بصراحة انا كل يوم اعجابى بالعربية بيزيد جدا ,, مستنى الاستلام بفارغ الصبر .. وكل مقرأ عنها اكتر واعمل سيرش بتأكد انها الافضل فى فئتها ,, بل بالعكس ,, العربية ديه بمجرد انتشارها شوية حتدخل فى الفئة الاعلى ونتمنى السعر ميزدش
انا ححاول اعمل تقرير عن العربية بس مش تقرير بالتفاصيل والمعلومات الفنية والتقنية ,, لان ده متوفر فى البورشور والموقع بتاع العربية
انا حعمل تقرير عن العربية زى ما انا شايفها وخاصة الحاجات المميزة بها
ملحوظة
التقرير ده فى تحيز شديد ,, وبعيد كل البعد عن الحيادية ,,
الشكل الخارجى ,,
بالنسبة لمقدمة السيارة فهى تتميز بمقدمة هجومية جذابة جدا ,,
الاكصدام والشبكة الموجودة به متكاملان تماما ,, وتزيد العلامة من جمال مقدمة السيارة
الكبوت به تعريجات وانحاءات منظمة مائلة على الجانبين مما تضفى على السيارة احساس شديد بالفخامة
من الاشياء المميزة بالنسبالى برضه هو تناسق الفوانيس الامامية وانها مدفونة بشكل اكثر من رائع داخل الاكصدام وعدم بروزهاا بشكل حاد خارج الاكصدام مثل الالنترا او الصنى الجديدة
وطبعا مفيش فروقات واسعة بين الكبوت والاكصدام او خلوص واسع زى ما بنشوف فى كبوت بعض العربيات اللى موجود اليومين دول
بشكل عام العربية تصميمها الخارجى رائع وكل اللى شاف العربية اتفق على كدة وفكل خطوطها متناسقة و افضل ما فيها حجمها كعربية سيدان فى فئتها اللى يعتبر حجم محترم جدا وتقريبا تعتبر اكبر عربية سيدان فى فئتها
كمان فى حاجة مهمة ,, الدهان الخارجى للعربية جودته عالية جدا والعربية بتلمع بشكل ملف جدا ,, و طبعا لون العربية بيدى درجتين لون مختلفين بليل وبالنهار
طبعا الكلام المعروف بقى عن السيارة .. ان السيارة تقفيل اوربى وبالتحديد مصنع سيتروين فى اسبانيا فى مدينة فيجو ,, وكذلك جميع المكونات ,, ولايوجد بها ولا لمسة صينى ولا غيره ,, وطبعا معروف ان السيارات الاوروبى بتتميز باعتمادية كبيرة جدا بالنسبة للمكونات الداخلية وايضا العمر الطويل لقطع الغيار والاجزاء الميكانيكية ,, وطبعا التكنولوجيا المتطورة جدا ,, فى اداء المحرك وانظمة التعليق و نظام حقن الوقود وايضا العقل الذكي بالسيارة ..
وطبعا العربية قبل ما تجيلنا هنا تم عمل تجارب واختبارات عليها شديدة جدا لضمان جودتها ولتلافى مشاكل والعيوب التى قد تظهر بعد الاستخدام ,, يعنى م الاخر كدة العربية متجربة وتاخدها تركب وانت مرتاح م قلقان من ظهور اى مشكلات ,, مش بيعبروا العميل حقل تجارب للعربية ,, بمعنى انك تشترى العربية وتبدأ العيوب فى الظهور من كل حدب وصوب ( عربيات زيرو والله ويبقى مدفوع فيها مبلغ وقدره وتسمع فيها مشاكل غريبة جدا )
حيقولك ما هو التوكيل بيصلحها فى الضمان ,, اه جميل حيصلحها فى الضمان بس بعد ما يكون صاحب العريبة قلبه اتقهر على الفلوس اللى دافعها والعربية اتفككت واتلعب فيها وهى لسة زيرو
يعنى م الاخر كدة عربية مضمونة ,, ولا حتسمع صوت تصفير من تيل ولا ماكل فى العفشة ,, ولا كاوتة مساعد بتهبد ,, ولا فيبر بيخبط فى الصالون ,, ولا اى حاجة من الكلام اللى احنا بنسمعه اليومين دول فى العربيات الزيرو
طبعا الموتور 1600 ب 115 حصان مع استهلاك بنزين معقول جدا حوالى 6.5 لتر لكل 100 كيلو
بالنسبة الماتور تقريبا مالوش صوت , وانت مدور العربية على السلانسيه مش حتسمع صوتوه نهائي سواء كنت فاتح الشباك او قفلته
ده يرجع ان العزل بتاع العربية كويس جدا
حوض الماتور منظم ومنسق وكل حاجة مرتبة فى مكانها مفيش اى سلك معدى يمين ولا مال وكل حاجة متغطية ,, حوض الماتور واسع وده بيسهل الصيانات ,, وكمان الماتور مترحل عن صدر العربية بمسافة كويسة اوى
طبعا صاج العربية تثيل وقوى وحسيت انه محمل اكتر من اى عربية تانية من نفس الفئة ولو كان كل العربيات الجديدة صاجها ضعيف فعلا ,, بس انا كان مهم جدا بالنسبالى الصاج يكون قوى شوية ,, زمان كنا بنروح للسمكرى عشان العربية اتخبطت ,,, دلوقتى بقيت تروح للسمكرى عشان حد سند على العربية ف اتطبقت ,, ومتهيالى ان الصاج بتاع الاليزيه فعلا حيستحمل وانه احسن فى جميع الاحوال من كل اللى موجود
واضح طبعا الوسع الداخلى للعربية سواء فى المقصورة الامامية او الخلفية ,, والكنبة الخلفية تعتبر واسعة طولا وعرضا ,,وكمان الشنطة واسعة جدا
زراير المرايات الكهرباء , و الشنطة وم عارف الباقى بصراحة ,, بس شكلهم لذيذ يعننى
العدادات ومؤشرات ديجتال وبصراحة العدادات شكلها جميل
الابواب واماكن التخزين
للاسف موجود بس فى الفئة الاكسكلوسيف ,, مدخل usb , aux
التحكم فى ارتفاع كرسى السائق
مفاتيح الزجاج الخلفى
فتح تانك البنزين
.................................................. .................................................. .................................................. ....................
