صاحب نيسان ينادي ... هل تسمعني "بوضوح" ؟؟
بسم الله الرحمن الرحيم
يارب تكونوا بخير جميعاً ياشباب ... ويجعل أيامكم كلها خير ورخاء
المرة دي مش باكتب عن حاجة في العربية ... حبيت اوضح حاجة ممكن ماتكونش واضحة لكتير من الناس في مجال التواصل على المواقع , منتديات أو تعليقات أخبار أو تعليقات تحت الفيديوز أو تواصل اجتماعي ومحادثة ....
1- مش كل الناس عندها القدرة على التعبير بدقة ووضوح عن كل ما يقصدونه ... فيه احتمالية كبيرة جداً لسوء الفهم ...خصوصاً لو ماكانش الطرف المتلقي للمعلومة على قدر عال من التفهم.
2- بقالي حوالي 15 سنة باستعمل الإنترنت ... ومن أول لحظة كنت باتواصل مع الناس واعرف أساليبهم في الحوار واكتشفت خلال المدة الطويلة دي ان ممكن تلاقي الكلام المكتوب مختلف تماماً عن اللي يقصده الشخص اللي قدامك ... وكمان تختلف تعبيرات وشه عن الصورة اللي انت متخيله عليها حالياً !!! :N_no[1]:
3- كل ما كان الموقع اللي انت داخل عليه بيقدم معلومات وأخبار ومنوعات لشريحة كبيرة جداً من البشر كل ماهاتزيد الفجوة بين تفكيرهم ومقاصدهم ... يعني موقع إخباري شهير هايتلقى عدد مهول من المشاركات اللي مافيش واحدة منهم زي التانية ... موقع تواصل اجتماعي هايتلقى مشاركات متناقضة ... موقع يوتيوب هايتلقى شتايم ورسايل سخرية ... كل مكان بيطغى عليه سلوك أغلبية اللي داخلين لغرض ما في أنفسهم
4- بمعنى أصح : لما نكون على موقع هدفه مساعدة الناس في مجال السيارات في قسم مخصوص لماركة سيارات معينة ... المفروض يكون كل اللي داخلين عليه يندرجوا تحت فئة من الفئات التالية :
الفئة الأولى : شخص مالك للسيارة , بيحبها أو بيكرهها , داخل يعرف معلومات عنها أو يحل مشكلة خاصة بيها أو يستفيد من تجارب وخبرات ملاك العربيات من نفس نوع عربيته
الفئة التانية: شخص باحث عن شراء سيارة من نفس النوع وداخل عايز يعرف أخبار العربية من تجارب ملاكها , وعنده أسئلة كتير في دماغه عايزلها إجابات منطقية وبيدور عليها في المكان الصحيح اللي هو القسم المخصوص لماركة العربية الفلانية
الفئة التالتة: واحد بيحب الماركة دي ومعجب بيها وبيتابع كل أخبارها ... من حقه يدخل ويتكلم ويتحاور مع كل المهتمين بيها سواءً مالكين أو معجبين زيه
أفهم من كل الكلام ده ان ماحدش هايدخل هنا علشان تعليق مالهوش لازمة أو يقول رأيه السياسي في خبر معين أو يجرح في حد ويسعى في الإساءة إليه ... كل اللي داخلين هنا هدفهم المصلحة , سواءً المصلحة الشخصية الخاصة بعربيتك , وده مش عيب لأنك عايز الخير لنفسك من غير ماتضر الناس
أو المصلحة العامة من خلال إفادتك للناس بخبراتك وازاي عرفت تحل مشاكل عربيتك لما ظهرت
أو علشان تقول رأيك في موديل معين من ماركة معينة , وده حقك ورأيك الشخصي ومش هايخص حد غيرك وكمان ساعات ممكن مايهمش أي حد غيرك , لكن من حقك التعبير عنه طالما في حدود اللياقة وأصول الكلام
اللي ميز قسم نيسان خصوصاً , هو ان معظم الناس اللي داخلين بيندرجوا تحت الـ 3 فئات السابق ذكرهم فوق , وده خلى جو التعامل والكلام جو ودود ومحترم والواحد دايماً بيحب يدخل يتكلم ويعرف طالما معاه الوقت متوافر ... لأنه ضامن انه مش هايلاقي اشتباكات حادة بين الناس وبعضها
اللي عايز اقوله كمان ان كل الخلافات اللي الواحد شافها هنا قديماً أو حديثاً , لو رجعنا وشفنا إيه اللي أشعلها هانفاجأ انه كان فهم خاطئ وتفسير مش صحيح لكلام حد من الناس , أدى لرد فعل خاطئ ومش صحيح بالتبعية ...
يعني أرجو كل واحد بيقرأ الكلام ده انه يفكر كذا مرة قبل ما يحط رد على كلام هو - من وجهة نظره - بيعتبره خطأ في حقه , لأن ممكن الشخص التاني مايكونش في باله أساساً الإساءة أو تقليل القيمة , الناس هنا كلهم (ومتعمد اقول كلهم علشان "القلة المندسة" ماتزيدش عن 1%) داخلين عايزين مصلحة بعض ومحترمين ... وكل واحد له حياة وشغل وأسرة وبيت وسيارة متكاملين وبيدور على وسيلة علشان يفضلوا مترابطين ... ماحدش هنا داخل يكسر ولا يخبط ولا يشتم ولا يهزأ ...
ولو حصل وحد دخل يعمل كدة (من القلة المندسة) , المفروض ماحدش يرد عليه ... ده التصرف المنتظر من كل الشباب هنا , الحياة أبسط بكتير من الأفكار اللي بتيجي في دماغ الواحد تجاه أشخاص انت شايف كلامهم لكن مش داري باللي يقصدوه في أنفسهم
ياريت مانسيبش مكان للخلافات تنشأ بيننا , ولا مكان للحساسيات تنمو جوة الصدور
وخلونا نفتكر آية جميلة من القرآن الكريم:
{ وَقُل لِعِبَادِي يَقُولُوا الَّتي هِيَ أَحسَنُ إِنَّ الشَّيطَانَ يَنزَغُ بَينَهُم إِنَّ الشَّيطَانَ كَانَ لِلإِنسَانِ عَدُوًّا مُبِينًا } (الإسراء 53).
