الجمال ولا النسب والعائله ..... ساعدونى !!!!

**BESO516** · 19-05-2013 12:43 PM

صباح الخير على الجميع
استأذن كل واحد فيكو ياريت يقرا الموضوع كله ويقولى رأيه وخبرته فالموضوع ده ايه لأنى بقالى يومين قاعد من الشغل ومحتااااااار مش عارف اعمل ايه

بأختصار انا شاب عندى 25 سنه السنه اللى فاتت حبيت وخطبت واحده ورتنى النجوم فعز الضهر بمعنى الكلمه كرهتنى فصنف الستات كله بمعنى اصح وبسببها كنت ممكن اموت اكتر من مره
علما انها كانت اقل منى فكل حاجه تعليم - عيله - مستوى - ........ الخ
لكن وبأمانه كانت جميله جدا ولا انجليا جولى (:

اهلى مكنوش موافقين على الأرتباط ده لكن قالولى دى حياتك وانت حر فيها اعمل اللى انت شايفه صح واحنا علينا النصيحه والمساعده وفعلا احسن شقه واحسن شبكه وانا عن نفسى مكونتش احلم بأكتر من كده
لكنى حبيتها جدا جدا وارتبطت بيها اوى وعملتلها كل اللى بتحلم بيه وفالأخر بعتنى وراحت اتخطبت بعد ماسبتنى بأسبوع :(
دخلت فحاله اكتئاب جااامد جدا وحلفت بعدها انى مش هرتبط تانى بواحده تلعب بيا وتتسلى

المهم رجعت تانى تكلمنى ( بعد مااتخطبت ) وتحكيلى عن مشاكلها هى وخطيبها وانها مش مرتاحه وكده بس مش هتقدر تسيبه

طبعا انا بالنسبه لها عارفه نقطه ضعفى انها هى وانى بكلمه منها اقدر ارجعلها وانسى كرامتى ورجولتى وانى مش ممكن اامن لها بيتى وعرضى وارمى كله ورا ضهرى

بس كنت بسمع منها وبطنش خااااااااالص وكل ده وهى مخطوبه والباشا نايم على ودانه لأنه طبعا فاكرها ميته فحبه
وجيت قطعت معاها خالص مره واحده بعد مااصرت اننا نتقابل وقولتلها مينفعش يبقى فى كلام بينا ولا حتى على سبيل الصداقه والأخوه اللى انتى بتحكى فيهم لأنى عندى اخت وكمان خطيبك ملهوش ذنب حرااام كده انتى غاويه تلعبى بالى حواليكى ومعندكيش دم ولا احساس وبجد انا ندمان فيوم انى عرفتك ( وطبعا من ورا قلبى لأن لسه بحبها )

لحد هنا الموضوع اتقفل من شهر تقريبا

والدتى جت قالتلى انا عندى ليك عروسه ولازم تشوفها ( كنت رافض اكتر من 20 مره كذا عروسه تجيبها والدتى او اى حد )
بعد الحاح وزن شديييييييييييد جدا وافقت

حددوا معاد وروحنا اتقابلنا فمكان عام بحضور والدتها
طبعا انا اول ماشفتها اتصدمت صدمه عمرى
هى مش وحشه ولا حلوه بس عاديه عاديه اوى شكلا ( زيى كده بس انا راجل عادى )
وطبعا صوره خطيبتى الأولى مش مفرقانى
المهم قولت عدى ياليله
اتكلمت معاها وعجبنى دماغها وتفكيرها جدا بصراحه
وعرفت انها بتحافظ على صلاتها وست بيت ومتربيه وباين من كلامها فعلا
نيجى للعيله والنسب اللى طبعا سألت عليهم قبل مااتحرك
والدها لواء شرطه
والدتها موجهه فى التربيه والتعليم
اختها بطله رياضيه فى الجودو بتلعب فالأهلى
اخوها من الأوائل على الثانويه العامه السنه اللى فاتت وناشىء فى فريق وادى دجله
هى لسه بتدرس فأكاديميه كبيره ولها اسم
بقيت عيلتهم مراكز تشرف بجد دكاتره ومهندسين واساتذه جامعات

