ايداع فلوس في البنك بأسم المعرض

**ahmed88salama** · 14-05-2013 07:26 PM

اذا سمحتم يا جماعة عاوز اشتري عربية لانوس هل أودع الفلوس في البنك بأسم المعرض ولا اديله شيك احسن ولا اعمل ايه الصح ارجو الافادة ؟؟؟؟؟؟؟؟؟

**kagawa** · 14-05-2013 07:35 PM

سؤال غريب قوي ...
بين الشاري والبايع يفتح الله .. واربط (الحمار) لامواخذه العربيه مكان مايحب صاحبها

افرض صاحب المعرض قالك هات الفلوس هنا و العربيه اهه خدها
هاتقول له.. لا.. لما اسال الاول في المنتدي احطهم لك في البنك ؟
..

..

**ahmed88salama** · 14-05-2013 07:48 PM

شكرا يا باشا علي الرد بس انا لما كنت في المعرض من يومين بتاع منصور قالي حطهم في حسابي في البنك وهاتلي الايصال بس انا مش عارف هل ده صح ولا أعمله شيك خصوصا انا مش عاوز امشي بالمبلغ ده في الشارع

**aymanshebl** · 14-05-2013 08:21 PM

المشاركة الأصلية كتبت بواسطة ahmed88salama

اذا سمحتم يا جماعة عاوز اشتري عربية لانوس هل أودع الفلوس في البنك بأسم المعرض ولا اديله شيك احسن ولا اعمل ايه الصح ارجو الافادة ؟؟؟؟؟؟؟؟؟

بص هو الاحسن انك تودع الفلوس فى حسابه فى البنك و يكون معاك ايصال التحويل الى حسابه علشان تضمن حقك و الاهم ان المعرض يكون كبير و موثوق فيه جدا علشان تعمل كده انما الشيك فا مش عارف الصراحة مدى امانه فى الموضوع ده و طبعا لو الفلوس كاش يبقى احسن سلم و استلم لكن الواحد اليومين دول بقى الحرامية اكتر فئة فى الشعب دلوقتى!!!.

**malibuchevy** · 14-05-2013 08:22 PM

طبعا متمشيش بفلوس في الشارع عربيه زيرو يعني بنتكلم في 100 الف وطالع افرض لا قدر الله اتسرقوا

اديله شيك افضل او لو فلوسك في البنك حيكون الموضوع سهل يعني من غير ما تسحب حاجه

اطلب انك تحولهم لحساب المعرض وخلاص

**aymanshebl** · 14-05-2013 08:25 PM

المشاركة الأصلية كتبت بواسطة kagawa

سؤال غريب قوي ...
بين الشاري والبايع يفتح الله .. واربط (الحمار) لامواخذه العربيه مكان مايحب صاحبها

افرض صاحب المعرض قالك هات الفلوس هنا و العربيه اهه خدها
هاتقول له.. لا.. لما اسال الاول في المنتدي احطهم لك في البنك ؟
..

..

فى المعارض الكبيرة بيبقى عنده خيارات كتيرة مثل الدفع نقدا او بشيك او بالتقسيط بانظمته المختلفة او ايداع بنكى مافيش شروط او قيود لنظام الدفع

**kazamodia** · 14-05-2013 09:27 PM

اشتري من معرض كبير

انا اول مرة اسمع تحويل الفلوس لحساب المعرض ده

**أحمد كمال** · 14-05-2013 11:01 PM

انا اخر مرة اشتريت عربية في مصر اشتريتها بشيك مقبول الدفع

**Salamonti** · 15-05-2013 12:58 PM

حضرتك لو أودعت المبلغ في البنك تبقا الفلوس دي خلاص بتاعته ومفيش أي حاجة تلزمه انه يديك سلعة مقابل الفلوس دي حتى لو وصل الأمر للمحاكم فانت قانونا ملكش عنده حاجة..

السؤال هنا بقا..
افرض سيادتك حطيت الفلوس في البنك ورحت تستلم العربية
لقيت العربية معيوبة ولا مخبوطة ولا مخربشة ولا مش عاجباك
هاتزعل طبعا وترفض تستلمها وتطلب انها تتبدل بواحدة تانية مش كده ؟
طب لو قاللك هي دي الموجودة لو عاجباك على كده خدها مش عاجباك ملكش عندنا حاجة هاتعمل ايه ؟!

مهما كان المعرض أو المكان كبير وموثوق فيه فالحرص واجب برضه
هو ممكن ماينصبش عليك ويسلمك العربية فعلا لكن تبقا انت تحت ضرسه وتضطر تقبل بحاجة معيوبة احسن من مفيش !!