يا جماعة أنا فجأة شعري خف بطريقة غريبة معرفش ليه،،بإختصار عاوز أراء الخبراء هل في علاج بيخلي الشعر اللي وقع يطلع تاني؟ يعني في علاج بيزود كثافة الشعر؟ مش بس يحافظ علي الباقي
عرض للطباعة
يا جماعة أنا فجأة شعري خف بطريقة غريبة معرفش ليه،،بإختصار عاوز أراء الخبراء هل في علاج بيخلي الشعر اللي وقع يطلع تاني؟ يعني في علاج بيزود كثافة الشعر؟ مش بس يحافظ علي الباقي
فيه فيتامين اسمه بانتوجار ده مخصوص للشعر و الضوافر
و فيه رش اسمه بيرفورما , ده موضعي لتنشيط البويصلات , لكن عيبه ان اللي يستعمله لازم يكمل بيه على طول , بمعنى ان بمجرد ما تبطله شعرك بيخف بسرعة كأنه بيعوض الشوية اللي بيرفورما كان ساندهم
كويس انك كتبت الموضوع ده لأنى بعانى من نفس المشكله
انا والله معرفش علاج معين للموضوع ده
بس رأيى بلاش الحاجات الكيماوية اللى موجوده فى الصيدليات لأنى قريت انها بتضر اكتر ما بتنفع
خليك فى الزيوت و التركيبات الطبيعية
و انا كمان شعرى ابتدى يخف ومحتاج اعرف له علاج
بس مش راضى اجرب حاجه غير لما تكون مضمونه علشان ما بوظش الشوية اللى باقيين
ياريت يا جماعه لو حد عنده معلومه يقولها
أو حد تكون زوجته او والدته عندها خلفية فى الحاجات دى يعرف منها و يقول لنا
او حد من البنات اللى فى هنا تسأل البنات اللى زيها و تفيدنا
بس اهم حاجه يكون علاج طبيعى وامن
انا سمعت ان تسريح الشعر باستمرار بمشط بينشط بوصيلات الشعر بسبب نشاط الدورة الدموية فده بيقلل تساقط الشعر او يمنعه ..... والله اعلم
من واقع تجربتي احب انقلها للمهتمين بموضوع تساقط الشعر,
كنت رحت لدكتور متخصص و قالّي الآتي :
أولاً: لا يجب استخدام الشامبوهات العادية مطلقاً أو الصابون العادي و البديل شامبو طبيعي بزيت الزيتون أو صابون طبيعي بزيت الزيتون و كمان مش كل يوم.
ثانياً: لا يجب استخدام فرشاة أو مشط بلاستيك و يجب استخدام فرشاة أو مشط خشب أو منتج من مواد طبيعية.
ثالثاً: يجب استخدام بيرفورما مرتين يومياً و ده لازم يستخدم على طول و طريقة الاستخدام بالتدليك الهادي علشان متجهدش فروة الرأس.
رابعاً: في شامبو و بلسم يستخدم مرة اسبوعياً و اسمه Ecrinal-ANP
و احب اقول ان الموضوع ده للي شعره بيتساقط مش اللي شهره تساقط خلاص و كمان الموضوع بياخد وقت لغاية ما تحس بالنتيجة يعني مش اقل من 6 شهور مع ملاحظة ان الاساس في الموضوع هو الــ بيرفورما
زيت جوجويا+زيت سمسم+زيت جرجير+زيت روزماري+زيت أملج+زيت زيتون+ زيت جوزهند(في حاله القشره) نسب متساويه وكل يوم بعد غسيل الشعر يدلك الفروه بيه
للأمانه انا مجربتوش بس لو هتمشي عليه لازم تكمل 3 شهور عشان تحس بفرق
اقول لك الفايده
الحق اتجوز بالشويه الفاضلين قبل ما يحصلوا اخواتهم
performa
or
hairback
lifetime use
استعنا على الشقي بالله
بص يا باشا.....دي خلاصة قراية في مواقع كتير أجنبية
السبب الرئيسي هو الهرمونات.......ده اصل المشكلة.....محتاج تعالجه الاول
فيه ناس بتستخدم دوا لعلاج البروستاتا اسمه بروبيشيا على ما اذكر.......بيظبط موضوع الهرمونات بس له تأثيرات تانية منها قلة الرغبة الجنسية
و فيه مادة فعالة موجودة في كذا مرهم اسمها azelaic acid تركيز ٢٠٪ و حسب ما قريت ملهاش اثار جانبية
لو استعملت حاجة منهم ده هيمنع تساقط الشعر.......و دي اول خطوة
تاني خطوة انك تستعمل حاجة تطلع شعر و دي فيه منها كتير زي هير باك و روهير الخ........و معاها تستخدم شامبو نيزورال بحد اقصى مرتين في الاسبوع علشان بيساعد على التخلص من القشرة و بينشط فروة الشعر شوية.
