الموضوع: مطلوب وظيفة مدرس إنجليزي في مدرسة دولية في الخليج - أرجو النصح

alo...

alo

مفيش مدرسين مغتربين يا جماعة؟

يا رب حد يفيدك...انا شخصيا مدرس انجليزى...و كاره تماما الشغل فى الحكومه و كاره جدا الدروس الخصوصيه و تعبها و فلوسها اللى منظوره و قلت القيمه و اللف على البيوت....و الحمد لله كل اللى اتعامل معايا بيشجعنى انى ادور فى المدارس الدوليه لان اللغه عندى كويسه جدا و انا اصلا حابب تماما المجال ده...كنت عايز استفسر من حضرتك ازاى دخلت المجال ده ( التدريس فى المدارس الدوليه ) و هل حضرتك واخد كورسات معينه؟ و ايه اللى تنصحنى بيه عشان اقدر اشتغل فى المدارس الدوليه؟ و مرتباتها فى حدود كام؟..........
معلش....انا عارف انى تالت عليك وانك بتستفسر عن حاجه خاصه بيك...بس للامانه انا اشتركت فى المنتدى مخصوص عشان اقدر اسألك
ربنا يوفقك كمان و كمان

أسلم عليكم يا عام ميدو،
أخجلتم تواضعنا يا مان! تشترك في نيل موتورز بجلال ذات نفسو عشان تسألني العبد الفقير (إلي هو أنا)، و أنا تحت أمر حضرتك و الله و مش حاعمل زي مدرسين في الخليج شخصياً معرفهمش بس بعتلهم بعشم عشان أنا الحمد لله رجل مسلم و مسلم أمري لله و الله و مش بخبي ولا ببخل بالنصيحة على أي حد عشان أنا مؤمن إن الارزاق بالله وحده لا شريك له. و النتيجة إن و لا الهوى... و لا كأن المدرس دة شاف رسالتي و تلاقيه مصمص شافيفو و قال حكم! بنظام إنت عاوز تاخد النصيحة على الجاهز كدة و تشاركنا في أكل عشنا و لا إيه! و نسي إن مفيش حد بياخد رزق حد، و إن مفيش حد أو أي مخلوق هيسيب الدنيا دي قبل ما يستوفى رزقه إلي المولى عز و جل قرار إنو يديهولو رغم عن أنف الجميع. القصد، أنا مبدئياً خريج تجارة انجلش و واخد دبلومة TEFL و في الاصل خريج مدرسة لغات شهيرة و عمري 39 سنة و داخل الجامعة بشهادة GCE و اشتغلت قبل كدة في السياحة (بتكلم إيطالي كويس و شوية أسباني و فرنساوي بمشي بيهم حالي)، و بردو في الشحن و الادارة. و أخيراً اشتغلت في التدريس من 2006 في مدرسة لغات على قدها لمدة موسم واحد، و بعد كدة قدمت في مدرسة دولية و فوجئت إن إلي بتعملي المقابلة الشخصية كانت مدرسة بريطانية في مدرستي و أنا طالب! المهم قبلت و اشتغلت سنتين، بعد كدة دورت في مدرسة دولية تانية عشان أحسن داخلي... عشان للاسف على الاقل على حد علمي أنا في مصر المدارس على إختلاف انواعها مبتحبش تزود المدرسين إلا حاجة بسيطة، و بعد كدة اشتغلت سنتين في المدرسة إلي بعديها + بطلت و فتحت مكتب إستيراد خاص بي لكن بصراحة الدنيا مش وردي قوي من حيث أمانة الناس و التكاليف العالية و إرتفاع سعر الدولار و أكيد بردو جهلي أنا بحاجات كتير! المهم قررت أرجع تدريس تاني. أنا من 10 سنين كنت شغال في الشؤون الإدارية و الشحن في السعودية و قلت ساعتها كان الريال بسعر أما دلوقتي سعرو هو و مجموعة من العملات العربية مختلف تماما... تقريباً الضعف، صحيح تكاليف المعيشة بردو زادت هناك لكن أنا شايف إن بردو في مجال يعني. أما من حيث المؤهلات زي ما أنا شفت على أرض واقع هنا في مصر إن ال-accent بتاع المدرس مهم جداً... و كمان مستوى شياكته و كياسته، و مستوى لغته أساسي أكتر من شهادة التخصص كمان للاسف، لو معاك باسبورت دولة غربية أكيد حيساعد في الحصول على فلوس أكتر إن شاء الله، المرتبات متباينة جداً لمدرس الانجلش في المدارس الدولية و ممكن تبدأ من 1,500 تقريباً لحد بعض الناس المدرسين المصريين الكويسين إلي أسمع (بس معنديش أي دليل) إن بياخد أكتر من 10 أضعف الرقم دة. بصراحة أنا مقدم في كذا مدرسة طالبة مدرسين بذات في جريدة الاهرام يوم الجمعة و كمان شركات التوظيف على الانترنت... بنظام كأني صياد و بحط كام صنارة في كام حتة و إلي تشبك معايا بتكل على الله و اشتغل معها، الاجانب في منهم إلي مش مكمل الثانوية العامة في بلدهم و في إلي معاه دكتوراه و خبرة حقيقية في تخصص التربية و دول معدلاتهم مختلفة جذرياً أكيد. يا ريت أكون فدت حضرتك بأي حاجة و أنصحك تقدم في مدارس دولية كتير في مصر و أي خبرة حضرتك بتاخذ أهي بتنزلك في ال-cv و أكيد لازم تاخد بمدة خدمتك شهادة خبرة توثق بيها مستنداتك عشان المستقبل أما تقدم في غيرها. و أدينا مستنيين أي إضافة من أي شخص عندو علم يفيدنا و يفيد غيرنا إلي أكيد بيدور يحسن وضعيته. و أي خدمة أقدر عليها فتأكد يا أخي اني لن أتردد. أخوك أحمد سامي

