تنظيف الصدأ من دوره التبريد ؟؟؟ ايه الحل

**mahmoud85** · 17-05-2013 11:10 PM

السلام عليكم ورحمه الله
اسف اذا كان الموضوع مكرر او اتسال قبل كده
انا عربيتي لانسر 2008 1600
ربنا يسامح المالك السابق كان بيحطلها مياه حنفيه وهي ماشيه 76000
دلوقتي بلاقي صدا في القربه ولما فكيت الخرطوم العلوي بتاع الرديتير لقيته مليان صدا ومرسب علي الخرطوم من جوه وكمان فيه في الردياتير صدا مرسب علي الجوانب
حاولت افك الترموستات لقيته صعب لان المسامير قافشه فهروح للميكانيكي يفكه
دلوقتي انا عاوز انضف كل الصدا اللي جوه الدوره من غير ما افك الردياتير لان حتي لو فكيته هيفضل جوه المكنه صدا مترسب
فيه ناس بتستخدم جاز او زيت فرامل لمده عشر دقايق وينزلو كل المياه ويحطو مياه نضيفه
انا مستخسر احط جركن مياه الموبيل ابو 85 جنيه علي كل الصدا ده
ياتري فيه مشكله لو حطيت جاز او زيت فرامل ؟ وايه المشكله هل فيه جوانات او وصلات كاوتش هتبوظ لو حطيت الكلام ده لمده عشر دقايق ؟

ملحوظه استخدمت الفلاش او مزيل الصدا الابرو الامريكي ومافيش فايده برضو

**buddha** · 17-05-2013 11:24 PM

ملح الليمون من عند العطار
روح لبتاع ردياتير واعمل دورة بملح الليمون
وبينزل المية كلها بعد كدة ويعمل دورة تنضيف تانية بمياة عادية
وينزلها
وبعدين املى الدورة مياة خضراء

بالتوفيق

**emad_2020** · 17-05-2013 11:32 PM

فعلا روح لحد بتاع ردياتير يعملك دورة غسيل

**MohammedAladel** · 17-05-2013 11:38 PM

لو المسمار دا مش فى مكان جنبه بلاستيك أو تقدر تحوش أى حاجة بلاستيك ( خرطوم كهرباء مثلا من جنبه ) .... هتجيب ولاعة سخان صغيرة بس تكون كويسة وتسخن المسمار دا شوية حلوين وتفك هيجى معاك إن شاء الله .... ممكن تستعين بمية نار بس تجيب حقنة صغير وتملاها نص مللى مية نار وتنقط بالراحة بين المسمار والحديد اللى راكب فيه (أهم حاجة متنزلش على أى جزء من أجزاء السيارة )

بالنسبة للرادياتير المصدى .... أنا مش عارف أذا كان فيه منظفات تقدر تجليه فعلا بالكامل من الصدأ ولا لأ لأنى مجربتش
بس لو الصدأ مطلعش منه .... غيره مفيهاش كلام

بس من وجهة نظرى أن فك الرادياتير هيكون أفضل عشان تشوف حالته قبل وبعد التنظيف هل فيه تحسن ولا لأ ؟

بس انت تعمل الآتى :
هتفضى المياه اللى عندك كلها
هتزود مياه مقطرة وتاخد هواء لدورة التبريد وبعدين تضيف المنظف اللى هتستخدمه أيا كان نوعه ( لأن فيه ناس فى المنتدى بيستعملوا الخل وملح الليمون وبيقولوا بيعمل معاهم الواجب )
وتتبع تعليمات المكتوبة على نوع المنظف من حيث أنك تمشى بالعربية أو تدورها قد إيه على السلانيسه
بعدين تنزل المياه دى وتحط مياه مقطرة تانى وتحط منظف تانى وتكرر العملية السابقة

بعدين تفك الرادياتير شوف النتيجة وصلت لإيه ؟ هيبان قوى على حواف المداخل والمخارج بتاع الرادياتير

عشان كدا بقول لك فك الرادياتير عشان تشوف كويس فتحات الموتور والرادياتير وتشوف وصلت لحد فين

لو مجبش نتيجة غير الرادياتير

وحاجة كمان فك ثرموثتات الكوعة لو عرفت تنظفه من الصدأ يبقى خير لو معرفتش غيره هو كمان ... وشوف حالة المواسير الكاوتش اللى واصلة بين الرادياتير والمحرك

**MohammedAladel** · 17-05-2013 11:41 PM

جاز وزيت فرامل 100 لاااااااااااا .... انت متعرفش الجاز وزيت الفرامل دول ممكن يأثروا على الجوان ؟؟؟

**Elawany13** · 17-05-2013 11:41 PM

المشكلة مش فى الرداتير
الرداتير مش هوه اللى بيصدى
المشكلة ان المواسير الحديد بتكون مصدية
والصدأ ده بيتراكم فى الرداتير والخراطيم

انا عندى نفس مشكلتلك وعملت كل حاجه ومفيش فايده
لما بغسل دورة التبريد وبحط ميه خضرا بعد شهر ولا اتنين بلاقى الصدأ ظهر تانى
اشتريت جركن موبيل واستخسرت احطه ورجعته تانى
وبضطر كل 3 أو 4 شهور اغير ميه دورة التبريد وعلشان كده بجيب ميه رخيصة بس مضمونة من شركة مصر للبترول الجركن بـ 19 جنيه ... أو من شركة اسكندرية للمنظفات ادكو

**tarekzein** · 17-05-2013 11:53 PM

خد بالك بس من حاجه مهمة
ملح الليمون أو أى إضافات تانيه ممكن تأثر على طرمبه الميه
أو الطبب والجوانات

يعنى يعد الغسيل لااااااااازم تعمل حسابك فى حاجه من دول

عشان متزعلش بعد كده وتقول ياريتنى

الصدأ برغم مشاكله لكن بيسد الفراغات فى مكانه

وعملية الغسيل بتحركه من مكانه وبتعمل مشاكل

**MohammedAladel** · 17-05-2013 11:56 PM

عربية 2008 آه بس عربيها قلبها مصدى .... وبعدين أنك تفك الرادياتير عشان تصلح عربيتك ....إيه الغلط فى كدا ....أنا مش عايز أفك الرادياتير عشان بس شوية المياه اللى هينزلوا خسارة هههههههههههه ..... بس لما أبقى جاهز وآجى أغير المياه بالتأكيد هفك الرادياتير والمروحة وأطلعهم برا خالص عشان أشوف إيه الوضع عندى برغم أن عربيتى بتستخدم مياه خضراء فقط

لما بتفك الشئ بتعرف هو شغال أزاى أكتر بس لازم تعرف نظرى الأول وبعدين تشوف فيديوهات وتراجع كتالوج الأصلاحات بتاع عربتيك

هتعمل شغل توكيلات .... لأ أحسن بشوية من التوكيل