نسأل تانى: سيتروين ولا بيجو؟

السلام عليكم

معلش انى بسأل نفس السؤال تاني .. بس بجد بعتبر اننا اخوة هنا فى المنتدى ومحدش بيبخل على حد بالنصيحة والمساعدة

دلوقتى السيتروين اللى احنا حاجزينها هتتسلم اول يوليو (من كلام المبيعات اللى انا لسه قافل معاهم حالا)

انا بالنسبالي ده معناه ان اول يوليو ده ممكن يبقى اول سبتمبر برضه .. والحجة جاهزة ومعروفة

بالاضافة الى انى بدأت اشك فى الوكيل ده (عز العرب) وانه مش عارف يجيب العربية هيعرف يجيب قطع غيارها!!

وفي نفس الوقت البيجو شكلها وحش ومش عاجباني وسعرها اغلى بحوالي 7 الالاف جنيه

ايه رأيكو؟؟ انزل احجز البيجو من المعرض اللى جنبي قبل ما تروح مني هيا كمان؟؟ ولا استنى لاول يوليو !!

خوفي كله انى الاقي بيعه كويسة للعربية اللى معايا دلوقتى واضطر استنى شهر كامل بدون عربية !!

مش عارف !!

ممكن تحجز وتبقى تعمل كانسل لواحده فيهم على حسب الظروف

لا مش هينفع .. لان البيجو موجودة فى المعرض بزيادة الفين جنيه .. وانا مش هحجز هنا وهنا فى التوكيل

انا ميال اكتر للاليزيه .. بس مش عارف هقدر استنى لحد يوليو ولا لأ .. ولو استنيت فهل هما هيسلمونا فعلا اول يوليو ولا لأ !!!

موضوع محير وانا مش عارف افكر بجد !

يا اخي العزيز خد الأمور بهدوء عن كده , انا عارف ان الحجز و الأنتظار شئ سئ و الواحد خلاص بيكون سستم نفسه انه هيغير العربيه ان شاء الله فبيبقي نفسه يغمض عينه و يفتحها يلاقي العربيه الجديده تحت ايده , بص من الأخر محدش هيستلم قبل معاده اللي ربنا محدده انا كان بيني و بين شراء الصني في يناير اللي فات خطوه و ربنا اراد ان ده ميتمش عشان اتجه للأليزيه مش معاك في الزياده في المعارض مش لحاجه غير عشان تضمن العربيه اللي هتستلمها تبقى مستلمها من الوكيل , انا شايفك في كذا حوار ميال اكثر للأليزيه و هي فعلا اشيك و اجمل و انت خلاص حجزت توكل ع الله و سيب الأمور تمشي براحتها و احنا كلنا ع نص يونيو هنفضل نتصل بجورج عشان نعرف العمليه وصلت لأيه و لما تعرف انهم خلاص في الجمارك و بيخلصوا الدفعه ان شاء الله نبيع وقتها

انا بس مستغرب كلمتك ان الوكيل مش عارف يجيبها ؟؟ اعتقد عز العرب بيجيب فولفو و بي ام فمش فاهمك يعني ايه مش عارف يجيب ستروين ؟؟؟

دعك من القلق يا صديقي , اعقها و توكل

من خلال كلام الناس في المنتدى واضح جداً إن شعبية الإليزيه أعلى بكتير من شعبية البيجو والناس اللي حاجزة الإليزيه أكتر بكتير فما بالك بقى لما الناس تبدأ تستلم والعربية تتشاف في الشارع أكيد هتعجب ناس اكتر وهتاخد شعبية أكتر واكتر وهتبدأ تفتح سوق بجد وهتبقى أكتر من البيجو فأنا شايف انك متقلقش من أي حاجة من ناحية العربية دي لأنها هتنتشر جامد جداً وهتثبت وجودها جامد جداً والتوكيل لازم هيوفرلها قطع الغيار والصيانة اللازمة.
وكمان أنا متأكد ان سعرها هيرفع شوية كمان عن السعر الحالي. بس نتمنى انو ميرفعش جامد عشان العربية تحقق الانتشار المطلوب بس عامة لو رفع شوية برضو بعد منستلم فده هيخدمنا شوية من ناحية إعادة البيع اللي في بعض ناس متخوفة منه. بس انا شايف ان بعد ما بدأت ستروين تقتحم الفئة السعرية دي وبدأها بالقوة دي فأعتقد ان إعادة البيع هتكون سهلة جداً بعد ما الناس تعرف يعني ايه ستروين ويعني ايه عربية أوروبي.

مش عارف اقولكوا ايه .. ربنا يقدر اللى فيه الخير ويرضينا به

ستروين افضل

فيه إستطلاع للرأى موجود فى قسم المقارنات بالمنتدى
http://www.nilemotors.net/Nile/357645-301-c-elysee.html