بما ان فيه هنا تشريد للعربيات ..فأنا هقيم الاكسنت اللي معايا :lol:
موديل 2006 الشكل القديم تقفيل طبعا عمو غبور
الشكل يعتبر عادي و مافيهاش اي افتكاسات طبعا من الخارج...بالنسبه لتقيمي هيكون مش حلو اوي بالنسبه كمان انها تقفيل مصري
الصاج طبعا الكل عارف ورق و رشينه دوكو....يعني البيبان عندي فيها تعاريج من غير تخبيط يادوبك تلاقي حد بيسند علي الباب...اما الاكصدامات فهي نازله من المصنع مالزوقه بأمير...ده مره واحد بفسبه لمس الكصدام راح اتخلع..
اول ما تفتح الباب و تدخل تحس ان فيه نوع من الفراغ شويه بس مش زي ال 128 :lol:
الحياه جوه كلها بلاستيك في بلاستيك و كأنك قاعد في بيت باربي و كمان الجربان ....تبلوه شكله عادي بس هي الحاجه الوحيده اللي حسيت انه الفرق الجوهري اللي بنها و بين ال 128 ...نور ايــــــه ...شايف كل الارقام بتاعت الكيلومتر تحفه يعني :lol: ..
نيجي بقي للتشغيل...اغرب عربيه جديده تشغلها....لازم توعد شويه علشان تشتغل و كأن المارش بايظ ...بس ماعلينا من ديه...بعد التسخين الممل نبدء بقي نطلع القطط الفطسه....اولا هي عربيه هابله من ناحيه السواقه يعني لو طول عمرك بتسوق عربيه واحده و جيت سوقت الاكسنت هتلاقيها عبيطه اوي و سهل جدا الرؤيه فيها و ابعادها برضوا عبيطه...
نيجي بقي علي صوت الموتور و فيه حاجه غريبه و ده لاحظته في معظم الهيونداي....تحس ان الموتور خفيف و سلس بس فيه حاجه في زوره و كأنه بيرغرغ بس بصوت واطي.....بس ده تحس بيه و انتا بتكبس مش و انتا مثبت علي سرعه ...
نيجي بقي للقاعده الكراسي ناشفه و كانك قاعد علي مصطبه ..تيجي بقي علي دواسه البنزين ...مكانها غريب ..لازم تعوج رجليك شويه لأن فيه مقب اللي تحت التبلوه بس طالع زياده ...بس لما تتعود مش هتحس بيها بس لو افتكرتها حتي لو بتسوق العربيه ديه سنين هتحس انك مش عالرف تدوس بنزين :lol:
الاحساس بقي و انت ماشي ....معظم البنأدمين تحب تمسك الدريكسيون بأيد و تسند الايد التانيه علي الشباك....هنا بقي غلط في الاكسنت ممنوع تعمل الحركه ديه ...و ده بيرجه الي الفراغ اللي بيحسسك انك راكب عربيه خشب ...لما تيجي توحط ايدك تلاقي الشباك بعيـــــــــد و ايدك متشعلقه ذي اللايده مكسوره....و ده برضه بيرجع نسبيا الي الفخامه و البراح :lol:
نمشي بقي في السكه ...شوارع داخليه و ماشي بطيء و تيجي تلف تحس ان العربيه ماشيه علي عفشه خشب و سوست خشب ...مافيش اي نوع من السلاسه ....امال بقي علي الطريق
الفتيس تحس انه هيتخلع منك ...و بيعمل صوت طرقعه غريبه ...مش فاهم لحد دلوقتي ايه الفكره من كده...السحب بتاعها طبيعي نوعا ما بس صوت مش مريح خالص يعتبر عالي ....الفرامل بتاعتها ضعيفه و مبتسعفش الواحد في الاوقات الحرجه
نيجي بقي علي طريق سريع شويه ....و كأنك راكب مراجيح المولد....(مش بقولكم عفشه خشب) يبان اوي علي السرعه ....احلي تنطيط...و ده يرضه لنوع من الرفاهيه ..بأنك راكب عربيه و في نفس الوقت بتفرفش عيالك و بتمرجحهم ورا .....نيجي بقي تلف كده لفه نص كم علي كوبري مثلا... ايه بتجري علي ثمانيــــــــن ...تلاقي العربيه راحت رفعت الكاوتش اللي ورا سنه ....ده بجد مش هزار
يعني اقصي حاجه جبتها كانت حوالي 160 كم ...و لو فيه شويه تعاريج تلاقي العربيه اعدت تطوح و تعمل حاجات غريبه...
بالنسبه العربيه من واره فتعتبر ضيقه...لأن في حته فوق الكاوتش فمضيقه الكنبه من الجناب..اما التكيف لما تشغله تحس انك شديت فرامل اليد .....

انا اسف علي هذا التقرير لطريقتي الممله في التقيم ..و ان شاء الله بكره هتعلم و هاكتب ذي زيزو و بشمهندس سبعاوي :