الموضوع: محبط جدا

المشاركة الأصلية كتبت بواسطة wawoo

اى خدمة يا مسحراتى , انت قول بس عاوز تعمل اية و احنا حنقوم بالواجب فى تظبيط الاحباط للدرجة اللى انت عوزها ,
بس يا اخى الموضوع مش سودوى قوى كدة , عادى يعنى هى الحياة كلها كدة مشاكل فى اى مكان كانت
" لقد خلقنا الانسان فى كبد" صدق الله العظيم
الكبد و التعب جزء لا يتجزء من حياة الانسان , المهم انت كنت عاوز تشترى موديل اية .

المشاركة الأصلية كتبت بواسطة sab3aawy

بص يا اخونا المسحراتى(كل سنة وانت طيب بمناسبة رمضان)

بنشتكى منها، ومن فصولها البايخة، ومن مصاريفها، ومن المواقف اللى بتحطنا فيها ، وبنلعن اليوم اللى ارتبطنا بيها فيها، لكن بمجرد ما انها تختفى من حياتنا لأى سبب سواء كان طارى او مزمن بنلاقى الحياه كلها اصابهاالشلل وبنفتكرها بكل الخير وبنحس انها ازاى هى نعمة من ربنا ولذلك محدش مننا رغم شكواه منها بيقدر يستغنى عنها

زى ما انت شايف ان الكلام اللى فوق ده ينطبق على حاجتين: السيارة والزوجة (او الزوج بالنسبة للسيدات) ولذلك فدور السيارة فى حياه مظمنا شبيه جدا بدور الزوجة، مبنشوفش منها غيرالسلبى طول ما هى موجودة، لكن وقت اختفائها بنتحسر على ايجابياتها

المشاركة الأصلية كتبت بواسطة mbassal

السلام عليكم جميعاً

عاوز بس أذكرك بالحديث ده:

عن محمد بن سعد يعني ابن أبي وقاص عن أبيه رضي الله عنه أن رسول الله صلى الله عليه وسلم قال { ثلاث من السعادة : المرأة الصالحة تراها تعجبك , وتغيب فتأمنها على نفسها ومالك , والدابة تكون وطئة فتلحقك بأصحابك , والدار تكون واسعة كثيرة المرافق . وثلاث من الشقاء : المرأة تراها فتسوءك وتحمل لسانها عليك , وإن غبت لم تأمنها على نفسها ومالك , والدابة تكون قطوفا فإن ضربتها أتعبتك وإن تركتها لم تلحقك بأصحابك , والدار تكون ضيقة قليلة المرافق }

وطبعاً الدابه فى عصرنا ده تكون السيارة المعقولة.

يعنى باختصار ، السيارة أحياناً تحس انها تساوى وزنها دهب / وأحيانا تلعن اليوم اللى اشتريتها فيه. وده حال كل حاجة فى الدنيا

ربنا يوسع عليك وتشترى الشقة والسيارة.

المشاركات في الموضوع ده أكثر من رائعة.. سبحان الله على مواضيع المنتدى اليومين دول.. موضوع تلاقيه مليان بالحكم و الكلام الهين اللين و كمان تطلع منه باستفادة و مواضيع تانية بيطلع منها شرااااااااار.. ربنا يقينا منها.

المشاركة الأصلية كتبت بواسطة دموع الثلج

انا متفقه مع حضرتك وهقوله الحاجه الوحيده الايجابيه من تجربه شراء سياره
انك تقدر تروح المكان اللى انت عاوزه وفى الوقت اللى انت عاوزه بدون ما تكون تحت رحمه حد

لكن اشترى عربيه واركب عربيتك وانزل معانا للمفرمــــــه وخد بالك هتلاقى جمبك عربيات شمال ويمين وقدامك هتلاقى امين شرطه سخيف وراكب جمبك مليون شيطان عمال يقولك اكسر على اللى كسر عليك واشتم اللى خبطك وزعق للى راكن غلط بص حضرتك لو ما لقيتش حد من الناس ده كلها حواليك اكيد هتلاقى مطب غريب وبعده على طول حفره لا بير تبقى نفسك تنزل تشتم الحفره وتتخانق مع المطب

