مشكلة رجة ( اهتزاز ) في الدركسيون
السلام عليكم يا صقور
انا ححكيلكم من الموضوع من الاول
من فترة كده كنت ماشي بالعربية بسرعة 100 تقريبا واضطريت اني اخذ ملف ضيق المهم العربية زحفت مني عشان كنت دايس فرامل والاسفلت كان عليه تراب ...المهم العربية نزلت من على الطريق ونزلت في الرمل اللي على جنب الطريق وهي ماشية بسرعة عالية نسبيا والحمد لله العربية ما اتقلبتش بس لما طلعت تاني على الاسفلت لقيت الكاوتش على الارض
المهم غيرته وروحت للراجل بتاع الكاوتش قالي ده البلف ضرب وغيرت البلف وحطيت نيتروجين وظبطت ضغط الكاوتش كله ورجعت الاستبن مكانه وركبت الكاوتش القديم وشغال زي الفل
النهاردة اول مرة امشي على طريق سريع بعد الموضوع ده بس لاحظت هزة في الدركسيون عند سرعة 100 .... قولت ده ترصيص ... بس لما زودت السرعة الرجة راحت !!! الفكرة ان الرجة بتحصل عن سرعة 100 بس
يعني زودت السرعة اوي الرجة اختفت تماما !!!! هديت ومشيت على 80 مفيش رجة برضه
العر بية نيو صني وعاملة 3500 كيلو بس
هل لو فيه مشكلة في الترصيص الهزة تروح على السرعات العالية ؟؟
ولا اروح اظبط زوايا واكشف على العفشة وارصص الكاوتش تاني
وهل الحاجات دي تبع الضمان ولا ايه ؟؟؟
الف شكر مقدما واسف على الاطالة