الموضوع: قوة الفرامل و علاقتها بملء الكاوتشات بالهواء او النيتروجين-مناقشة

المشاركة الأصلية كتبت بواسطة magdyazab

أنا حصل معايا نفس المشكلة غيرت كل كاوتش العربية بنيتروجين واتأكد أن الراجل فضا كل الهوا من الكاوتش بالفاكيوم و بعدين ملئ النيتروجين وبعد ما مشيت عند أول اشارة كنت هالبس بسبب أني دوست فرامل بس العربية ما مسكتش كويس و ابدأت ألاحظها لقيت فعلا الحاجة الغربية على العربية أني مليت نيتروجين والفرامل ضعفت أوي رحت راجع تاني يوم للمحل وفضيت اليتروجين ومليت هوا تاني لقيت الفرامل رجعت لحالتها وبقت كويسة....
فعلا تجربتي مع النيتروجين كانت مأثرة على الفرامل بشكل كبير مع أن العفشة كانت أحسن بالنيتروجين بس الفرامل أولي من العفشة طبعا :-)

المشاركة الأصلية كتبت بواسطة AHMED1718

الحوار ده انا لاحظته ف عربيتى
تقريبا انا مكنتش مقتنع بالنيتروجين طالما الكاوتش خد هوا قبل كده
لغايط ماجت فرصة انى غيرت الككاوتش قريب وبدأته بنيتروجين
فعلا حسيت نفس احساسك ان الفرامل مش زى زمان رغم ان الكاوتش زيرو والاى بي اس بيشتغل كتير
بس فضيت وعملت هوا الاى بي اس مشتغلش ولا مرة ف نفس الظروف
افترضت ف الاخر مايلى
مش المفروض الكاوتش لما حرارته بتزيد بيزيد التماسك بينه وبين الارض
طب النيتروجين من مميزاته ان حرارته مش بتزيد فبالتالى الفردة هتفضل باردة
يعنى التماسك هيبقا اقل من الطبيعي
يعنى علشان احافظ على الكاوتش واخليه ميتاكل من الاجناب وشوية مزايا اخرى على المدى الطويل كويسة اقلل من كفائة الفرملة !!!
بس الحوار ده علمنى حاجة علشان كده فضلت مخليه نيتروجين
علشان انا من هواة الكبس والفرامل مش بتستعمل عندى غير ف الضرورة
فدلوقتى علشان عارف الفرامل مش زى زمان فبقيت احافظ على مسافة كويسة بينى وبين اللى قدامى ،،
ودمتم شموعا

المشاركة الأصلية كتبت بواسطة M.Ayman

طيب يعني مش انا لوحدي بقي علي كده لان الموضوع ده لاحظته في عربيتي القديمه بس اتعودت عليه ... انما في العربيه بتاعت اخويا حاسس ان الوضع اسوأ تقريبا هشوف لو في اخد هوا من الفرامل لان المشكله ان الدواسه بتبقي تحت شويتين لو منفعش يبقي هغير هوا بقي و خلاص ان شاء الله و متشكر جدا يا جماعه

طيب علشان بس بعض الاراء اللى شفتها هنا احب أوضح ان فائدة النيتروجين هى انه معدل تمدده اقل من الهواء ... وان الهواء اصلاً فيه 75% نيتروجين تقريباً والباقى غازات اخرى
فلما يكون اغلب الغاز اللى فى الكاوتش غاز لا يتمدد بسهولة مع الحرارة ... ده اكيد بيحافظ على ان الكاوتش ميكونش معرض للانفجار نتيجة للضغط العالى المتولد بسبب الحرارة مقارنتاً بالهواء العادى اللى بيتمدد اكتر لوجود نسب اخرى من الغازات زى الاكسجين وثانى اكسيد الكاربون وبخار الميه اللى بيكون معدل تمددهم اكبر

يعنى ملئ الكاوتش بالنيتروجين = امان لان الكاوتش هيظل كما هو الـ 30 psi هيزيدوا مع الحرارة لكن بمعدل بسيط
اما الكاوتش مملوء بالهواء = تمدد زيادة مع الحرارة والاحتكاك فهيوصل الـ 30 الى 35 او اكتر وممكن توصل الفردة لضغط يقارب الحد الاقصى للتحمل المكتوبة عليه وده طبعاً خطر

اما موضوع ان الكاوتش بيزيد تماسكه مع الحرارة ... فبيكون فقط مع الكاوتشات الرياضية بتاعت السباقات اللى المفروض انها تتسخن لان بتكون كفائتها عالية فى درجات حرارة معينة

ودلوقتى أصبح اجبارى على ما اعتقد وضع النيتروجين اثناء السباقات للاسباب اللى ذكرتها