السلام عليكم و رحمة الله و بركاته
ديه أول مره أكتب فى القسم الإجتماعى و لكن من غلبى و الله
أنا من سكان مصر الجديده اللى راحت عليهم خلاص بعد ما ظهر المدن الجديده الرحاب و التجمع و مدينتى و .......
المهم عشان ماطاولش عليكم
انا مستغرب جدا من أسعار فواتير الكهرباء و المياه بتاعت العماره و ليس فاتورة كهرباء الشقه ,, هناك فرق
احنا عماره مكونه من ستة طوابق (6) , كل طابق فيه شقتين فقط , عندنا أسانسير واحد و موتور مياه واحد
و كمان عندنا تايمر timer لكهربة السلم يعنى لو نور السلم ولع يقعد دقيقتين والع و يطفى اتوماتيك عشان التوفير
مفيش انتركم و خلافه
فيه لمبه واحده فى كل دور لإنارة بسطة السلم لأن السلم مش كبير أصلا
فاتورة الكهرباء للعماره كل شهر بتعدى ال 1000 جنيه
يعنى كل شقه بتدفع فى الشهر قرابة ال 100 جنيه كهربة سلم فقط
مع إن . . .
عمارة والدى اللى ساكن فيها فى مصر الجديده بردوا : ثمانية أدوار (8)
الدور فيه أربع شقق مش اتنين زيينا
عندهم ماتورين مياه مش واحد زيينا
معندهمش تايمر لنور السلم يعنى بيفضل والع علطول لحد ما البواب بيطفيه بليل
عندهم اسانسيرين اتنين مش واحد زينا
كل دور فيه لمبتين نور سلم أو لمبه كبيره عشان السلم كبير
و مع ذلك العماره كلها بيجيلها فاتوره 500 جنيه فقط لا غير أو بتدور حوالين هذا الرقم أعلى أو أقل حاجه بسيطه
ده بالنسبه للكهرباء أما بالنسبه للمياه حدث و لا حرج
عندى كل شقه بتدفع 94 جنيه أو هوالين هذا الرقم ,,, المهم يعنى فى التسعينيات
و طبعا لما سألت كذا واحد لقيت ان الارقام ديه مبالغ فيها جدا
و عندى ما شاء الله على جيرانى , كل واحد مشغول و مش فاضى للكلام ده ,, ما دام معاه فلوس يدفع فخلاص بيدفع دون نقاش و مكبرين دماغهم على الاخر و كل واحد عامل فيها عبده المهم اللى الفلوس عنده ملهاش عدد و مش حيجى يتكلم فى فاتورة كهربا و لا ميه مع انى عارف و متأكد ان بالأرقام ديه ,, فيه مشكله
قلت العداد بايظ الاقى مرات البواب تقولى دول لسه مغيريين عداد المياه ,, يا جماعه فيه مشكله و لا كأنى فى ترب
و أكتر حاجه بتغظنى بجد فى البواب و مراته انهم ساعت التحصيل بيبقوا منشكحين أوى و على وشهم فرحة الدنيا زى ما يكونوا فرحانين فى سكان العماره و شمتانين فيهم
و سؤالى هنا : عايز أعمل شكوى أو محضر أو زى ما تسموه , بس أخلص و ماحسش انى بينضحك عليا
أكلم مين و الرقم كام و أدفع كام و أروح فين و هل محتاج أخد أجازه من الشغل و لا لاء للموضوع ده , انا أجازتى الجمعه فقط
أقصد حد حصل معاه الموضوع ده قبل كده و عرف يتصرف ,, يا ريت الرد يكون بالتفصيل الممل ,, اهم حاجه التفاصيل عشان انا معملتش الموضوع ده قبل كده
المفضلات