TEST DRIVE : PASSAT 2007
1600CC 12000KM HP102 PRICE=230.000

يا هادي....نظرة اولى:
الواد صاحبي الله يعمر بيته مالوش في البدنجان :mrgreen: :mrgreen: يدفع و بس!!! والله انا بتعجب!!!
الواحد بيقعد يعزق في نفسه و يهري و ينكت سنة علشان يطللع من جيبه ال80 وللا ال100 الف بلبل ويدفعهم في عربية ممكن تكون كمان مستعملة....والباشا اشتراها بطريقة ثأيل الندمان (محمد صبحي في تخاريف) :اشتنيه!!! يمكن يغلوا بعد كده يا قرني!! والله حاجة تموت من الضحك :mrgreen: :mrgreen: ده انا بقوله :معمولة فين دي؟؟؟ قاللي:الماني تقريبا :roll:
الطم يا جدعان؟؟؟الواد ده هايجنني!!! لدرجة النني اضطريت اقلب في الكاتالوج في عز الضلمة علشان اعرف كام سي سي!!

العربية عموما شكلا رهيبة..ارتفاع محترم عن الارض..طاسات 16" :shock: وده من الحاجات اللي صدمتني للغاية...لكنه قالي انا ال BASE LINE يعني اول واحدة في سلم الاوتوماتيك...و رغم كده تعتبراضافة هايلة للسيارة نظرا لعدم وجود اي واحد تانية في الفئة دي الSTANDERD بتاعها كده...الاضائة الامامية مبهرة...معالجات النيكل قليلة لكن شيك...المفتاح شيك...واظاهر ان المفاتيح العادة دي هاتتليغي قريب...والشعب كله هيقديها ريموتات :mrgreen: :mrgreen:
التصميم انسيابي جميل و مقدمة توحي بالعظمة والقوة وان كنت اعيب على المصممين التشابه الغريب بينها و بين الجيتتا!!! وانا نفسي اجد احيانا صعوبة بالغة احيانا في التفرقة بين الاتنين...و مش فاهم صراحة الفكرة في الموضوع ده...
افتح واركب...واسعة مووت و كبيرة موت...والقعدة بقت احسن واريح...تابلوه مريح...الدركسيون معجبنيش...عادي قوي...كله تاتش (تكييف و كاسيت) خامات جيدة ولا ترقي لمستوى BMW مثلا...و مستوى الفخامة معقول و التقفيل فوق الممتاز...و مستوي الرؤية فعال للغاية...حسساسات مطر..و اضاءة...واحلى ميزة الهاند بريك الاليكتروني...مفيش عصاية و الكلام ده...انسي...زرار يا باشا...و ممكن هية كمان تنزل الهاند بريك لمما سعادتك تكون على الN و ترفعه تاني لمما تمشي... :shock: :shock: اللي يعيش ياما يشوف :D :D
العزل تمام جدا....والازاز معمول علشان يمنع الاضاءة المباشرة...وبالتالي سخونة الكابينة

الاداء:
زفت قوي قوي...ولا يمكن وصفه بأقل من كده....و مينفعش يدفع فيها المبلغ ده...1600سي سي على الجاموسة دي ازاي والنبي :shock: :shock: من0 ال100 في 13 ثانية لييييييييه :shock: :shock: هوة انا سايق كارو؟؟؟
102حصان؟؟ ده وزن العربية لوحده بالحماية اللي فيها و الجنوط 16" مينفعش في نظري انها تكون اقل من 1800 ان لم تكن2000!!!!بس بجد حاجة مش مفهومة....عموما لغاية 100 شلل و شوية كمان لل 150...و زق زوبة زقة :mrgreen:
اخر زوبة 185 تقريبا....والثبات اكثر من هايل...وخسارة والله الABS وانظمة الاتزان اللي فيها دي على الموتور المعفن ده..الكيك اون والاستبترونيك ولا الموتور هنا يا ريس..و مع التكييف حدث ولاحرج....تعبانة....والتكييف بيأثر عليها بشكل ملحوظ و هوة نفسه مش قوي و توزيع الهوا مش حلو قوي...(الناس اللي كانت ورا كانت عايزة هوا)
القدرة على المناورة كانت معقولة نظرا للحجم الكبير للسيارة...و استجابة الفرامل ممتازة جدا جدا....

نقطة سيئة:
قضيت رحلات كتيرة قبل كده مع واحد صاحبي ببولو...والتوكيل حاصل على جائزة اسوأ توكيل فيكي يا بلد.....و قطع الغيار ناااااااااااااار.....وان كانت مش فارقة مع اخينا الفكهاني. :mrgreen: :mrgreen: ..

نقطة ظريفة:
استهلاك بنزين منخفض...و يقابله العزم التعبان....


الخلاصة:
العربية ظلمها موتورها تماما...و كان ممكن تكون مانيوال بالسعة دي لكن اوتوماتيك...اشك...شبيهة بالجيتتا (و في نظري الجيتتا اشيك من برة) وارخص جيتا ب (و محدش ياخد باله :D )165000؟؟؟؟
اوصي للعربية لجدو اللي مش بيفكر يشد والكلام ده.....يمشي و بس....
بدائل اخرى....BMW316i...JETTA : HIGH LINE

مستني الردود والأستفسارات....وادعولي ربنا يفتحها في وشي و اجيب بقى :D :D

و طبعا.................يا باسط :mrgreen: :mrgreen: