سيفيك الجيل التامن تقضي على فيرنا لا موأخذه يا فيرنا و سؤال على الماشي
صباح الخير
طالع من البيت مساكن شيراتون و داخل على الرئيسي على شارع مطار الماظه اللي بيربط بين صلاح سالم و امتداد الاوتوستراد و كان ورايا عربيه فيرنا صاحبها شكله قرفان من العبدلله عشان انا متعود اسوق براحه اول 5 دقايق لحد العربيه ما تسخن و دخلت الفتحه في امان الله عشان اخد شمال لقيت الباشا طاير من اليمين و عايز يعديني من الفتحه و طبعا هيكسر عليا جامد عشلان يفادي العربيات اللي جايه يعني مش هاين عليه النص ثانيه اني اعدي فيهاالملف و بعدين يعديني في العدل براحته
بصراحه الحركه دي بتستفزني جدا بحس اللي بيعملها انه مبيحترمش الناس التانيه قمت رامي سنه يمين عشان يبقى مزنوق و خدت ملفي على واسع و خدت شمال الطريق و رحت موسعله لقيت فرح ورايا رغم ان الطريق واسع و يعدي تريللا و جاي طاير من على اليمين عشان يعدي و حسيت انه شكله مجنون و ممكن يشتم و كانت بنتي راكبه جنبي بوصلها قلت في سري طب و حياة والا بلاش مانت معدي في سنتك العربيه ساعتها كانت على 45 كم في الساعه و طبعا ماشي بسخنها فكانت على الرابع (بعرف من الار بي ام ) و عاده لما بحب اسقط نقله بسقط من الشيفت عشان الموضوع يكون في المعقول و بتكون التسقيطه غيار واحد
لقيت نفسي لا اراديا بحط الدواسه قبل الارض بشويه و عينكم ما تشوف الا النور ثانيه واحده كنت على سرعة 70 كم و جبته في ضهري بمسافه و العربيه عماله تجري زي المجنونه و كل ما الطريق يهدي القاه بيتعمد يكون ورايا عشان يعدي من ناحيتي رغم ان شارع الثوره واسع و يساع من الحبايب الف المهم العربيه زي ما تكون اتعملها سوفت وير بقى الغيار بيشبع لحد 4000 لفه اقله رغم اني ساعات اتعمد اخف رجلي عشان تنقل بدري انما ما فيش فايده راسها و الف سيف تحرق على الغيار لحد ما طلعت صلاح سالم رايح ناحبة العباسيه و الطريق فاضي نسبيا و انا على سرعة 80 كم فالباشا قال لك الحلو وقع و لقيه بيعدي تاني من عل اليمين قمت مسقط نقله برجلي من الرابع للتالت رغم ان عادة بتبقى واخده خامس بس فعلا الموضوع كان غير معتاد المهم الار بي ام نط فجأه على 6000 لفه و لقيتها على 130 كم و كل ما اخف رجلي عشان تجيب رابع مش عايزه مع احساس ان الواحد كان في السيميلاتور طبعا الباشا بقى ورايا ب 50 متر اقله
الغريب اني لما لقيت بنتي اتوترت قلت امشي براحه و قمت مدي اشاره يمين و هديت ما رضيش يعدي (ماكان من الاول)
المهم اني طول ما انا ماشي سايق عربيه تانيه رغم اني على ال d الار بي ام بيتحرك اسرع و الاولاني بيفضل لحد 4000 لفه مع الرأفه و صوت التسارع بيعلا بسرعه (و الله ولا صوت المزيكا)
ياترى ده سببه ايه هل عشان قرصت عليها في بداية التشغيل و حطيت الدواسه في الارض تقريبا فالعربيه نقلت على بروجرام تاني ولا ايه اللي حصل بالظبط ؟
اسف للاطاله