الإخوة الأعزاء ...

بعد التحية ...

من اسبوعين كده اتسرق مفتاح العربية بريموت الإنذار !!!

وطبعاً كان الحل ساعتها إني أغير جهاز الإنذار وكوالين العربية كلها !!!

بالتشاور مع بعض الأصدقاء وصلنا إننا نغير جهاز الإنذار فقط ونبقي على الكوالين زي ما هي , على أساس إن الإنذار حيفصل الدوارة حتى لو بالمفتاح الأصلي طالما لم تغلق الإنذار .

انتقلنا لتحديد نوع جهاز الانذار ..

الترشيح الأول كان spy two way وأنا شخصياً مبحبش ريموته خالص ... بالإضافة إلى إن لي كذا حد معرفة الريموت اللي بشاشة باظ واصبح الجهاز زيه زي العادي ...

وكمان أنا كنت عايز أجيب نفس الريموت بتاع العربية .. بالريموت ده



الريموت بتاع العربية كان متوفر في الاسباي العادي one way والوولف والسيمفوني ...

توكلت على الله وركبت ال spy one way بتاع شركة غريب لأن ده اللي كان غبور منزل العربية بيه ومازال !!! , وكمان الريموت زايد عليه زرار للوضع الصامت كمان !!!
وسعر الجهاز 180 جنيه ..

مميزات الجهاز واللي أصريت إن الكهربائي بتاعي يشغلها كلها :

- غلق السنتر اتواتيكياً عند الضغط على زر القفل مع صوت السرينة مرة واحدة وإضاء لمبات الإنتظار مرة واحدة .

- فتح السنتر اتوماتيكياً عند الضغط على زر الفتح مع صوت السرينة مرتين وإضاءة الإنتظار مرتين .
- فتح الشنطة من الريموت ودي كانت عامله مشكلة إن الشنطة عندي واخده كهرباء وإشارة الجهاز سالب واضطرينا نحط كتاوت .
- القفل والفتح بدون صوت السرينة ( صامت ) ولكن طبعاً لو تعرضت العربية للخطر السرينة تعمل عادي جداً .
- ال shock sensor يمكن ضبطه على الحساسية المطلوبة .
- فصل الدوارة في حالة تعرض العربية للخطر ( بتفصل المارش ) .
- السنتر بيقفل بعد 15 ثانية من الدوارة مع أول ضغطة فرامل .
- لمبات اإنتظار تعمل لو فتحت أي باب من الأبواب .
- تقدر تقفل وتفتح السنتر من ريموت العربية لو المفتاح راكب في العربية .
- امكانية برمجة حتى 4 ريموتات جديدة .
- لو نزلت من العربية ونسيت تقفل الإنذار لمبات الانتظار تومض 3 مرات للتذكير .
- فيه مانع للخطف ( التثبيت ) كود معين يخلي الانذار يشتغل والعربية دايرة وبعد 15 ثانية الموتور يطفي .
- امكانية البحث عن السيارة بالصوت عن طريق تشغيل السريتة وإضاءة لمبات الإنتظار بشكل متقتطع .
- إمكانية البحث عن السيار عن طريق وميض لمبات الإنتظار فقط .
- غلق نوافذ السيارة اتوماتيكيا لو ركبت روافع , والميزة إن روافع السباي بترفع نافذة تلو الأخرى .
- مدى الريموت أكثر من 100 متر في المناطق المفتوحة .

الحمد لله تم التركيب وتجربة الخصائص وكله تمام ... ودي خريطة التركيب ..




وخليت الكهربائي يركب السرينة الجديدة مع القديمة بقى صوت الإنذار محترم ويخض كده !!!

اللي يزعل إن الجهاز صناعة صيني والقديم كان تايواني !!!

وأنا بشتري الجهاز كان فيه منه اللي الريموت بتاعه الشكل ده ..



وكمان سعره أرخص !!!
ولقيت نفس الريموت ده بيتباع عند محلات المفاتيح المتخصصة وممكن يعدلك الشفرة على الريموت بتاعك ويعملك مفتاح جديد عليه وسعره يعمل في حدود 100 جنيه !!!
تحياتي ...