الموضوع: انت ليه اصلا بتسمع كلام الناس ده انت اللي غلطان

انت ليه اصلا بتسمع كلام الناس ده انت اللي غلطان

سؤال كدة يا جماعة
هو لية احنا اصلا بتسمع وتصدق كلام الميكانيكي ولا عامل البنزينة ولا موظف بيع العربيات في المعارض ولا البياعين في سوق السيارات المستعملة
ولا البياعين في محلات قطع الغيار ولا موظفي الصيانة في التوكيل ولا الفئات الضالة اللي بنقابلها في مجال العربيات ولا .............

ليه انت اصلا متبقاش عارف كل حاجة ( طاب هنعرفها ازاي يا ذكي !!!!!!! )
متجيب كتاب عن ميكانيكا العربيات واقراة وخش علي النت ونزل الكتب والمقالات اللي بتكلم عن مشاكل العربيات او اسال اصحابك او خش في منتديات العربيات واقرا واتعلم وجرب بنفسك
او اسال مهندس ميكانيكا سيارات
بالنسبة لموضوع المهندس فده موضوع كبير
تعريف المهندس : هو من تخرج من كلية الهندسة ودرس 5 سنين وطبعا المواد بالانجليزي وبيبقي شكلة باين عليه انة مهندس
تعالي بقي للاشكال الي بيطلق عليها مهندس :
تروع ورشة عربيات يقولك صاحب الورشة انا المهندس وهو اصلا سوابق ومختوم علي قفاة
تروح تغير زيت ولا تظبط زوايا تلاقي الصنايعي يقولم انا المهندس وهو شمام اصلا
وتلاقي اللي معاة الاعدادية واللي معهد واللي دبلوم واللي عليه احكام وهربان واللي لسه خارج من السجن وشغال ميكانيكي ويقولك انا مهندس
والغريب ان تلاقي ناس نضيفة تناديه تقوله يا بشمهندس ويسأله عن اراءة وحلولة اللولبية في ميكانيكا العربيات واراءه في العربيات الجديدة والانواع الحلوة والوحشة وهو اصلا كله فتي وهلس واخره كان راكب توك توك والناس تصدقة ويقولك
ده شاطر – ده شرب الصنعة وهو صغير – ده كان شغال في توكيل كذا - دة اتعلم علي ايد الميكانيكي بتاع شوماخر – ده ابن عم لويس هاملتون – ده اخو فيلب ماسا في الرضاعة – ده اللي علم فرناندو الونسو السواقة اصلا - ......
وتسمع كلام الناس ده واللي يقولك جرب زيت كذا وهات قطع غيار العربية من كذا وشيل وحط وبدل ويقعد يخترع في عربيتك اللي احنا جايبها بطلوع الروح وبشقا عمرناه وهو يجي بفتوة وهو بيضرب سجارة البانجو يخسرك فيها الاف الجنيهات
ما كل واحد يجيب كتالوج عربيتة ويقراه ويفهم مواصفات ومتطلبات عربيته
ودلوقتي ما اكثر منتديات العربيات اللي بتسال فيها واهل الخير بيردوا عليك ويساعدوك ويقوللك خلي بالك من المحل كذا وروح عند كذا وكلمني وانا هعرفك علي كذا وهما اصلا ما يعرفوش بعض
فعلا هي ده الصدقة الجارية وهو ده العلم النافع اللي بنتفع به وينفع به الناس
ربنا يبارك فيهم ويكثر من امثالهم

اكيد لما تروح عند محل كاوتش وتقوله الكاتش اللي عندك دة حلو اكيد هيشكر فيه مش هيقولك انا ببيع حاجات مضروبة
واللي بيبيع زيت مخشوش يقولك ده زيت اصلي وهم اصلا بيجيبوا مثلا 10 جراكن نوع كذا اصلي ويوزعهولك علي 30 جركن ويحط اي ويت يقابله عشان يملي الجركن ويبرشمه تاني ويبيعه واحنا نحطه في عربياتنا
طاب منروح عند الموزع المعتمد او المراكز الموثوق فيها بشهادة الناس ونجيب من عنده بالفاتورة المعتمدة عشان لما تحصل حاجة تقدر تتخانق معاة وتسيحله في المنتديات
وتلاقينا جايبين عربيات ب 200 – 300 الف جنية ونروح نجيب زيت من محل مشبوه عشان نوفر 30 جنية
بالنسبة للتوكيل ومراكز الخدمة المعتمدة فانا بصراحة قليلا ما اثق في حد في البلد ده
فمقدرش اسيب العربية في التوكيل وانا قاعد فوق في الريسبشن بتفرج علي التليفزيون وبشرب شاي والصنايعية بيلعبوا في العربية ومتعرفش العربية اتغيرلها زيت ولا حطوا واحد مستعمل ولا ايه اللي بيحصلها انا مش عارف
( قلبي الصغير لا يتحمل انت اترك حد يعمل حاجة في العربية وانا مش شايفة )
طبعا مش كل التوكيلات ولا مراكز الخدمة عشان منظلمش حد
الا من رحم ربي
وتلاقي مهندس الصيانة يقولك كلام عكس اللي زميله بيقوله عكي اللي زميلهم في فرع تاني بيقوله عكس اللي كتالوج بيقوله واديني في الهايف وانا احبك يا فننس
تحس انه بيسكتك بكلمتين
فحاول انك تستنضف الشخص اللي بتتعامل معاه
وفي صنايعيه حافظين نوع معين من العربيات ( خلي بالك حافظ مش فاهم )
يعني حافظ ان العربية 128 بيعمل فيها 1 2 3 لو عكستلوا حاجة يقف يتلخبط لانه حافظ اماكن العربية دة بس مش فاهم اليه اللي بيحصل ودة بتيجي بالتجربة والممارسة بعد ما يكون اتعلم في 100 عربية قبليك وخربها
من الاخر اسال استشير

