Pay attention or pay the price
الحقيقة عجبنى الاعلان دة جدا جدا لانه بيبص للمشكلة بموضوعية و حدد المخطىء بالفعل و بيوجهلة رسالة واضحة و صريحة... انتبه او ادفع التمن
http://br.youtube.com/watch?v=_5lOGLZ_ZU4
اللى خللانى اكتب كدة انى من اسبوع كدة قريت فى صفحة الحوادث عنوان "سيارة طائشة تقتل شخص و تصيب الاخر على الاوتوستراد" و لما قريت التفاصيل لقيت ان الاتنين كانوا بيعدوا طريق الاوتوستراد... و بكرر الاوتوستراد فا العربية خبطتهم و صاحبها جرى
اللى شدنى اوى وصف العربية "بالطائشة"... هى طائشة عشان ماشية فى الاوتوستراد وللا عشان ماشية على الاسفلت ولا عشان ايه بالضبط؟؟؟؟ و الجوز اللى بيعدوا الاوتستراد... دول بقى اللى عاقلين و زى الفل؟
انا معرتش مكان الحادث فين بس انا متاكد من انه فى الحتة اللى عند المدافن و السوق... الحتة دى دايما فيها ناس بتعدى زى الغنم بالرغم من ان فيه كوبرى عبور مشاة و الحوادث بتحصل لان المنطقة دى الاضائة فيها ضعيفة و منزل كوبرى و بالتالى فرصة الحادث بتبقى كبيرة
الغريب اننا بنلوم سواق العربية دايما فى الحالات دى... اكنة طلع على الرصيف و داس البشر او موتهم و هما قاعدين على القهوة... محدش بيبص ان الشخص اللى اتخبط دة نزل فى نهر طريق مفيهوش مكان عبور مشاه و اهمل سلامتة الشخصية و استهتر بحياتة... وبقى الشخص دة "ضحية" و بتاع العربية "طائش"... و بعد كدة نرجع نزعل لما نلاقى واحد خبط حد و جرى
المفروض زى ما اللى بيمشى اعلى من السرعة المقررة بيتاخد مخالفة كمان اللى يعدى الشارع غلط يتاخد مخالفة... مهو برضة بيعرض نفسة و الغير للخطر و ممكن برعونتة يؤدى لحادث قد يكون هو طرف فيه و قد لا يكون طرف و دى مشكلة اكبر
الاعلان الصراحة جاب من الاخر... ياريت كلنا ننتبه عشان مندفعش التمن لانه تمن غالى اوى و ربنا يستر طريقكم جميعا
MMamdouh