تقرير بسيط عن تركيب سنترلوك وانزار وكاسيت للماروتي

**HHALAWANY** · 19-05-2013 12:14 PM

صباح الخير لأصدقائي في المنتدى ونسور السوزوكي

امبارح انا روحت للتوكيل عشان خاطر يظبطلي كهربة العربية والديبرياج
والحمدلله مافيش اي حاجة اتظبتط بعد ما طلعو عيني كالعادة وفي نفس الوقت اخروني على الفاضي

قلت بقا يا واد يا حسام ،"يقطع التوكيل وسنينه"
انا هاعمل كل حاجتي براه

ما علينا ...
كلمت واحد صاحبي عشان طلبت معايا اركب سنترلوك وانزار وهو كان بيشكرلي في واحد ورا سور نادي الترسانة ..
فعلا قابلته ورحت سألته على انواع الانزارات اللي عنده لاقيت اللي عنده كله "صيني"
قلت بقا يالا مابيدهاش مش طالبة معايا الف وادور وخلاص قفلت معايا اركبه وخاصتا ان اتأخرت على الموضوع ده ... ده غير قلة وقتي وقلت بقا مابدهاش .. عرضلي كذا نوع اخترت منهم نوع اسمه
CODE ALARM .. وده في اوبشن فصل للكتاوت لو العربية اتفحت من الباب مش من الريموت ..
وانا خليته مايعليش الحساس قوي "متضطر" عشان خاطر بركن العربية جنب قطر وفي بنهم سووور ... فكل شوية هايضرب الانظار ّّ
وطبعا خلهولي يضرب بس في حالة لو حد فتح الباب بأيده مش بالريموت ..
وده ثمنه 300 جنيه بالتركيب

وبالنسبة للسنتر لوك قالي هاركبلك "كوبرا" وثمنه 150 جنيه بالتركيب
طبعا قلتله مش لازم يبقو نفس النوع .. قالي مهما نفس الشركة والاتنين من مكان واحد
قلت اشطة بقا .. شوف شغلك يا باشا

المهم الراجل وهو شغال زقزقت معايا وقلت بالمرة اركب كاسيت
سألت على الانواع لاقيت البايونير والسوني والكينوود وبلاك فوليوم

لاقيت ارخصهم البلاك فوليوم ده ، وقت اجيبه .. واللي شجعني اجيبه ان لاقيته هو نفس النوع اللي بيركبوه في التوكيل ده كمان اللي كان في التوكيل من غير سي دي وفلاشة بس واغلى كمان
انا جيبته بالسيدي وفلاشة وراديو طبعا وسعره كان 450 جنيه .. معقول
جبت طبعا عليهم سماعتين 500 وات بيضاوي 16 س ، تقريبا ، ب300 جنيه ونوعهم سوني اكسبلود
وركبتهم على الرف بتاع الشنطة من غير ماغيره .... ياللا بقا .. مش مهم

وجربت كله ، وكله تمام لحد دلوقتي والحمدلله .. والصوت كمان نقي وشغل الراجل بسم الله ما شاء الله كأنه مافيش حاجة اتلعب فيها

نسيت اقلكم اني ركبت الكاسيت جنب الساعة وشكله مش وحش طالع بره شوية عن الساعة بس مش اوووفر ياعني ... في النضافة برضه

بس انا حسيت وانا مشغل كشافات العربية وانا ماشي بالليل انهم ضعفوا شوية وانا مشغل الكاسيت
مش متأكد لسة هل ده بيحصل طبيعي ولا انا اللي كنت تعبااان ومش شايف كويس

وفي النهاية ... ان شاء الله خير ، وربنا يسترها
معلش بقا لو طولت عليكم

**dr.hazem** · 19-05-2013 03:45 PM

ألف مبروك وتسلم الايادي عالتقرير الجميل....
ومن زمان قلتلك سيبك من التوكيل اللي مبيجيش من وراه غير الهم...
تحياتي

Sent from my LT18i using Forum Runner

**mohamedhagrass** · 19-05-2013 05:57 PM

الف الف الف مبروووك
تقرير رائع وجميل
اخبار الصوت معاك ايه بقى وياريت لو فيه عينه
لاني عاوز اغير الكاسيت والسماعات والصوت بره العربيه برضو اخباره ايه
ولا هو واضح جوا العربيه بس

ونصيحه مني اعمل رف لسببين 1-الرف الي ورا الاصلي في الاول تمام وشويه وهيتكسر وده حصل معايا وكانوا سماعتين صيني مبالك لو مش صيني

