الموضوع: احذروا إسكندرية الزراعي - طريق الموت

المشاركة الأصلية كتبت بواسطة احمد المصرى

العيب فى الداخليه ولا فى الاخوان



المفروض ان الداخليه تشتغل فى اى وقت تشتغل مع الشرعيه وخلاص مهما كان الحاكم لانها بتشتغل للشعب مش للحاكم

تقريبا الداخليه اتربت على صنم مبارك
اكادميه مبارك لامن مبارك

المشاركة الأصلية كتبت بواسطة evo

اضطرتني الظروف اني أمشي على الطريق ده امبارح وحابب انقل. تجربه مريره توضح مدى ما وصلنا إليه من همجيه وإنعدام أمني

في البداية الطريق ماهو إلا غابة البقاء فيها للاقوى
غابة مليئة بالمخاطر في كل شبر فيه إما من ناس بتعدي بلا أي مبالاه أو حتى إلي ماشيين بالمواشي والكارو في نهر الطريق أو التكاتك إلي بتمرح فيه في أي إتجاه و- خصوصاً العكسي
ناهيك عن سيطرة الميكروباصات إلي زي الثيران المطلوقة وسط العربيات وعربيات النصف نقل إلي ماشيين يقولوا شكل للبيع
كل دة كوم الآتي كوم

فجأه لقيت بيجو 7 راكب فيها 4 شكلهم مش ولا بد نهائي ميلت علي ... بعدت وفي اعتقادي انها كسرة عادية من كسرات شعبنا العظيم
شوية و ظهروا تاني المره دي زنقوا علي بعنف و واحد بيشاور ويجعر أقف و مصممين انهم يزنقوني في جانب الطريق
فلت منهم بعد محاولات مفيش داعي لسرد احداثها كان بسببها الطريق كله هيلبس في بعضه والغريب إن محدش كلف نفسه يقف أو حتى يهدي أمام محاولة التثبيت العلنيه دي والغريب و الحمد لله انهم مضربوش علي نار
المصيبة اني بعد ما فلت منهم بعد القليوبية بشويه فضلت أدور على نقطة مرور أو شرطة على الطريق مفيش ولا حتى عسكري واحد ولا حتى عربية دورية للتأمين زي باقي الدول المحترمه
ويمكن ده سبب جراتهم انهم يعملوا كده في طريق زراعي في وضح النهار. الرجاء أخذ الحذر .

الطريق دة ممتاز ممتاز ممتاز
حضرتك بس الى مش متعود عليه
انا بعتبرة رالى الفراعنه وبطير عليه 140-180----واعيش
والرجاله الى فى البيجو دول كانوا عاوزين سيجارة وحضرتك فهمت غلط
والمطبات دى اختبار للعفشه والفرامل والقدرة على المناورة
دة احلى حاجه فيه انك تقعد تخيط الميكروباسات الى ماشيه 140 والنص نقل وتحرق دمهم
ويا سلام لو لقيت جرار قاطع الطريق او جاموسه بتعدى
هنا بقه يبان السواق الصح ودى تحكمه فى العربيه
وهل هيستعمل فرامل ولا هيعتمد على المناورة
شوف الصح انك تنزل بالسرعه وفى اخر لحظه تعمل مناورة صغيرة وتفادى الجاموسه او الجرار انته ورزقك بقه
ولو كان توتتوك متعبروش اصلا لانه بيفادى نفسه تلقائى

ربنا يسترها علينا جميعا