الموضوع: سواء كنت بائع او مشترى سيارة مستعملة فرجاء ادخل الموضوع لعلى نحد من عملية النصب هام

السلام عليكم
الموضوع مش هيخد قراءة منك اكثر من 5 دقايق بس فى افادة كبيرة
بعد كثرة عمليات النصب سواء من البائع او المشترى و بعد قرأت عدة موضيع عن عملية النصب وكى تتفداها فا لابد من اتباع الخطوات الاتية الاتية لعلى و عسى نحد من عملية النصب و هنا سنطرح الموضوع
و ان شاء الله الناس الموجودة فى المنتدى تستفاد و تحاول تنقل التجارب للاخونا الغير مشتركين فى المنتدى
ربنا يهدى

نبدأ
بسم الله
الموضوع هنا ينقسم الى قسمين و هما
القسم الاول البائع
القسم الثانى المشترى

نتكلم عن القسم الاول البائع

اولا الاتفاق على السعر و يكون الاتفاق نهائى من حيث القيمة السعرية

ثانيا تكون المقابلة فى الشهر العقارى

ثالثا تسلمه العربية مش بمعنى تديلو المفتاح العربية لالالالالا تقولو بص عليها و اتاكد من كل حاجة زى المعاينة السابقة

رابعا قفل عربيتك و بكرر المفتاح معاك وادخل الشهر العقارى و طبعا تكون مفاضيها من اى حاجة تخصك

خامسا يكون معاك اصل البطاقة و معاك اصل الرخصة او اصل التوكيل لو انتا شريها بتوكيل و هتبيع

سادسا امام الموظف بالشهر العقارى و قبل ما تسجل وتمضى فى الدفتر استلم فلوسك و عدها و تاكد انى هى سليمة و مش مضروبة و الكلام ده برضك للمشترى و يكون معاك عقد ابتدائى وصورة بطاقة المشترى

سابعا استلمت فلوسك سلمت المفتاح انتظر واخرج من الشهر العقارى بعد المشترى بنص ساعه او تلت ساعه و اولا ما تخرج تاخد تاكسى او يكون معاك زميل بعربيته ياخدك ده لو البلغ كبير علشان محدش يقطرك

ثامنا اتاكد انو يكون معاك عقد ابتائى و صورة بطاقة المشترى و نسخة من التوكيل من الشهر العقارى اتوكل على الله و مفيش مشاكل

القسم الثانى المشترى

اولا الاتفاق على السعر و يكون الاتفاق نهائى من حيث القيمة السعرية وادى لنفسك يومين مش تخلص على طول وخليك واثق انى لو ليك نصيب ربتا هيكرمك بيها

ثانيا تتاكد من البائع هو نفسه مالك العربية بمعنى عن طريق البطاقة و مطابقة الرخصة او التوكيل يكون الاسم واحد و اطلب منه البطاقة متتكسفش

ثالثا و انتا ماسك الرخصة اعرف المرور التابع ليها ايه و رقم العربية واسم مالك العربية (هام جدا)
معاك ورقة و قلم بعد ما تسيب البائع اكتب الاسم و المرور و رقم العربية علشان متنساش

رابعا روح المرور التابع ليه العربية و قول للموظف عاوز اتاكد من البيانات دى هل هى صحيحة و له
لالالالا محدش يقولى لازم بالرخصة انا عاوز اتاكد لانى هشتريها مفيش دقيقة من على الكمبيوتر هيقولك تمام المشوار ده يا جماعه بيفرق و الله

خامسا مطابقة رقم الشاسيه و رقم الموتور ورقم اللوحة المعدنية علشان القصص دى متنساش تتاكد

سادسا تكون المقابلة فى الشهر العقارى و له عربون و له الكلام الفاضى ده و له تدفع مليم الراجل البائع يقولك عربون قولو انا هخلص سلم و استلم لو مش عاوز تبيع خلاص