من الاخـــــــــــــــــــر كده الكل فى الشارع روحه بقت فى مناخيره و اللى يركب عربيه فى شوارعنا دى ومع سلوكياتنا دى يبقى غصب عنه هيبقى انسان عصبى موت

أولا توقعيك ده مششششششششششكلة.. جبتيه منين ده؟

انا كنت عايزة اسأل سؤال: هو التوتر ده كله في شوارع القاهرة بس؟ و لا الناس كلها في المحافظات التانية قافشة على بعضها كده؟ طيب اذا كان جزء كبير من التوتر و الأفش ده بسبب زحام الطرق و المواصلات و كل حتة تروحها زحمة.. طيب لو مافيش الزحام الشديد ده في مدن تانية زي مثلا الاسماعيلية و السويس الخ الخ.. يا ترى همه برضه هناك متحفزين لبعض على طول كده زي في القاهرة و لا لأ؟

احنا عندنا فى اسكندرية مثلا الحياة احسن بكتير فى السواقة طبعا
لان احنا فى الشتا بالذات الحياة بتكون حلوووة و الشوارع مش زحمة هو اكتر ساعتين فى الشتا زحمة هما من 2 الى 4 معاد خروج الموظفين و الكليات
ولكن فى الصيف اسكندرية لا تطاق و الخلافات و القفشات بتكون كتيرة وزحمة من الساعة 3 الضهر لعاية اخر الليل وددة طبعا من كترة المصييفين من كل المحافظات قاهرة جيزة شرقية غربية.....
معاكم محمد عمارة من على شواطى كورنيش اسكندرية :((

المشاركة الأصلية كتبت بواسطة MMamdouh

مفيش بديل عن العربية... تحت ايدك 24 ساعة فى اليوم... 7 ايام فى الاسبوع

تغنيك عن سؤال سواق التاكسى و تركة ليك لو المشوار معجبوش ولا اكنك قفة فى الطريق (مع احترامى ليك طبعا انا بس بشرح الموقف) و سرقته ليك لو قالك "اركب"

تبعدك عن بهدلة و قلة ادب سواقين الميكروباص

تحفظ انسانيتك من الضياع وسط المواصلات العامة

تخيل انك الساعة 2 بليل و عايز تروح و معاك المدام... و كل تكسجى يتقالط عليك اكنه حيركبك ببلاش و ممكن يسيبك و يمشى و ميركبكش... و اللى يركبك ميرضاش يخش الشارع اللى ميعجبوش و يتخانق معاك على الاجرة... دا اذا مقالكش انا حاخد 100 جنية اول ما تحط رجلك فى التاكسى

و يا سلام بقى لو يوم مطر... حتعمل عليك احلى شغل... و يوم ما تتكلم مع حد فى الاجرة يقولك البنزين غلى... و هما بيمونوا غاز ب 45 قرش للمتر او بنزين 80 ب 90 قرش اللتر... و ياريتك راكب عربية نضيفة... دى مبهدلة و معفنة و طالع عين اللى جابوها

لو رحت للمكروباص يبقى مستحيل المدام تبقى معاك... اصل الدخول للميكروباص مش لطيف خالص للسيدات و ساعات بيحصل حاجات مش لطيفة... المهم لو انت لوحدك رحت تركب لازم تبقى عامل حيابك تجرى شويتين حلوين ورا الكروباص لحد ما يقف و تشغل كيعانك (جمع كوع) عشان تناول الناس اللى حواليك بيهم والا هما حيناولوك بالكوع و مش حتلحق تركب و مش بعيد يدوسوا عليك كمان

عادى بقى و انت قاعد قى الميكروباص واحد يقعد عليك و يفرم رجلك او يخبطك بشنطة فيها زلط و دبش و لو قولتلة حاسب يقولك "يا عم دى شنطة فيها قطن" و كلام فاضى من دة... و اول ما المكروباص يطلع لازم تستشهد لان السواقين بيسوقوا اسواء سواقة فى الدنيا... سرعة و تهور و ممكن غباوة... اعتقد انت و الكل عارفين كدة كويس