و عليكم السلام و رحمه الله و بركاته!! الحقيقه انا مش عارف اشكرك ازاى يا استاذنا...مكنتش متوقع انى اجد الرد بالسرعه دى!! :) على فكره واضح ان عندك خبره كبيره فى الحياه العمليه و عشان كده هستغلك شويه بئا هههههههه ضريبه الشهره يا استاذ :) ههههههههه اخوك الصغير محمد بئا عندى 29 سنه و شغال فى مدرسه تجريبى حكومه ، بعقد مؤقت من الادارة التعليميه و بمرتب 620 جنيه!!! و العقد ده بيتجدد كل سنه و منتظر ان الحكومه تثبتنا و كده... طبعا فاكر المثل اللى بيقولك "ان فاتك الميرىاتمرغ فى ترابه" . وانا بصراحه مش مقتنع ابدا بالمبدأ ده وشايف ان الواحد لازم يجرب هنا و هنا وياخد خبره فى الحياه...الناس شايفه انى اكمل فى الحكومه لغايت متثبت بحجه انو امان و كده...بس مش لاى سبب تانى...عيوب بئا شغل الحكومه ان مفيش فيه مرتب كويس...زى مقولت لحضرتك كده...مرتبى 620 جنيه...حاكه تكسف يعنى...و بصراحه مليش فى قصه الدروس، انا بئالى اهو 3 سنين مدرس و جربت الدروس الا انها للاسف بتاكل اليوم و قلت قيمه جدا خصوصا لما يجى ولى الامر يدفعلى الفلوس اودام عيالو ولا الاسوء لما الطالب نفسو يجى يدفعلى تمن الحصه و انا نازل!! بصراحه انا شايف ان الموضوع يمس الكرامه اوى و غير كده بحس ان الفلوس منظوره جدا!! و حاجه كمان، انا شايف ان الدروس بتلغى دور المدرسه تماماو بتشجع على السلبيه. وانا قررت انى مشتغلش فى الدروس الخصوصيه ابدا...المهم...انا يا سيدى جربت كورس التيفل ده ، كان فى مركز فى العجوزه عامل تعريف ليه لمده اسبوع الحقيقه انا روحت حضرت الاسبوع كلو و فعلا اتعرفت على ناس جديده نفسهم يدرسو فى اماكن محترمه بتقدر قيمه المدرس. المهم لائيت شباب بيدرسولنا فيه...و الانجليزى بتاعهم ممتاز و اقرب الا طلاقه اهل اللغه نفسهم...و المفاجأه! الشباب اللى كانو بيدرسولنا دول ولا كانو عايشين بره ولا اتربو فى مدارس او كليات خاصه!!! حبهم للتدريس و القرايه فى المجال ده خلاهم متفوقين فيه. و الحقيقه عملولنا كده امتحان و الحمد لله طلعت احسن واحد و بالعكس شايفين ان لغتى و استخدامى للخرائط الزهنيه و غيرو فى الشرح يؤهلنى انى اكون محاضر زيهم او مدرس فى مدرسه دولى و للامانه كلامهم ده كان بغض النظر عن انى اكمل معاهم الكورس ولا لا. انا سألتهم و كانو ودودين و مبخلوش علينا بحاجه. رايك بئا اكمل فى الحكومه لغايت متثبت و اكمل؟ ولا ادور على مصلحتى فى مدارس دوليه احسن؟ يا ريت تقولى كمان خدت كورس التيفل فين و بكام؟ لانى روحت الجامعه الامريكيه و قالولى معندهمش. بعتذر عن الاطاله و بشكرك مره تانيه على اهتمامك و ردك...و اتمنى ان شاء الله ربنا يبعتلك حد يجاوبك على استفسارك زى منتا بتساعدنى كده :)

