاجات تانية .
اللي قلل الاختيارات اني كنت حاطط ميزانية 4000 جندي و محدد لنفسي فوق ال 40 بوصة و نوع محترم مش الانواع الغريبة اللي تحت السلم بلوتو و جالاكسي ونوكيا وحاجات غريبة شوفتها .
طبعا كان الاولوية رقم 1 للشاشات ال LED عشان وهم بصراحة بس للأسف ملقتش متطلبي اللي هو فوق 40 كان دايما الاقي 40 مثلا او نوع غريب ف اللي هو كنت كل شوية استني وانزل كارفور وسبينس عشان بيعملو سيل حلو جدا .
المهم واحد زميلي قالي ماتبص للبلازما هتلاقي طلبك واحسن كمان و فعلا دورت علي النت واقرأ الاراء واشوف صور و فيديوهات و قلت ممكن الاقي طلبي فعلا وطبعا كان قدامي 3 مشاكل طلعت بيهم من البحث
اول حاجة العمر الافتراضي تاني حاجه انعكاس الضوء تالت حاجه كبر الحجم نسبيا
وقلت انزل اشوف بقي علي الطبيعة ودورت لحد ما لقيت انضف حاجتين سامسونج 43 بوصة و ال جي 42 بس كان فيه فرق سعر 200 جنية وطبعا الفرق الاهم موضوع ال 3d اللي مش موجود في ال جي .
وبالمناسبة سبينس كان فيه عرض علي سوني برافيا 40 بوصة led ب 4000 بس زي ما قلتلكو انا كنت عايز حاجه اكبر وكنت لقيت طلبي في سامسونج .
اتوكلت علي الله و اشتريت السامسونج من كمبيوتر شوب في مول العرب لأنه كان ارخص من كل الستورز كان هناك ب 4000 وفي كل الستورز 4100 وكان اخر قطعة عنده .
روحت بقي البيت وحطيت البلازما علي الترابيزة كان جاي معاه ستاند شيك جدا وفي المجمل المنظر بقي جميل وتحس ان التليفزيون اكبر مانت شايفه هناك عشان بيبقي في جمبة كتير ف مبتركزش :)
المهم حصل مشكلة مش لطيفة اول ما شغلته وهي اني لاقيت الريموت مش شغال يمين شمال مش راضي يشتغل والمشكلة كنت شاريه بليل قبل ما يقفلو بحاجه بسطية فقلت مش مشكلة استني واكلمهم انهاردة او حتي اروحلهم تاني مش بعيد يعني وفعلا حصل وروحت وحكيتله المشكلة و الراجل قعد يعمل اتصالات ووصلنا ان بكرة إن شاء الله هيتبعتلي الريموت لحد البيت قلتله تمام مفيش مشاكل بصراحة كنت رايح اتخانق وعامل حسابي اكلم حماية المستهلك وفيلم بقي لأني مش شاري تليفزيون من تحت السلم انا بس الاسلوب خلاني اتكسف اتخانق بصراحة :) .
نيجي بقي لتجربة التليفزيون في المجمل رائع بصراحة كفاية انك شاري 43 بوصة ب 4000 :) لأ و سامسونج و 3d ومعاه نضارتين وستاند جميل .
طبعا انا مجربتش كل حاجة لأن مفيش ريموت ف كنت مقضيها مانيوال وهو مفيش غير زرار واحد بس من تحت بيتحكم في كل حاجة فكرة عبقرية بصراحة مش تلاقي 6 او 7 زراير .
نيجي لل 3 مشاكل اللي حكيت عليها فوق اللي هي عمر افتراضي - انعكاس الضوء - الوزن .. موضوع العمر الافتراضي طلع مالوش لازمه التليفزيون بيقعد 100000 ساعة لو عملت متوسط 12 ساعة في اليوم هيقعد معاك بتاع 22 سنة ف ربنا يدينا طولت العمر :)
نيجي ل موضوع الانعكاس وده كان قالقني جدا بس الحمد لله محستش بيه خالص غير لما تبقي واقف في الستور وتلاقيهم مشغلين 100 الف لمبة وتبص تلاقيهم ظاهرين في الشاشة و تتضايق فانا عندي في الصالون اضاءة مش بطالة و كمان البلكونة في وش التليفزيون بس بعيد شوية وعادي جدا محستش بحاجة .. و موضوع الوزن طلعا بردو اي كلام قدرت اشيل الجهاز لوحدي واطلع بيه السلم عادي :)
نيجي بقي ل حاجة هتقابلها مع اي تليفزيون حجم كبير كده هتضايقك شوية لما تبقي موصل التليفزيون والرسيفر ب كابل av وهي البكسلة يعني تحس ان الصورة كان اخرها مثلا حجم 30 وانت عملت زووم ف تبكسل .. هي بكسلة خفيفة وعادي تعدي طبعا بس مكنتش متوقعها وطبعا حلها سهل اني اجيب رسيفر hd واوصلة ب كابل ال HDMI وشكرا كده بس قدام شوية بقي مش دلوقتي .
اشتريت بردو كابل hdmi تعبان ب 25 جنية قلت اجرب الاول وفعلا وصلت اللاب وكان جمييييييل جدا وطلعت في دماغي فكرة اني اجيب ماوس و كيبورد وايرلس واشتغل من علي التليفزيون لو هشوف فيلم او هلعب .وجربت حطيت فلاشة علي فيلم وتمام طبعا بتقبل الصيغ المشهورة AVI و ASF ومتقبلش MP4 و RMVB و الحاجات دي بس عادي ممكن تشغلهم من اللاب .
نيجي بقي ل موضوع ال 3d ده بقي بصراحة مش عارف اجربة ازاي !! النضارتين معايا بس مفيش حاجه اشوفها .
ف كنت عايز اسألكو هل هلاقي افلام 3d في مواقع التورنت ؟ و لما انزلها واعرضها من اللاب هتشتغل عادي علي طول ولا في حوارات بتتعمل الاول ؟ وهل الكابل اللي انا جايبة يشغل 3d ؟ عشان اتقالي جرب وشوف احتمال مينقلش 3d ولازم اجيب الانواع النضيفة auvio وخلافة . وعلي اليوتيوب جربت شوف فيديو واحد عاملة نظام الازرق و الاحمر ده ولبست النضارة وشغلتها بس عادي مكانش في حاجه غير لما كنت في الستور كان باين !!
معلش طولت عليكم اهو كان ملخص بسيط كده حبيت انقل التجرية ليكو واللي حابب يعرف اي حاجه انا تحت امركو