تعالى بقى انزل من المكروباص... لو نازل فى حتة مش اخر الخط يبقى حتدوسلك على كام واحد كدة لحد ما توصل للباب و انت ضهرك متنى... عادى لو فيه مسمار فى كرسى نتشلك البنطلون او عتة السلم كعبلتك و نزلت على وشك او كانت معدن و اتزحلفت عليها ووقعت على ضهرك... تعيش و تاخد غيرها... لو نزلت اخر الخط حتواجه بسيل من الناس اللى عايزة تركب (الناس اللى كانت بتدى بالكوع فى اول القصة) و عايزين يركبوا و انت و باقى الركاب منزلتوش اصلا

المواصلات العامة حدث ولا حرج... دور على خرم ابره عشان تقف دا لو لقيت مواصلة توصلك اساسا و ساعات تاخد مواصلتين و تلاتة و احيانا اربعة فا الفلم بيتعاد هو هو كل مرة و بمعظم مساوىء الميكروباص و يزيد عليها البطء و الخنقة

معقولة حد يستبدل عربية تحت ايدة فى اى وقت و واسعة و مريحة و مش بعيد فيها تكييف و باور و كاسيت؟؟ كفاية انك حتكون امن على نفسك و مراتك و اولادك و عمرك ما تبقى متكهرب و انت فى مشوار عشان تبقى عايز تروح بدرى عشان المواصلات... او تكون شارى حاجات الشهر من كارفور و معاك شيل للصبح و بسهولة تحطها فى شنطة عربيتك و تنساها... او تكون مستعجل و مش طالبة تناكة سواق تاكسى او لابس و متشيك و مينفعش تبعجر نفسك فى مكروباص او اوتوبيس

للعلم تكلفة ركوب تاكسى فى كل مشاويرك هى تقريبا تمن القسط الشهرى لعربية جديدة و بالتالى الموضوع مش مجدى ماديا انك تركب تاكسى... دا غير عيوبة اللى انا ذكرتها قبل كدة

انا سمعت مثل و مؤمن بيه جدا... حمارتك العارجة تغنيك عن سؤال اللئيم

يمكن العربية تزهقك و تقرفك و تدفعك كتير صيانة و مصاريف... لكن هل تقدر تستغنى عنها؟؟؟

لا

MMamdouh

كلام سليم و واقعي 100 في ال 100

وماكنتش عايز تعلق يا محمد باشا؟

السلام عليكم ورحمة الله وبركاته

عندنا فى الاسماعيليه مفيش مشكله نهائى فى المواصلات وتقريبا معظم الاشارات مفيش عليها امين او عسكرى وتجد كل السائقين سواء ملاكى او اجره ملتزم جدا بالاشارات ويعتبر شىء مستحيل ان تجد سائق يكسر اشاره واذا شاهدت ذلك ( مره كل كام سنه كده ) واحد السائقين كسر اشاره تجد كل من حولك متعجب جدا وغاضب من هذا السائق واحيانا يتم توبيخه بالكلام ممن حوله من السائقين

الحاجه الثانيه عندتا فى الاسماعيليه هى انه لا يوجد اوتوبيسات للنقل الجماعى الا قليل جدا والناس بتعتمد على التاكسى والتاكسى عندنا يعمل على خط سير محدد مثلا : الفردوس / الموقف
والاجره موحده للتاكسى وهى 50 قرش للفرد فى كل هذه الخطوط ( يا بلاش )
واذا احتجت تاكسى مخصوص ( داخل المدينه ) اجرته 2 جنيه واحيانا يطلب 2.5 جنيه نظرا لارتفاع اسعار البنزين - اما اذا كان مشوارك خارج حدود المدينه ( مثل البلاجات ) بتكون الاجره 5 جنيه او حسب الاتفاق مع السائق مع استحالة ان تتعدى 10 جنيه

شعار السائقين فى الاسماعيليه هو الاحترام والادب واخلاق الرجال فى السواقه وعند حدوث اى حادثه بسيطه او كبيره تجد الادب والحوار هو المسيطر الاول والاخير على الموضوع ونادرا ما يتعدى الامر الى حدوث مشاجره

هقول لحضرتك حاجه لو حابب تشترى سياره وتستمتع بقيادتها اذهب وعيش فى الاسماعيليه مدينة السحر والجمال وعروس القنال

تحياتى وتقديرى