الموضوع: نصائح و تجربتى مع التكييف النهاردة

النهاردة كنت قريت شوية نصايح كده عن استخدام التكييف من صفحة bey2ollak
على الفيس بوك و هى :
ماتلعبش في اتجاه منافذ الهواء بتاعت التكييف :

1- ناس كتير ماتعرفش ايه هو الوضع الامثل لاتجاه منافذ الهواء بتاعت التكييف .. قوانين الفيزياء بتقول لو انت مشغل المكيف على البارد يبقى اتجاه منافذ الهوا لفوق ده التمام .. اما بقى لو في الشتاء و مشغل التكييف على السخن يبقى اتجاه منافذ الهوا لازم يكون للاسفل .


2-افتح الشبابيك قبل ما تشغل التكييف على وضع التدوير الداخلي .

كتير متعودين اول ما يركبوا العربيه يشغلوا التكييف مباشرة على وضع التدوير الداخلي عشان يتخلصوا من الحر اللي بيبقى مستنيهم جوا العربيه و ده غلط لسبب بسيط ان درجة الحراره جوه العربيه بتبقى اعلى من درجة الحراره بره و بالتالي الخطوه الصح انك تفتح الشبابيك لحد ما الهوا السخن ده يتبدل بهوا اقل حراره وبعد كده يعمل اللي هو عاوزه .


3-تجنب الاستخدام الطويل لمدة تدوير الهواء الداخلي في السياره .

تدوير الهواء الداخلي في السياره هو عملية تدوير الهواء جوا مساحة السياره من غير ادخال هواء جديد و بالتالي نسبة الاكسجين هتفضل تقل باستمرار و في حالة الاحتراق الغير كامل للوقود في اسطوانه المحرك احتمال كبير يتسرب كميه من غاز اول اوكسيد الكربون لجوا العربيه و اللي هيخلي الهواء اللي السائق و الركاب بيتنفسوه غير صحي , عشان كده اتأكد انك كل فتره تجدد الهواء اللي جوا السياره عشان تتفادى أي ضرر على صحتك .


4-اتعود تقفل التكييف قبل ما توقف العربيه بشكل كامل بشويه .

بيفضل دايما ما تفضلش مشغل التكييف بتاع السياره بعد ما تبطلها عشان ما تحملش على المحرك عبء التكييف لما تيجي تشغله بعد كده , عشان كده حاول انك تطفي تكييف السياره قبل ما تبطلها بدقايق , و كمان ما تشغلوش الا بعد تشغيلها بدقايق .


و الصراحة مع جو النهاردة ده كان عايز تكييف بالرغم من انى خرجت على المغرب كده .. فى حاجه مكنتش عارفها حكاية اعادة التدوير دى و انها بتستخدم هوا من جوة العربية بس و تسقعه و كنت كل الى اعرفه ان لما بدوس على الزرار ده بحس ان المراوح بقت اسرع و بتخرج هوا اكتر .. المهم شغلت اعادة التدوير فى الاول لان العربية كانت لسه بردو واخده الحرارة بتاعة وقت الظهيرة .. بعدين شغلت التكييف حاجه بسيطة و قفلت اعادة التدوير و ظبطت مخارج التكييف على فوق شوية زى النصايح

الفرق الى حسيته ان لما قفلت اعادة التدوير صوت التكييف اهدا كتير و فى نفس الوقت نسمة سقعة جميلة كده خصوصا و ان الهوايات على فوق نسبيا .. الفرق الجوهوى بقى لما كنت بشغل التكييف مع اعادة التدوير ان كل شوية ودانى اتسدت و الضغط مش مظبوط الكلام ده اختفى تماما لان لما قفلت اعادة التدوير الهوا الى داخل من برا فبالتالى الضغط متساوى .. و دى حاجه كانت بتضايقنى جدا مع التكييف
فرق تانى حاسس ان سحب العربية مع التكييف اتحسن شوية معرفش ده به علاقة ولا لا


فى النهاية بردو مش عارف الكلام ده بتأثر جامد مع وقت الظهيرة عموما هجرب نفس الكلام فى مرة فى الظهر و اقولكم و عايزين نتناقش فى الموضوع ده و خبراتكم

و كان ليا سوال لو مثلا دخلت فى عفرة مرة واحدة و انا مشغل التكييف هل فلتر التكييف يحوشها بالشكل الكافى ولا المفروض الواحد يشغل ساعتها اعادة التدوير