الكلام ده واحد مجربه برة على منتدى خاص بمشاكل الشعر و حاطط صور قبل و بعد.........اختلاف كبير....لو فتحت اللاب هجيبلك اللينك
و كل المنتديات اللي ليها علاقة بالموضوع و مش هدفها تسوق او تبيع منتجات معينة بتتكلم على نفس الحوار باختلاف المسميات بتاعة الأدوية المستخدمة
ممكن تتسلى في اللينك ده مؤقتاً
American Hair Loss Association - Men's Hair Loss / Treatment
باشا اللعب فى الهرمونات لعلاج اى عرض مرضى غير مستحب على الاطلاق بسبب خطورة اللى ممكن يسببه ده. . . عموما الشعر الخفيف او الصلع و بالذات المبكر هو عرض جانبى لزيادة الهرمونات الذكرية يعنى مش حاجة وحشة على اطلاقها :-) و غالبا علاجات الصلع اللى هتلعب فى الهرمونات هتحاول تعمل تثبيط لتأثير الهرمونات الذكرية على الشعر لكن ده طبعا مش هيتم الا بالتأثير على جوانب اخرى و دى طبعا مشكلة اخطر لذلك غالبا العلاجات الموضعية فى الحالة دى هى الحل
بالظبط الله ينور عليك. . . انت بتتأقلم و اللى حواليك هيتعودوا على الشكل الجديد وخلاص. . . ليا واحد صاحبى فى الشغل لما بنغلس على بعض و ببيبقى مفروس منى و مش عارف يرد عليا فى حاجة و يحب يغلس عليا يروح قايلى يا اقرع بغلاسة كده قال يعنى عايز يغيظنى. . . قمت فى مرة حرقتله دمه قصاد مجموعة كبيرة من الناس و شرحتله التفسير العلمى لموضوع الصلع ده و انه عرض جانبى لموضوع زيادة الهرمونات ده و معناه طبعا فى جوانب اخرى . . . و خلصت عليه خالص لما قلتله متشكر جدا على المجاملة دى وعقبالك لما تبقى اقرع زيي :-) و من ساعتها بطل يحاول يغلس عليا بالطريقة دى خالص :-)
اللى راح راح خلاص ... جيبها زلبطة وعيش حياتك
ادعوك للانضمام معنا للحزب ده
http://www.nilemotors.net/Nile/217267-a.html
ربنا يمسيك بالخير يا حج أحمد
انا شخصيا نفسى جدا جدا لأنى متخيل راحة الموضوع ده . . . بس المدام مش راضية خالص . . . و بما ان انا مش شايف نفسى معظم الوقت بس دى هتبقى مشكلتها هى و هى رافضة تتخيل حتى صورتى و انا ظلبطة :-) فشفقة بيها انا مأجلها . . . بس انا معتمد على ان عامل الوقت فى صالحى و هييجى الوقت اللى هى مش هتلاقى مفر غير انها توافق و ساعتها هيبقى عزاءها هى انها اهى برضه موضة :-)
الشكل الجديد ده يا باشا الناس أتعودت عليه من زمان............أن بس اللى لسه متعودش عليه :)
المنتدى التاني اللى فيه الولد اللى جرب الحل اللى أنا قولته فوق
My hair loss story and what you can do about yours (PICS) - Bodybuilding.com Forums
متشكر لردود السادة الأعضاء..أنا روحت لدكتورة جلدية شاطرة جداً إسمها هالة ماهر.بعد الكشف قالت إن ده صلع وراثي..كتبتلي علي دواء إسمه بانتوجار 3 مرات في اليوم وسبراي إسمه hair act يحتوي علي مادة مينيكسديل تركيز 5 % أستخدمه كل يوم الصبح.وسبراي تاني أستخدمه كل يوم بالليل..وشامبو كافيين أستخدمه يوم بعد يوم.وفترة العلاج 3 شهور..وإن شاء الله من المفترض يعمل نتيجة مبهرة ويغير شكل الدماغ خالص.ولو لا قدر الله محصلش نتيجة كويسة قالتلي نلجأ لحاجة إسمها حقن ميثوسيربي 12 جلسة
انا الدكتور كتبلى دوا اسمه نيكسوديل وده رش الصبح وبالليل
ومعاه حبوب زنك
حد جربه