الموضوع: من المهندسين لمدينة نصر

بصى يا ستى

حيث ان عملى فى المهندسين وسكنى فى مدينة نصلا فهديلك كل البدائل المتاحة ومدى صلاحيتها

1- كوبرى اكتوبر من المهندسين الى مدينة نصر، ممتاز فيما عدا من 4 مساء الى 7 مساء

2-كوبرى اكتوبر من المهندسين الى نزلة شارع اول رمسيس(نزلة ميدان التحرير اللى بعد نزله عبد المنعم رياض ب 50 متر فقط قبل مطلع عبد المنعمر رياض، ثم اول يمين بعد النزلة مباشرة فى شارع معروف وحتى الوصول الى طلعت حرب ، نقطع شارع طلعت حرب بالعرض فى اقصر مسافة ممكنة وندخل يسارا فى ممر بهلر(مدخله بعد مخرج شارع معروف بحوالى 50 متر) الى شارع قصر النيل، طوالى حتى ميدان مصطفى كامل، ممكن نكمل طوالى بعد ميدان مصطفى كامل الى نهاية الشارع فيسارا الى ميدان الاوبرا ثم يمينا الى نفق الأزهر، وممكن ندخل يسار فى ميدان مصطفى كامل فى اول يمين شارع عبد الخالق ثروت ثم طوالى الى نفق الأزهر عبر ميدان الأوبرا، بعد الخروج من نفق الأزهر طوالى فى صلاح سالىم الى اى مدخل من مداخل مدينة نصر(ده طرقى المفضل فى معظم الوقت لما بلاقى مطلع كوبى اكتوبر من المهندسين فاضى)

3- من شارع الدقى يسارا فى شارع التحرير حتى ميدان شراتون القاهرة، ثم عبر كوبرى الجلاء الى شارع التحرير بالجزيرة، ثم عبر كوبرى قصر النيل الى ميدان التحرير، من ميدان التحرير ممكن ناخذ شارع طلعت حرب حتى ميدان طلعت حرب ثم يمينا فى شارع قصر النيل ونكمل من شارع قصر النيل كما فى الوصفة رقم 2، او ممكن من شارع طلعت حرب ندخل فى شارع(معرفش اسمه بس هو بيدوى على ميدان باب اللوق، عموما الشارع ده وشارع طلعت حرب هم المخرجين اللى كل الناس اللى خارجة من ميدان التحرير بتخرج منهم، وهو المخرج اللى قبل طلعت حرب مباشرة ودايما بيحصل اشتباك مرورى فى الحتة دى بين العربيات الللى داخلة باب اللوق واللى داخلة طلعت حرب) المهم بنكمل طوالى زى ما احنا، ونعدى ميدان باب اللوق وبعدي ندخل يسار فى شارع محمد فريد وحتى ميدان مصطفى كامل ثم نكمل كما بالوصفة رقم 2

4- ممكن ناخد شارع الدقى الى نهايته وحتى حديقة الأورمان، ثم ندخل يسارا مع سور حديقة الاورمان حتى شارع مراد امام مديرية امن الجيزة، ندخل يمين فى شارع مراد مسافة بسيطة حتى ميدان حديقة الحيوانات، ندخل مع الميدان يمين الى كوبرى الجامعة، طوالى فى الكوبرى الى المنيل، طوالى زى ما احنا مع اتجاه السيارات حتى كوبرى المنيل الصغير امام القصر العينى الفرنساوى،بعد عبور كوبرى المنيل الصغير قدامنا حلين، الحل الاول طوالى زى ما احنا ، نعدى تقاطع شارع القصر العينى ، ونكمل طوالى زى ما احنا، هنلاقى قدامنا كوبرى ابو الريش نطلعه وننزل منه بعد كوبرى ابو الريش نكمل زى ما احنا ماشيين، الطريق هيتحول الى مطلع نكمل معاه لحد ما يخلص وهيلف يمين نلف يمين معاه بدون الدخول فى اى طرق فرعية، نكمل معاه لحد ما نلاقى الطريق خلص ووصلنا لطريق مجرى العيون(مجرى العيون بذات نفسه هيبقى فى وشنا، ناخد شمال مع مجرى العيون ونكمل معاه لحد اشارة المرور، نعدى الاشارة وناخد شمال فى شارع صلاح سالم لحد كوبرى السيدة عائشة ، نطلع الكوبرى وننزله ونكمل مع صلاح سالم لحد ما نخلص منطقة القلعة ونقابل اللى خارجين من نفق الأزهر ونكمل لحد اى مدخل من مداخل مدينة نصر، الحل التانى بعد عبور كوبرىالمنيل الصغير ندخل يمين مع كورنيش النيل لحد ميدان فم الخليج(هنلاقى اول سور مجرى العيون هناك، ندخل شمال ونطلع كوبرى فم الخليج وننزله ونكمل مع طريق مجرى العيون وصلاح سالم وكوبرى السيده عائشة كما بالوصفة اعلاه)(ده طريقى المفضل لما بيكون مطلع كوبرى اكتوبر واقف)