اسال كذا مرة قبل ماتعمل حاجة مش عارفها وجمع معلومات من اماكن مختلفة وحللها باسلوب منظم تتطلع بالخلاصة

والحمد لله المنتديات بتاعت العربيات محدش بيبخل علي حد بمعلومة او بتحذير
دة في ناس ممكن تقعدلك يومين تلاتة بيبحث عشان يجيبليك المعلومة الصح لمجرد مساعدتك

واللي بتعمله في الناس سواء خير او شر بيتردلنا دلوقتي او بعدها بسنين او يترحل ليوم القيامة فمحدش هيفلت يعني

بس خلاص

المشاركة الأصلية كتبت بواسطة karim ibiza

عندك حق فعلا
انا كان معايا عربية لادا 2105 موديل 84 وكانت لما يحصل اى حاجة فيها مهما كانت صغيرة اطلع جرى على الميكانيكى عشان يعملهالى وكنت شايف انه معلم وفاهم قوى لحد ما ظهرت نتشة غريبة فى العربية بتحصل عند سرعة 80 ومش بتخليك تعرف تزود السرعة وطبعا ولأنهم كلهم شغالين بمبدأ (زغرطى يالى منتيش غرمانة) ابلتين-كوندنسر-بوجيهات-فلتر بنزين-تنضيف بيكات-كابلات بوجيهات وفى الاخر برده العيب لسه موجود وطبعا الحاجات مش اتغيرت كلها مع بعض وقعدت 10 ايام كل يوم اروحله وكل مرة ياخد مصنعية غير القطعة اللى بشتريها وبكده يبقى مكنش فاضل انى اغير الموبينة
وقاللى يبقى كده الموبينة (لا يا رااااجل) ولأنى اتعلمت من اللى حصل فى الحاجات اللى اشتريتها ومنفعتش انى مش اثق فى كلامه فـ قولتلوا طيب هجيلك بكرة ونشترى الموبينة عشان معيش فلوس دلوقتى, وطلعت على واحد صاحبى معاه لادا وماشية زى الفل واخدت الموبينة بتاعته عشان اجرب بيها ولقيت العيب لسه موجود وبكده يبقى انا اتأكدت ان العيب مش من الموبينة وانى كنت هلبس ثمنها زى الحاجات اللى قبلها
وتانى يوم روحتله قالى جبت الموبينة؟؟ قولتله افرض العيب فضل موجود؟؟؟ قالى لأ هى الموبينة (وواثق قوى)
قولتله ما انت قولتلى على الحاجات اللى قبل كده نفس الكلام
المهم فى الأخر رفضت انى اجيب وافشت معاه وسيبته ومشيت وواحد صاحبى دلنى على ميكانيكى تانى وروحتله وقلتله على العيب, لقيته فتح الكابوت وداخل على الكاربراتير وفكه وطلع منه حاجة صغيرة شبه الصاروخ وقاللى هاتلى واحدة زى دى من اى محل قطع غيار بـ 20 جنيه
جبتهاله وركبها وقاللى تمام كده واخد 20 جنيه وطلعت جربت وفعلا العيب راح!!!!!

لكن لما جبت الابيزا نزلت الكتالوج ودليل الصيانة من على النت وبقيت اعمل كل حاجة فيها بنفسى ماعدا الحاجات اللى بتحتاج الات مش عندى ولو اضطريت اروح للميكانيكى مش بروحله غير لما ابقى عارف ومتأكد العيب من ايه عشان ميجربش فى عربيتى

ملخص الكلام:
فيه ميكانيكى حافظ مش فاهم وده تلاقيه بيشتغل فى نوع معين من العربيات وكلهم شبه بعض
وفيه ميكانيكى فاهم بس مش حافظ وده تلاقيه بيشتغل فى اى حاجة ألمانى على فرنساوى على ايطالى على يبانى على كورى

كل واحد منهم ليه مميزات وعيوب:
الأول: ميزته فى خبرته فى العربية اللى شغال فيها من كتر ما كذا عربية من نفس النوع عديت عليه وده تاخد منه احلى ظبطه للعربية والتقسيمة والحاجات دى وعيبه انه لو عدى عليه عطل جديد فى نفس العربية اللى بقاله 50 سنة شغال فيها مش هيعرف يعالجه الا لما يجرب شوية ويغرم صاحبها

الثانى: ميزته انه بيعرف يشخص العطل كويس جدا حتى لو معداش عليه قبل كده وتلاقيه مش بيشتغل فى عربية الا لو فاتح الكتالوج بتاعها على النت قدامه عشان يشوف الحاجة دى بتتفك ازاى وعيبه انه ميعرفش يظبط ظبطة كل عربية لأنه مش حافظ زى الاولانى

انا نفسى الاقى ميكانيكى حافظ وفاهم

معلش طولت عليكم
صباحكم بيضحك

انا كان حلمي انا وواحد صاحبي اننا نفتح مركز صيانة زي اللي بنشوفه في الافلام ونتخصص في نوع معين من العربيات ونسافر عند الدولة المنتجة للعربيات ونشوف المصانع المنتجة ونجيب قطع الغيار من الدولة المنتجة
بس طبعا حلم