و عليكم السلام و رحمة الله و بركاته،
صدقني يا أستاذ ميدو مفيش حد مرتاح! لا الفقير و لا حتى أغنى الأغنياء.... غاية ما هنالك إن الانسان لزم يحول و يسعى، و برد كل حاجة ميزة و عيب، يعني مثلاً إنت بتشتكي من قلت الدخل في مكانك الحالي لكن برد ليه ميزة إن محدش يقدر يطردك عشان دمك تقيل مع الاولاد مثلاً و عاوزهم يحلو الواجب... في القطاع الخاص كقاعدة عامة الطفل و أهله هما الملوك و أي حد تاني شغلته لمؤاخذة يخدم عليهم و يراضيهم! و عموماً دة القانون غير المكتوب هناك، بتاخد دخل أعلى و تقعد على أعصابك لحسن حد يزعل ولا يشتكيك زور، و بعد كدة تقعد في بتكم و دمعتك على خدك! أياً كان أنا مؤمن إن الانسان يقدم service محترم و ياخد مقابل آدمي و الارزاق بالله! و عن الشهادات أقوى حاجة إسمه celta و دي بيخدوها من ال-British Council و كنت تكلفتها آخر مرة تقريباً 12,000 جنيه - بس الصراحة تستاهل - أما ال-TEFL فليه معدلات كتير من أماكن مختلفة. بالنسبة للشغل الإضافي لو بيضايقك فسيبك منه طبعاً. عن نفسي حاولت أروح أخد ال-celta بس مخدنيش و من غير إبدأ أسباب منطقية، فتوكلت على الله و خدت كورس في 2007 في حتى قريبة من شارع التحرير في الدقي و كنت لمدة شهر واحد و دفعت 4 بواقي! أظن دلوقتي في أماكن مختلفة بتدي الشهادة دي و كمان أرخص من إلي أنا دفعته، إسأل و شوف إيه أحسن و أرخص و أقرب لسكنك، لو عوز ممكن أبعتلك إسم و عنوان المركز على الخاص، بس اتأكد الاول انهم لسة بيدو الكورس ده و تمنو كام بردو. بالنسبة ليك أظن كلمة تتثبت دي معناها انك ممكن بعد التثبيت تاخد اجازة بدون مرتب و تشتغل برة و بعد كدة لو حبيت ترجع تقوم تقدر... و ده حل جميل بس فضلك قد إيه و تتثبت؟ و بردو لو أنا نسيت أجاوب على أي تسأل عندك اسألني تاني عادي. أخوك أحمد سامي

الف شكر على نصيحتك يا باشا...كلامك منطقى طبعا، بس انا بختلف معاك فى نقطه مهمه اوى: انا شايف ان القطاع الخاص احسن لانو اللى بيستمر فيه اللى يستاهل فعلا انو يستمر فيه...احنا للاسف كتير مننا مش بتاع شغل، فبالنسبه ليه الحكومه افضل طبعا عشان محدش هيقدر يمشيه...و لو حتى عمل ايه و اتحول تحقيق ، اخرو حياخد جزا و بيتشال بعد ست شهور!!!!! الواحد من دول عايز ايه غير انو يروح يمضى حضور و بعدين يقعد يفتر و يشرب الشاى و مفيش مانع يقرأ الجرنال و ممكن ياخدلو تعسيله كده و بعدين يدخل حصصو و يرزع الدرس على السبوره و بعد ميخلص حصصو يمضى انصراف ( و طبعا ممكن ميمضيش و يمشى بدرى و هما يمضولو ، نظام بئا مجاملات ) بس خلاص...ادى اللى بيشتغل فى الحكومه. انا بقا مش كده، انا بحب شغلى و محتاج انى احس انى فى مكان مقدرنى معنويا و ماديا. الخاص بئا على حد علمى..الشغل فيه شغل! تاخير عليه خصم، تزويغ او عدم اداء العمل على اكمل وجه عليه جزا بجد! بيكون اشبه بنظام الجيش كده وده للاسف اللى بيشجع الواحد انو يشتغل و يجتهد..تصور بئا يا استاذ احمد انى للاسف بقيت اعمل زى الموظفين و امشى بدرى من الشغل ده و الحركات دى!! و ابتديت احس انى بقيت موظف حكومه رسمى هههههههههه طبعا دا غير انى تقريبا اصغر مدرس سننا فى المدرسه و الناس اللى معايا 40 سنه و انت طالع ففى فرق كبير فى التعامل و فى الاحتكاك. ايه رأيك بئا؟ كده تمام ولا ايه؟.....السؤال الهام بئا...هل المدارس الدوليه تختلف عن الخاص من حيث التعامل و النظام؟....انا مستغرب ازاى مقبلوكش فى السيلتا؟ انا فعلا اسمع انها غاليه جدا و ليها انترفيو قبل متقدم. و بعدين انت راجل دارس فى مدارس دوليه و اشتغلت كمان فيها!! غريبه اوى. التيفل يا سيدى فى مركز اسمو كونسيبت فى العجوزه اللى انا بقولك كنت روحتو دا... بيدرس الكورس بتاع التيفل ب2000 جنيه...بس لما سألت على الشهاده قالولى انها من كليه كامبريدج للتدريب...غير جامعه كامبريدج...و دى اللى مقلقنى...انا عايز حاجه دوليه اقدر استفيد منها لو سافرت اى حته. على فكره انت ابن حلال...انا افتكرت ان ليا واحد صحبى كان معايا ايام الكليه، شغال فى مدرسه فى السعوديه كمدرس انجليزى...هسألهولك على النظام هناك. و ارد عليك ان شاء الله.