الموضوع: استشاره بخصوص تكييف اللانوس

المشاركة الأصلية كتبت بواسطة magdy gaafar

متابع
ياترى نفذت ولا لسه وايه النتيجة

والله لسا نظرا لضيق الوقت وبعض ظروف اخرى

المشاركة الأصلية كتبت بواسطة misho2008

بنسبة كبيرة التهريب بيبقى من البلف طريقة التغيير سهلة بس عايزة احترافية
هتفك البلف القديم بمفك البلوف بيتباع عند بتوع التكييفات وهتقفل الماسورة بصباعك عشان لو فية فريون ميطرش كلة وبسرعة وتركب البلف الجديد وتربطة وتبتدى تشحن
الموضوع سهل وانا جربيتة اكتر من مرة فعربيتى وعربياتى الاصدقاء

وانا في الخدمة

ربنا يبارك في حضرتك وجزاك الله خيراً

طارق باشا :) ربنا يباركلنا فيك والله لانك انسان ذوق وخدوم لأبعد الحدود , جزاك الله خيراً

انا لسا ماظبتش التكييف والله , بس انا قولت اسألكم الاول قبل ما اعمل اي حاجه لغايه لما ربنا يأذن , لاني كنت ناوي اظبط التكييف اليومين دول استكمالا لحمله الصيانه والتظبيط اللي بعملها :) بس اكتشفت ان الميزانيه اللي كنت راصدها اوشكت على النفاذ :) فقولت استنى شويه , خاصه ان ده تزامن مع ظروف اخرى فعشان كده أجلت الفكره شويه :)

جزاك الله كل خير على الشرح الوافى , وبإذن الله قبل ما اعمل اي حاجه اكيد هاقولك :) ربنا يبارك فيك يا استاذ طارق

المشاركة الأصلية كتبت بواسطة tarek_2005

ميهمكش الميزانية في اي شيئ
كلمني نحدد ميعاد وهعملهولك بميزانية لم ولن تتوقعها هههههههه

يا باشا ربنا يكرمك وكلك ذوق والله العظيم :)
الميزانيه بالنسبه لي مش هي العقبه الاساسيه :) في شويه حاجات تانيه بس تعدي على خير وهاظبط الدنيا بعدها

استاذ طارق انت رجل محترم :) وشكرا ليك يا باشا على كرمك وجدعنتك وكل حاجه

المشاركة الأصلية كتبت بواسطة tarek_2005

محمد بك الشامي

انتا وقعت في ملعبي ومحدش سمي عليك

اولاً ليا عتاب عليك
مكلمتنيش ليه اول محبيت تظبط التكيف (( مكنش العشم ))

ثانياً هخش في الموضوع

معلومات عن تكيف اللانوس

1 - شحنة الفريون
بالوزن 700 جم
بالضغط من 30 psi الي 47 psi حسب درجة حرارة الجو الذي يتم فيه عملية الشحن ودرجة الرطوبة وان يكون المحرك يعمل عند rpm 2000

لذا يفضل الشحن بالوزن لو ليس لديك الخبرة

2 - نوع الفريون

الفريون المستخدم في اللانوس والنوبيرا هوا r124 a
سيبك من الي يقلك دا امريكي ودا اسباني ودا مصري ودا صيني للاسباب التالية

مصر مبتعرفش تصنع فريون ولكن تعبئه فقط
مش هيفرق بلد الصنع لانه ليه مواصفات فنية عالمية تابعة لاتفقات دولية ومن الصعب جداً التحايل عليها


3 - اختبارات الدورة

بتم بكبس هواء في الدورة بالكامل علي ضغط 110 الي 150 psi وعمل اختبارات يدوية بماء وصبون علي جميع الوصلات واماكن ارتباط المواسير والخراطيم ويتم رش الماء والصابون علي السربنتينة الخارجية والفلتر الخارجي (( فلتر الفريون )) والتاكد من عدم التسريب كل هاذا مع متابعة عداد الضغط انه ثابت ولايقل عن مستواه اذا قل عن مستواه وكله تمام يبقي الثلاجة بها ثقب او تسريب ودي مشكلة كبيرة شوية

يفضل ترك الضغط لمدة نصف ساعة للتاكد من ثباته

4 - طريقة الشحن

لابد من تفريغ الدورة من الهواء كلياً ودا بيتم عن طريق ماكينة الفاكيوم وكل بتوع التكيف الي في مصر بيستعوض عنها بموتور ثلاجة او مكيف قديم
ثم توصيل اسطوانة الفريون وتفريغ الهواء من خراطيم الشحن
ثم فتح الاسطوانة بدون تشغيل المحرك او التكيف حتي تملاء الدورة بفريون بعد الفاكيوم بيكون الضغط حوالي من -20 الي -25 psi بنوصله ل 10 الي 20 psi
ثم ندير محرك السياترة ونظبطه علي 2000 rpb عن طريق وضع قطعة كارتون عند بكرة الاكسرتير
ثم نقوم بالفتح والقفل السريع لمحبس العداد (( عداد الضغط )) علي فترات متباعدة حتي نصل الي الضغط المظبوط او لو بنشحن بالوزن حتي اكتمال وزن الشحنة
بتوع التكيف بيريحوا دمغهم من القصة دي ويستني لغاية الراجع ميشمع وبكدا يكون اكمل الشحن

بنقفل ونلم عدتنا ومتنساش تاكد علي ابرة الشحن بشوية مياه وصابون وتتاكد انها مبتسربش


اسعار الفريون من شارع نجيب الريحاني وعبواته

الاسعار تقريبية لاختلافها يوم عن يوم

العبوة السعر
300 جرام 38 جم
500 جرام 55 جم
1 كجم 100 جم
3.4 كجم 165 جم

اخيرا مسكت غلطه هههههههههه فريون 134 مش 124 و اهم حاجه موضوع الابره ده انت طبعا فاهمني هههههههههههه

ربنا يديلك العمر و الصحه يا طارق كنت و لا زلت انسان محترم و خدوم لوجه الله ربنا يجازيك عنا كل خير