والدى ووالدتى موافقين ومرحبيييييييييييين جدا بطريقه كبيره

هما موافقين عليا وحصل من عندهم قبول ناحيتى وكله تمام

الكل بقى مستنى رأيى انا وقاعد افكر وحاطط فدماغى صوره دى وصوره دى وبجد مش عارف اعمل ايه اتمم الموضوع واتكل على الله ولا اعمل ايه وخصوصا ان الأولى بقالها يومين بتحاول توصلى على الفيس بالرسايل والأكونتات الجديده اللى بتعملها

وانا خلالالالالالالالالالالالا ص تعبت
بصلى استخاره وبسئل كذا واحد قريب منى اعمل ايه وبجد فعلا مش عارف

**shady_hamdy** · 19-05-2013 12:52 PM

للاسف هى دة المعادلة الصعبة البنت الجميلةو خصوصا لو مستوها الاجتماعى كمان عالى هدوخك و هتتعب علشان تعرف تسيطر عليها لانها عارفة انها جميلة و البنت العادية هتريحك جداا لانها عارفة انها عادية

**No Comment** · 19-05-2013 12:53 PM

انا مبحبش اتدخل ابداً برأى فى المواضيع اللى زى دى لما بقرأها
رغم ان الواحد بيستفذ بطريقة فظيعة

لكن لو بتتكلم جد ... يبقى انت محتاج تتعالج مش محتاج رأى من حد

فيين المقارنة ... هاتولى مقارنـــــــــــــة
هيسب الناس بقى تكمل
ولا اقولك علشان ما ابقاش دخلت وخرجت بدون تعليق مفيد بالنسبالك

يذهب الجمال الشكلى بعد الزواج ... ويتبقى الدين والطباع والاصول والتربية

ربنا يوفقك لما فيه خير وصلاح لك ... على حسب نيتك

**أبو صلاح** · 19-05-2013 01:04 PM

ياباشا لو على الجمال مراكز التجميل مخلتش حاجة ومش حرام ده هتبقى مراتك

ابحث عن الاخلاق والاهل اولا

**ahmedalaahosny** · 19-05-2013 01:05 PM

من رايي المتواضع الاخلاق اولا طالما البنت دي مابتسيبش صلاة تبقي تمسح مية واحدة زي خطيبتك الاولانية وكمان التربية والذوق حاجات لايمكن تشتريها

**hossam_elwani** · 19-05-2013 01:10 PM

عايز رأيى انجز وتوكل على الله المعانى الحقيقيه فى صحة النسب والخلق وياسيدى بكره الجمال فيها كأنثى حيظهر فى بيتك وتتغير نظرتك ليها

**horas3000** · 19-05-2013 01:28 PM

خلينا كده ناخد الموضوع من ناحيه تانيه

المقارنه بين واحده اقل منك في المستوي الاجتماعي و المادي لا و ايه لعبيه و اخلاقها عليها علامات استفهام
بواحده بنت عيله و حسب و نسب زي ما بيقولوا و فوق كده احترام و اخلاق و دين و الاهم من كل ده تفكير متوافق معاك

فكر كده في وجهة النظر دي و قول انت هتختار مين تبقي شريكه حياتك و ام عيالك

**مزمار وحيد** · 19-05-2013 01:33 PM

أخي الحبيب
بما إنك صليت بطلب إستخارة الله فعليك الان ان تجعل الامور تسيير بشكل طبيعي وتعلم جيداً بداخلك أنك طلبت راي الله وعونه وتوفيقه فاي شىء سيحدث فى الموضوع سيكون هو الخير الذي أراده الله عز وجل لك وكمان حاول تكرر الاستخاره كل فتره إذا استطعت ، وبعد هذا التصرف المثالي عايز أبلغك رأي رجاله كتير وكمان شيوخ افاضل أصحاب علم وفقه أن الجميع متفق أن جميع النساء فى مسأئله الجمال الظاهر ليس بينهم اختلاف أبدا بعد الزواج ولكن عليك أن تنظر بعين المستقبل إن شاء الله هل ستكون شخصية الزوجة المنتظره وكذلك شخصيتك أنت مكملين لبعض وممكن تكون تفاصيل الحياة بينهم إزاى ويا ترى لما يكون في اولاد حنقدر مع بعض نربيهم بشكل يرضى الله وينفع المجتمع وبالتاكيد هناك أفكار واشكال كتير ممكن تتخيلها لشكل الحياة والمسئوليه حيكون إزاى

والله المستعان فلا حول ولا قوة إلا بالله العَلي العظيم