تقرير عن صيانة ال1000 في ابو رواش

**HHALAWANY** · 11-05-2013 09:01 PM

بسم الله الرحمن الرحيم
اصدقائي نسور السوزوكي
جايلكم النهاردة بتقريري البسيط عن صيانة الالف في مودرن موتورز ابو رواش
وقبل اي كلام احب اشكر كل واحد ساعدني بالمعلومات اللي انا كنت محتاجها
وعلى راسهم الدوك الكبير واستاذي اكسيل :)

مبدئيا انا كنت حاجز بعد طلوع الروح يوم السبت اللي هو النهاردة على الساعة 11
روحت فعلا وكنت هناك الساعة 10 الا ربع تقرييا
دخلت الاستعلامات وسلمت الرقم والباشمهندس سالني اذا كنت انا بشتكي من حاجة في العربية وانا فعلا قلتله على عيب الفيتيس وتقله وكمان الديبرياح العالي .كمان المهندس قالي عاوز الزيت اللي بيتغير كل 10000 ولا كل 5000 .. انا مش عارف انهي احسن بس اخترت الغالي اللي هو بيتغير كل 10000
المهم .. قالي اني هاستلم العربية على الساعة واحدة ونص.... راح بص على العربية وكان في مهندس تاني معاه وفتحوالكبوت وقالي ان الماتور محتاج يتعمله فووم .. مش فاكر الكلمة بالظبط لاكن هو قالي انه هايغسلة عشان خاطر مايسخنش وعشان امان ليا ... انا قلتله اوك

دخلت العربية وماعرفتش عنها حاجة الا بعد الساعة واحدة ونص سالت عليها واستلمتها على الساعة 2 وربع

اولا الفاتورة بتقول الاتي
صيانة 1000 مجانية
غسيل محرك ب50 جنيه
فلتر زيت ب40جنيه
زيت محرك موبيل ون كمية 3 لتر 231 جنيه
ضريبة مبيعات 32 جنيه
مصروفات اخرى 10 جنيه
الاجمالي ... 360 جنيه

وطبعا انا لا اخدت حاجة ولا شفت حاجة وكله حصل من ورا ضهري
اولا انا مش فاهم 3 لتر زيت ازاي واتا عرفت منكم انها بتاخد2 لتر بس ... مش عارف

نيجي للنتيجة بقا
الديبرياج وطي سنة فعلا
الفيتيس حاسس انه لسة تقيل شوية
نيجي بقا للي غايظني .. في الاول انا كنت بجيب على الغيار الثالث لحد 75 مرتاح
وساعات لو الطريق سريع او نازل منحدر ممكن ادخل على 85 مرتاح برضو

دلوقتي انا بجيب الثالث واخره على 55 او 60 وصوت الماتور بيعلى ومايزدش اطلاقا
مش عارف بقا ليه مع انها المفروض تبقا العربية احسن من الاول!!!
كمان وانا ماشي على الهادي بسمع صوت كركرة حاجة كده عامله زي الطيارة النفاسة بتاعة زمان ... بس صوته واطي ولاكن مسموع وبيروح بعد كده مع التزويد !!!!
كمان حاسس ان العربية مخنوقة ومابتسحبش كويس زي الاول .....
ياريت ياشباب حد يفيدني في النقطتين دول والمفروض صح كده ولا ايه والمفروض برضو اعمل ايه؟

بصراحة انا مش مبسوط اطلاقا وكمان مخنوق من اللي حصل .. لاني ماحستش ان في صيانة محترمة حصلت وكمان ماحستش باي تحسن حقيقي للعربية

وشكرا

**HHALAWANY** · 11-05-2013 11:54 PM

مافيش حد بيرد ليه عليايا شباب.،،، ماحدش عنده معلومة
فين الناس الخبرة والناس اللي مجربة
طمنوني يا جماعة وردوا عليا

**mohamed76** · 12-05-2013 01:08 AM

اولا الف مبروك للصيانة
وان شاء الله تكون الحاجات اللى بتشتكى منها ده بسيطة
واللى معاه العربية ان شاء الله مش هيتأخر عليك فى الرد على النقاط اللى يعرفها
انا مش معاى العربية بس انا لو مكانك اول حاجة هعملها هكلمهم فى مركز الخدمة و اقولهم على الحجات اللى بشتكى منها و اشوف ردهم ايه مع رد الاعضاء اللى معهاهم العربية

