صيانة ال١٢٠ ألف - فيرنا ١٥٠٠
السلام عليكم يا رجالة الهيونداي
بعد توفيق ربنا لي اتوفقت في عربية فيرنا ٢٠٠٦ عاملة ١٢٠ ألف من ٣ أيام .. المهم قلت اروح فين اروح فين , لقيت كل الناس هنا في المنتدى بيقولوا المهندس هاني .. خدت النمرة و كلمته و خدت ميعاد , و طبعا وصلت في ميعادي بالضبط ( اتاخرت ساعة و نص بس ) ... بعد الاستقبال كشفنا على العربية .. العربية محتاجة شغل في العفشة بس خلينا في المهم و هو الصيانة .. غيرنا سيور خارجي ( تكييف - دينامو - باور ) و سير كاتينة و بلية كاتينة و تيل أمامي و بوجيهات و فلتر هواء و فلتر بنزين .. الليلة اتكلفت ٦٢٥ جنيه من عند أوتو عمرو كله أصلي بس السيور الخارجي كوري ... اللي عايز أقوله للناس اللي متعرفش المهندس هاني و مركز سبيد سيرفيس إني مافيش مرة في حياتي دخلت ورشة و طلعت مقتنع بالناس اللي فيها غير المرة دي .. نفس شغل التوكيل بس من غير الغلطات بتاعت التوكيل و طبعا المصنعية سعرها لا يقارن .. العربية شمت نفسها أخيرا بس إن شاء الله لسة لما العفشة و المساعدين يتظبطوا هقول لكم الأسعار ..
هدور على الفاتورة و اعرفكم الأسعار بالتفصيل إن شاء الله
و شكرا لشباب المنتدى إنهم عرفوني على سبيد كار سيرفيس :)
