الموضوع: مقترح مروري للخناقات الدائمة في الشوارع الداخلية

تعريف المشكلة :

أحد أهم مشاكل المرور في معظم أحياء القاهرة هي الشوارع الداخلية .. يعني مش الرئيسية ، كل الشوارع الداخلية اصبح الركن فيها يمين وشمال علشان كتر عدد العربيات.. وبالتالي اصبح المكان المتاح لمرور العربيات في الشوارع الداخلية يكفي عربية واحدة فقط (ما هو صعب اوي يكون فيه شارع داخلي يكفي 4 عربيات 2 راكنين يمين وشمال و2 ماشيين في النص) ..وهنا ظهرت المشكلة الرهيبة... وهي عربية في و ش عربية وكل واحدة وراها طابور وتبدأ الخناقات والذي منه... ويبدأ ولاد الحلال يتدخلوا ...وتعال انت ورا شوية.. وارجع يا بيه شوية ..على ما يتحل الاختناق في 5 دقايق أو ربع ساعة أو اكتر أو أقل .


حل المشكلة :


حل المشكلة هو تحويل جميع الشوارع الداخلية في كل الأحياء التي تعاني من تلك المشكلة الى اتجاه واحد وبالتالي الشوارع هتحتاج 3 عربيات فقط واحدة راكنة يمين وواحدة شمال وواحدة ماشية في النص في اتجاه واحد ، والموضوع ده مطبق بالفعل في احياء كتير.


انما المشكلة الحقيقية ان مفيش اي حد بيلتزم بتطبيق الاتجاه الواحد في الشوارع الداخلية نهائي.


المطلوب :

يجب ارغام الناس على الالتزام بالاتجاه الواحد في الشوارع الداخلية .

اقتراحي السابق للحل:


كان وضع موانع حديدية (دبابيس) من اللي بتخرم الكاوتش لو حد داس عليها في الاتجاه الغلط واللي ماشي صح بيعدي فوقها عادي

وعيب هذا الاقتراح ان الحديد هيتسرق بالتأكيد.


الاقتراح الجديد للحل :


تعيين عساكر (ولو أفراد أمن مدنيين بمرتبات تسدد من قيمة تحصيل المخالفات) ويكون لهم سلطة عمل مخالفة للي يصر على الدخول في الاتجاه العكسي


فوائد هذا الحل : راحة البال الشديدة للناس لما تضمن انها تدخل شارع داخلي من غير ما يلاقي حد في وشه ولازم يرجع او يرجعه

توفير فرص عمل لقطاع كبير من الناس

المشاركة الأصلية كتبت بواسطة loai-omar

والله الحل دا كويس جدا جدا

بس المشكلة في الشعب المصري انه واخد الحياه بالدراع و الفهلوه

ما هو للأسف علشان الشعب واخد الحياة بالدراع والفهلوة انا قلت ان فيه بالفعل شوارع داخلية كتيرة جدا محدد لها اتجاه واحد انما مفيش حد بيلتزم بكده نهائي

وبالتالي الحل زي ما عملوا في قانون المرور الجديد ان الالتزام مش اختيار ده اجبار ويبقى نشوف طريقة مناسبة للآجبار ده