تجديد السيارة وعايز مساعدتكم في الاسعار
الحمدلله العربية شديتها شدة محترمة فوق العادة عند سمكري إيده ميزان (والمشكلة انه بيشتغل بالليل بس على اللمبة وده طول الموضوع شوية) وبوهيجي بيعمل شكل ولا الفابريكة بصراحة
بإذن الله هدخل في العفشة لأن دي اكتر حاجة بتعقدني في اي عربية وقبل التجديد كان عندي المشاكل الاتية
- العربية ساقطة من قدام بشكل غبي
- الجانب اليسار من الامام أوطى بشوية من اليمين
- العربية بتحك في المطبات
- كنت بسمع طقة في الجنب الشمال مالهاش معاد يعني ممكن نقرة يظهر ونقرة تانية لأ ممكن مطب بطلع عليه في اوله وممكن لأ ممكن وانا بنزل من المطب وممكن لأ كان صوت طقة حاجة كده زي لما تطبق علبة الزبادي علشان تكسرها
- كنت بسمع صوت من الجنب الشمال اللي فيه المشاكل دي كلها (فس فس) بس كذا حد قالي ان ده صوت صحي
المهم دلوقتي حسب الكلام ده ناس تقولي شوف اللي بايظ واعمله وانا بصراحة عايز اغير تماما لجديد
- أجيب نوع مساعدين ايه انا من الزقازيق وكل ما اسأل يقولي أصلي او جي إم مع ان كل الناس او اغلبهم في المنتدى بيقولوا مونرو أحسن نوع (لو في حد في الزقازيق يقولي بيتباع فين) طيب لو المساعدين مونرو في حد جابهم قريب او عارف سعرهم
- انا عايز اجيب اربع مساعدين جداد واربع سست في حد يعرف الاسعار كام وإيه أحسن حاجة ؟
- في حاجة تانية مهمة في العفشة هحتاج اغيرها حتى لو سليمة ؟(بطاحات ؟؟؟؟)
- أنا كنت عايز اعرف التابلوه بالجزء اللي تحته بالجزء التاني اللي لحد بعد الفتيس بيعمل كام او سعر كل جزء لوحده
- سعر العداد اللي فيه آر بي إم بكام ؟
الحاجات دي كلها اجيبها منين خصوصا حاجات العفشة علشان خايف تكون مضروبة
بالنسبة للأسعار طبعا انا عارف في تغير مستمر بس عايز اعرف رينج بحيث اعمل حسابي وانا نازل خصوصا اني هنزل القاهرة مخصوص
محتاج نصيحتكم لإني تايه ومش عارف اعمل ايه
وشكرا