السلام عليكم
ياجماعة أنا باسأل سؤال بجد : هل فيه أى مركز خدمة أو ورشة متخصصة بتكشف ع العفشة بسكانر أو أى جهاز يحدد العيوب بدقة وبدون تدخل العنصر البشرى ؟
الواحد زهق من عفشجية مصر بصراحة.. من 5 شهور كان حايتنصب عليا من عفشجى شهير فى الجيزة وكتبت عن قصتى معاه... المهم ظبطت العربية فى توب جير وتمام
من حوالى شهر لبست كذا مطب على سرعات فى بلدنا الموكوسة سواء على طريق كورنيش المعادى أو الصحراوى أو حتى كوبرى أكتوبر.. المهم المطبات كانت على كذا يوم وفى كل مرة الحمدلله ربنا يستر ومايحصلش تسريب سوائل ولا حاجة ..بس من بعدها باحس على فترات متقطعة بحاجة زى "زقزقة" أو "تزييق" وأنا ماشى بتروح وتيجى مش مستمرة
المهم رحت ل 3 عفشجية..واحد وصفهولى صحابى واتنين من اللى بيتقال فيهم شعر فى المنتدى هنا .. التلاتة بصراحة محترمين وتحس انهم فاهمين والزحمة عليهم طوابير..بس ولا واحد قال نفس كلام التانى ...بصوا معايا :
الأولانى : المساعد اليمين قدام عايز يتغير (طبعا لازم التانى معاه) وجلب المقصات مبوشة
التانى : المساعدين اللى قدام زى الفل مشكلتك فى المساعدين الخلفى ..المقصا ت وجلبها زى الفل
التالت : ال 4 مساعدين تمام والمقصات تمام ..مشكلتك فى بارات الدركسيون وأتياش الميزان
طب أنا دلوقتى أسمع كلام مين فيهم ؟ خايف ألعب فى العفشة غلط وتفتح بقها معايا
عشان كده لو حد جرب فعلا جهاز لتحديد عيوب العفشة ياريت يدلنى عليه مشكورا.