5- الى ميدان لبنان ثم محور 26 يوليو حتى تقاطع الدائرى ، ناخد يمين فى مدخل الدائرى اللى قبل ما نوصل لكوبرى الدائرى المار فوق المحور(اتجاه قليوب وطريق مصر اسكندرية الزراعى)وبعدين بلاد تشلينا وبلاد تحطنا لحد مخرج طريق السويس فى اتجاه مصر الجديدة، ننزل فى طريق السويس لحد تقاطعه مع اوتستراد مدينة نصر(اول كوبرى هنعدى من تحتيه بعد دخولنا فى طريق السويس، وناخد يوتيرن ونرجع وندخل يمين مع منزل الكوبرى الى الاتوتستراد لحد رابعة العدوية، لكن لا انصح بهذا الطريق نهائيا، اولا لأن الداخل فيه مفقود والخارج منه مولود بسبب عربيات النقل، ثانيا لأنه اكتر من 50 كيلومتر، ثالثا لأن وقفة الكماين بتاعته اسوا من وقفة كوبرى اكتوبر مليون مرة

فيه شوية طرق تانية، بس الطرق من 2 لحد 4 هى افضل الحلول

شوفي يا اخت علا
من ميدان لبنان تاخدي الطريق طوالى لحد كوبري 15 مايو وعندك بعدها 3 اختيارات:

1 - قبل مطلع الكوبري تخشي يمين عند نادي الزمالك وتكملي على طول - هيقابلك الملف بتاع احمد عرابي وجامعة الدول - تخشي جامعة الدول وتعملى يوتيرن وتكملى تحت كوبري 15 مايو لحد دخلة العجوزة وتخشي يمين - تكملي في الشارع ده على طول (هتعدي مستشفى الشرطة ومطعم نعمة) بعدها بشوية هتلاقي مطلع كوبري اكتوبر

2 - اطلعى كوبري 15 مايو وانزلى اول نزلة يمين (بس مش بتاعت الزمالك) هتلاقي نفسك على الكورنيش - تفضلي مكملة على طول لحد متلاقي سور النادي الاهلى - تخشي شمال لحد اخر الشارع هتلاقي نفسك قدام النيل (الفرع التاني) تخشي شمال وهتلاقي مطلع كوبري اكتوبر)

3 - متنزليش النزلة الاولانية وكملي على طول - لحد متلاقي فندق الماريوت - بعديه بشوية هتلاقي نزلة التحرير يمين - تكملي فيها لحد ماتوصلي ميدان عبد المنعم رياض - تخشي شمال (بس خللي بالك في طريقين واحد مطلع كوبري - وده عشان تروحي رمسيس - والتاني تكملي فيه وتخشي شمال وهتلاقي مطلع كوبري اكتوبر)

افضل الحلول من رأيي هوه الاختيار رقم 3
والله الموفق

رامي (ابو احمد و يوسف)

بصي يا علا
تكملي في كوبري 15 مايو طوالي هتلاقي مسؤح البالون على يمينك - بعديه هتلاقي نزلة يمين (الحل رقم 2 ) وفيه نزلة على طول (منزل يعني) ويافطة مكتوب عليها الزمالك - انت تكملي طوالي - هتلاقي الطريق بيلف يمين - تفضلي مكملة لغاية ما هتلاقي على يمينك فندق ماريوت (لونه سيمون) تكملي برضه على طول لحد ما هتلاقي نزلتين :
يمين - وده هيبقى موازي للنيل - تعدي على وزارة الخارجية والتليفزيون لحد عبد المنعم رياض
على طول - وده تروحي منه على الوكالة شارع الجلاء
واي خدمة يا سيتي

رامي (ابو احمد و يوسف)

بقه اكتوبر موجود وتسألى على حاجه تانية اكتوبر لو فاضى ربع ساعه بالكتير تكونى فى رابعه حرام اللفات التانية دى هى اللى هتبهدلك عربيتك كلنا نصحناكى باكتوبر