سابعا اتاكد انى كل ورق البائع مستوفاه اصل البطاقة اصل الرخصة اصل التوكيل لو هو مشتريه من حد بتوكيل و بيان مخلفات علشان لو عليها حاجة تخصم

ثامنا لو العربية اللى هتشتريها بتوكيل سياتك هتسجلو فى نفس الشهر العقارى الصادر منه التوكيل علشان لو مضروب هما هيعرفوووووو بكل سهولة تيبقى انتا فى التمام

تاسعا عاوز يكتب عقد ابتدائى فا ده حق البائع مش عاوز برحته يكون معاك واحد صحبك واقف جنب العربية الراجل خد فلوسه انزل خد العربية و صحبك و امشى

يا جماعه ملحوظة اخيرة بالنسبة للبائع و المشترى ياريت نكتب سعر العربية الحقيقى علشان ميكونش فى مجال للعب
يعنى لو العربية 10000 يكتب 10000 او 1500000 اكتب 1500000
علشان اللعب
مثال
عارف ازاى انا جيت هشترى منك عربية 100000 جنيه البائع قالك لالالالالا سجلها 40000 الف جنيه انتا توفر الفرق ده فى الشهر العقارى و القصة دى لمصلحتك و الفلم ده حصل مشكلة لا قدر الله حبيت ترجع العربية حبيت ترفع قضية على البائع هيتحكملك بالمبلغ المكتوب مش المدفوع خلو بالكم من النقطة دى كويس


و بالموضوع ده تخرج برة قصة الشرط الجزائى و الفلم ده لانى فيها للعب كتير
على سبيل المثال
البائع قالك حط شرط جزائى 5000 جنيه و العربية ثمنها 10000 ليه ان شاء الله تيجى ترجعها تلاقى نص الفلوس راح فى الهوا
المشترى قاللك 1000 جنيه و العربية ثمنها 150000او 90000 ممكن يدوس على العربية شهر و يطلع عين العربية و يبهدلها و يجى يرجع العربية هتقولو اية فى شرط جزائى يقولك مفيش مشكلة لانى عمل بيها اكتر من 1000 جنية تيبقى انتا كده كده بهدلت العربية
و المده الشرط الجائى لا تزيد عن اسبوع




كده انا انتهيت

انتا ممكن تقول اية انا هعمل كل الخطوات دى هقول لسياتك اهدى عليا و ما تتعصبش
حضرتك الموضوع سهل جدا و تتعب فى الاول احسن ما تتعب فى الاخر لا قدر الله
بمعنى لو انتا البائع عارف اية اكتر حاجة ممكن تخسرها فى القصة دى لو المشترى طلع معاك نصاب 3 للتر بنزين و عطلة ساعتين و حرقة دم بس هقولك انزل على اى قهوة اشرب واحد لليمون بس لو هتيجى تبصلها من زاوية تانية هتلاقى حاجات لاتذكر لو لاقدر الله اتنصب عليك

او انتا المشترى هتقولى اروح المرور و اسال واروح الشهر العقارى التابع ليه التوكيل افرض فى محافظة تانية هقولك و الله مشوار تتعب فى مرة احسن ما تتعب من العربية على طول
بردك لو لاقدر الله خسرة هتخسر حاجات لا تذكر و ترجع تقول الحمد لله على كل شىء

هرجع و قول الحرص يا جماعه و عن الطريق الكلام المكتوب ده انا اقدر اقول كده انتا قفلة كل ثغرات النصب عليك سواء بائع او مشترى
معليش الموضوع طويل انا عارف بس حبيت اشرح كل حاجة باستفاضه كامله علشان كل واحد و عقليته و انا حابب الموضوع ده يوصل لكل انسان

وحال البلد ينصلح امين يارب العالمين

وربنا يهدى
تحياتى لكم بالتوفيق

م / احمد سيد
منسق قسم سكودا

تسلم ايدك يابشهمندس على المعلومات دى لان النصب اليومين دول بقى كتير جدا وربنا يسترها