**Amr Axel** · 12-05-2013 03:22 AM

الف مبروك يا باشا صيانة الـ1000 عقبال صيانة الـ100 الف
بخصوص الزيت كان ممكن تكتفي باللي بيقولوا عليه 5000 اساسا مفيش حاجة اسمها زيت 5000 و زيت 10000 المفروض معدني و تخليقي المعدني مناسب لموتور الماروتي بس التخليقي شغال برده و ع حد علمي هم بيستخدموا موبيل و للعلم احنا مقولناش العربية بتاخد 2 لتر احنا قولنا 3 لتر الا ربع بالفلتر و لترين و نص من غير فلتر مفيش حد جاب سيرة 2 لتر ابدا :)

العربية مكنش محتاجة غسيل لأنها لسه جديدة المواتير اساسا مصممة للعمل في الظروف الشاقة شوية التراب دول ميعملوش حاجة اهم حاجة كل فترة انفخه هوا لكن بلاش غسيل انا عندي في عمر العربية كله مغسلتوش غير مرة و كيميائي d:

بالنسبة الاسعار كلها كويس لكن اللي غريبة مصروفات اخري و لا هم بياخدوا المصنعية بطريقة غير مباشرة طالما مجانية ؟؟؟ كان المفروض تسأل لأني اول مرة اشوفها

بخصوص النقلات متزودش في التالت عن 60 و عندي كذلك ده طبيعي و الصوت يعلي العربية 3 سلندر 800 سي سي يا باشا مش 1600 4 سلندر :)

اما النقلات عندي احساس انك لسه مش متعود عليه

بخصوص التقل و الكركرة مش عارف ممكن كهربا عايزة تتظبط بس جرب العربية ع السلانسيةو شوف الصوت موجود و لا لأ

و اخيرا كالعادة مفيش حد راح بماروتي الصيانة و رجع فرحان :(

وتسلم ايديك ع التقرير و في انتظار تقاريرك الحلوة :)

**lidosasa** · 12-05-2013 12:05 PM

الأستاذ عمرو جاب ليك من الأخر
وفعلاً عمر ما حد قال إن العربية بتاخد 2 لتر زيت هما 3 إلا ربع بالفلتر وأكيد بيحسبوك على 3 لتر ودا شىء عادى .
وممكن تكون كهربة العربية مش مظبوطة وتبان معاك المشاكل أكتر لو بتستخدم بنزين 80 ؟

**HHALAWANY** · 12-05-2013 04:47 PM

طب انا اعمل ايه دلوقتي !!؟؟ :(

**Amr Axel** · 12-05-2013 06:33 PM

المشاركة الأصلية كتبت بواسطة waelgam2005

تصحيح لحاجه الاستاذ عمرو قالها بس ان الماروتى طبيعى ان التالت يبقى اخره 60 لا هوا مش طبيعى خالص لان انا ساعات بوصل بيه لتمانين وهوا مش صح انك تقرص عليه بس مش معنى كدا انه يبقى اخره 60 وبعد كدا ميجبش لا انا اعرف ناس بتوصل بيه ل 100 كمان .
وعلى فكرة اللى اعرفه نوع الزيت ليه عامل اساسي على موضوع السحب وصوت الماتور وناس كتيرة اجمعت ومنهم انا على شل الاصفر من حيث السحب وصوت الماتور

للمرة التانية يا ابو وائل اوضحلك كلامي ان قصدي مش اخرها 60 و متجيبش بعد كده انا بقول اخرها 60 مرتاح و بعدها تنعر لكن تجيب 80 و انا جبت 80 لكن ساعتها هتلاقي الار بي ام وصل لـ4.5 - 5 و يبدأ الموتور يجعر و ينعر

لا يا باشا مينفعش كده اللي واخد عقلك ;)

-

-

الموضوع: تقرير عن صيانة ال1000 في ابو رواش

LinkBack

أدوات الموضوع

عرض

تقرير عن صيانة ال1000 في ابو رواش - انشر الموضوع فى :

-

-

-

-

المواضيع المتشابهه

تقرير صيانة ال1000 بمركز خدمة احمد مرعي بالاسكندرية

تقرير صيانة 15 الف فى مودرن ابو رواش

تقرير صيانة ال1000 لبروتون واجا مميزات وعيوب

تقرير صيانة 5000 من ابو رواش

تقرير صيانة ال1000 للجين تو

الكلمات الدلالية لهذا الموضوع

المفضلات

المفضلات

ضوابط المشاركة