اهم حاجة فى الموضوع بقى ,, الاسئلة الشائعة او الافكار الشائعة
طبعا انا اى حد قولتلوه انى حجيب ستروين ,, رد تقريبا كان واحد ,,
* هات عربية ليك وللسوق ,
* قطع الغيار غالية
* قطع الغيار مش حتكون متوفرة
* صيانتها صعبة
* مفيش ميكانيكى حيعرف يشتغل فيها
* مش حتعرف تبيعها وسعرها حيقع
انا بس عايز ارد على كل نقطة من دول ببعض العقلانية و التفكير المنطقى
هات عربية ليك وللسوق
ماهو المشكلة انى حدفع فلوس وانا اللى حدفعها لوحدى والسوق م حيدفع معايا حاجة ,, يبقى من حقى انى اختار عربية استمتع وانا راكبها ,, م ابقى جايب العربية ودافع مبلغ وقدره وعارف ان فيه احسن منها بسعر اقل عشان السوق
وبعدين السوق ليه معيار واحد ,, عربية نضيفة وعربية مش نضيفة
.........
مش حتعرف تبيعها وسعرها حيقع
ما هو انا بترى عربية زيرو اصلا عان م عايز ابيعها دلوقتى ولو كنت بفكر فى البيع قبل ما اترى وعايز عربية سنتين ولا تلاتة ما كنت جبت اى حاجة مستعملة وخلصت ,, ولكنى جايب عربية حتقعد معايا فترة على الاقل 5 او 6 سنين ,, يبقى افكر ليه فى البيع
وكمان اى عربية زيرو بتتباع طبعا بتخسر وبتخسر كتير مهما كان ماركتها ولا سوقها
وبرده حقول ان اللى بيفصل فى بيع العربية هو حالتها
........
قطع الغيار غالية ,, قطع الغيار مش متوفرة
هو انا عايز اعرف فين العربية اللى موجودة دلوقتى قطع غيارها م غالية ,, ولو حنقارن قطع غيار الاوربى دلوقتى بالكورى والصينى حتى حنلاقى الاسعار بتاعت الاوربى ارخص بمراحل
وبعدين انا هنا لما اترى قطعة غيار غالية شوية ,,بس عارف انى حشتريها وانساها تماما ,, وده انا فعلا جربته مع عربيتى الحالية ,, يعنى استثمار على المدى الطويل ,, قطع غيار بسعر اغلى وعمر اطول
مش حتكون متوفرة
لا ان اء الله حتكون متوفرة ,, لان العربية مجاتش كدة من الهوا ,, فيه توكيل ورا العربية , وفيه تجار قطع غيار حيجيبوا حجتها , وفيه بدايل لقطع الغيار وخصوصا ان العربية نازلة فى دول المغرب العربى والصين و بعض دول اوربا وروسيا ,, ف العربية بتتسوق على مستوى كبير من العالم ,, وده اكيد حيديها انتشار وتوفر قطع الغيار
........
مفيش ميكانيكى حيعرف يشتغل فيها
اصلا انا مستحيل اخلى ميكانيكى يمد ايده فيها ولو هو ايه ,, على الاقل مركز صيانة فيه مهندسين ده طبعا بعد التوكيل .. فهو الحمد لله ان مفيش ميكانيكى يعرف يشتغل فيها ,, ديه ميزة م عيب يعنى
التوكيل اضمن ,, خصوصا فى عربية تكنولجيا متطورة زى ديه
.......
صيانتها صعبة
زيها يعنى زى اى عربية موجودة دلوقتى ,, وليها توكيل فيه ناس متدربين على صيانتها وانا مش عايز اكتر من كدة
.................................................. .................................................. .................................................. ...................
وان شاء الله انا متوقع ان العربية حتنتشر جدا ,, سعرها تنافسى جدا ,, وهى تستاهل اكتر من سعرها كمان ,, ولو كل واحد ساب التفكير بتاع السوق وقطع الغيار ده ,, حيلاقى ان ديه افضل عربية فى فئتها
وان شاء الله كل اللى حاجزين يستلموا على خير وفى اقرب وقت
المفضلات