2-الاداء والصوت بتاع السماعات هيختلف تماما تماما بعد الرف بشكل يبهرك والتكلفه 80 جنيه بالكتير بالرف وتنجيده
والف الف مبروك

**HHALAWANY** · 19-05-2013 08:55 PM

المشاركة الأصلية كتبت بواسطة mohamedhagrass

الف الف الف مبروووك
تقرير رائع وجميل
اخبار الصوت معاك ايه بقى وياريت لو فيه عينه
لاني عاوز اغير الكاسيت والسماعات والصوت بره العربيه برضو اخباره ايه
ولا هو واضح جوا العربيه بس

ونصيحه مني اعمل رف لسببين 1-الرف الي ورا الاصلي في الاول تمام وشويه وهيتكسر وده حصل معايا وكانوا سماعتين صيني مبالك لو مش صيني

2-الاداء والصوت بتاع السماعات هيختلف تماما تماما بعد الرف بشكل يبهرك والتكلفه 80 جنيه بالكتير بالرف وتنجيده
والف الف مبروك

الصوت بره العربية واضح الراجل جربه بفلاشة عنده وكان الصوت نضيف وبصراحة انا لسة ماجربتش الكاسيت بالاغاني بتاعتي لاني روحت ومكانشي معايا فلاشة ولسة مجبتش اخره ، لاكنه نضيف وصوته حلو كسماع مبدأي
موضوع تغيير الرف ده دلوقتي صعب ، خلي الرف الاصلي ياخد واقته وابقى اشوف موضوع الرف التاني ده ... اصل انا وقتي صعب اني اعرف اروح فيه مشاوير اخري نت مش اكتر :))
بس برضه مايمنعش تقولي اروح عند مين يعملهولي :) عشان انا ماعرفش

وشكرا ليك على نصايحك ومقترحاتك ليا
تسلم

**HHALAWANY** · 19-05-2013 08:56 PM

صحيح نسيت اقولكم ... ضمان السنتر والانزار 5 سنين من عند نفس الراجل

**S O P H O S** · 20-05-2013 01:00 AM

الف مبروك

**mohamedhagrass** · 20-05-2013 02:46 AM

المشاركة الأصلية كتبت بواسطة hhalawany

الصوت بره العربية واضح الراجل جربه بفلاشة عنده وكان الصوت نضيف وبصراحة انا لسة ماجربتش الكاسيت بالاغاني بتاعتي لاني روحت ومكانشي معايا فلاشة ولسة مجبتش اخره ، لاكنه نضيف وصوته حلو كسماع مبدأي
موضوع تغيير الرف ده دلوقتي صعب ، خلي الرف الاصلي ياخد واقته وابقى اشوف موضوع الرف التاني ده ... اصل انا وقتي صعب اني اعرف اروح فيه مشاوير اخري نت مش اكتر :))
بس برضه مايمنعش تقولي اروح عند مين يعملهولي :) عشان انا ماعرفش

وشكرا ليك على نصايحك ومقترحاتك ليا
تسلم

والله انا معرفش حد في القاهره يدوبك انا لسه ناقل القاهره من خمس شهور
انا كنت عامله في الزقازيق واتعمل كلو بالتنجيد في نص ساعه تقريبا بسي كنت حاجه
مخصوص لوحين فوق بعض عشان يقلل التحميل وكان سمك كبيير كدا مش فاكر كام بالظبط كنت عمله
بسي هو يشيل 4 سماعات مستريح من غير تقل عليها وممكن 6 كمان مستريح

**bondok20002002** · 20-05-2013 12:23 PM

مبروك ياباشا بس لو حبيت الصوت يبقى أحى شوية ممكن تعمل رف خشب ويكون مخدم على الشنطة والكنبة حتسمع أحلى بيز
والف مبروووووووووووووووووووووو ووك
تحياتى

**HHALAWANY** · 20-05-2013 02:04 PM

الله يبارك فيكم يا شباب شكرا على نصايحكم :)

-

الموضوع: تقرير بسيط عن تركيب سنترلوك وانزار وكاسيت للماروتي

LinkBack

أدوات الموضوع

عرض

تقرير بسيط عن تركيب سنترلوك وانزار وكاسيت للماروتي - انشر الموضوع فى :

-

-

-

-

-

-

-

المواضيع المتشابهه

تقرير عن تركيب رف للماروتي

تقرير تركيب 4 فرد كاوتش جديد gt اندونيسي للماروتي

تقرير تركيب ريداتير نحاس للماروتي

تقرير عن تركيب لمبات للماروتي

تركيب فلتر بنزين ثاني للماروتي...تقرير

الكلمات الدلالية لهذا الموضوع

المفضلات

المفضلات

ضوابط المشاركة