الحمد لله -- أول حادث لي باليارس و شيء غريب جدا جدا

السلام عليكم و رحمة الله و بركاته

الحمد لله علي كل شيء أمبارح عملت أول حادثة باليارس و هي جديدة بالمناسبة 2008

هي مش حادثة قوي كل الحكاية إني دخلت في حاجه زي رصيف عالي شيوية

هي الدخلة كانت جامدة من ناحية الشمال لكن أنا ما حستش بخبطه جامده
لكن لما جيت أتحرك الدريكشيون كان بقي تقييييل قوي قوي

المهم وصلت للبيت بالعفية و تاني يوم روحت لتوكيل العباسية
كشفوا عليها و أنا فعلا ذهلت قالولي العربية محتاجه علبة دريكسيون -( شمعدان + صرة + بلية ) - جنط - تزبيط زوايا
انا أتخضيت و قولت ليه كل ده قالوا الخبطه أثرت علي العجل و سألت الموضوع دا يتكلف كام قالو 10 ألاف جنية تقريبا

أنا بصراحه ياجماعه متدايق قوي و مش عارف أعمل إيه بس أنا سيبتهالهم و أمري لله انتوا إيه رأيكوا و هل ممكن خبطه في العجله الشمال تعمل كدل ده ؟ :(

و الحمد لله علي كل شيء

والله هيه فعلا حاجه تزعل
بس قول الحمد لله انها جت على اد كده ومجاتش فى حاجه اكبر
انا للاسف معنديش فكره تعمل فى الموضوع ده
بس عندى اقتراح مش عارف مدى نجاحه وهو
تعرض العربيه على ميكانيكى او مركز كويس الاول
يمكن فى حاجه ممكن تتصلح ومتغيرش
وفلو فى حاجه هتغير ممكن تجبها استراد
على فكره الياريس تعتبر عربيه جديده فى مصر وبره مصر وتقريبا العربيات الى جايه استراد ملحقتش تشتغل فممكن تلاقى قطع استراد ليها بحاله الزيرو وارخص كتير
شوف الحل ده وشوف هيتكلف كام الاول وبناء على هذا الاساس احسبها وتوكل على الله سواء توكيل او بره التوكيل

الحمد لله علي كل شئ ,لكن المبلغ مبالغ فيه ,العربية متامن عليها؟ شوف مركز برة ؟

لا حول ولا قوة الا بالله ... ازاى خبطه خفيفه تعمل كل ده .. انت متاكد انها خفيفه ؟

متهيألى لو مأمن عليها المفروض ماتدفعش حاجة ؟

قدر الله وما شاء فعل

مفيش اللى حضرتك بتقول عليه دا خبطة ايه اللى تحت العجلة تتصلح ب 10 الاف جنيه هى العربية بكام كلها اصلا حرام بجد التوكيلات بتستهبل و لو حتى عندك المقدرة انك تدفع حرام ترمى فلوسك كدا اعرضها الاول على مركز محترم و شوف هيقولوك ايه التوكيل عاوز يبيع وخلاص هيقولك نغير كل حاجة فى حين انك ممكن تلاقى حاجة واحدة بس اللى محتاجة تغيير

ايه الافترا ده؟؟؟؟؟؟؟؟؟
دى سرقه علنى
ده انت تجيب وحده تانيه و تعملها قطع غيار ارخص
روح خدها طبعا و شوف اى عفشجى كويس و مش هتكلف اكتر من الف جنيه
عشر الاف قرد يبوظولهم التوكيل إن شاء الله

كتير بصراحه

حاول تجرب عند اي حد برا التوكيل

بس هل ده يطلعها برا الضمان؟

لاحول ولا قوة اللا بالله العلى العظيم رأى من رأى الاخوة شوف اى مركز برة بس يكون مركز محترم عشان العربية ترجع زى ما كانت

وبعدين يا جماعة مستغربين لية هيا دى التوكيلات سرقة فى سرقة
شوف اى صيانة بتروح تعملها فى تويوتا بتعمل كام (زيت وفلتر مثلا)
ربنا يعوض عليك يا اخى وان شاء الله تكون بسيطة

اعملها بره احسن ولو مامن عليها روح التأمين انا حصلتلي حادثه جامده بالياريس من كام يوم برضه صلحتها بره بتكليف بسيطه وكنت مأمنه عليها بس بصراحه صلحتها علي حسابي ومرحتش بس متعوضه اكيد الحادثه الجايه هصلحها تبع التأمين
ومعلش قدر الله وماشاء فعل

لا حول و لا قوه الا بالله
المبلغ فعلا كتير اوي
روح اعملها بره في اي مكان محترم
اللعب كله في العفشه
و العفشه مافيهاش اي تكنولوجيا زيها زي اي عربيه عاديه
الفرق بس بيبقي في حجم المقصات و حاجات بسيطه
انما 10 الاف جنيه كتييييييييير

يا اما تظبطها برا يا اما تبيعها

بقولك هوه الدكسيون تقل نتيجه فصل الباور وبقى زى العربيه وهيه مطفيه
ولا تقل التقل بتاع العجل وهوه مش مضبوط او حدفه الزوايا ؟؟
اصل لو كان الاول اعتقد انك محتاج واحد متخصص فى الباور الكهرباء ولا ايه رايكم يا جماعه ؟؟؟

أسف علي التأخر في الرد

بالنسبة للتأمين لا أنا ماكونتش مأمن عليها
و الفصب مش فاصل باور لإن الدركسون بيكون عادي لما بأجيب أخر الشمال أو اليمين لكن بيكون تقيل في النص

انا مش عارف بصراحه انا ما أعرفش حد برا التوكيل ممكن أثق فيه و كل تجاربني السابقه في العربيه القديمه لا تبشر بالخير و الوالد شايف أني مأصلحهاش بره التوكيل و بيقول العربيه لسه جديده و هما هيرجعوها زي ما كانت و تبقي تخلي بالك بعد كده لكن ماتخليش حد يلعب فيها بره علشان ما تفتحش و تبقي عند الميكانيكيه كل يوم دا كان رأيه

ليا واحد صاحبي كان معاه بونتو و العربية دخلت منه في بلاعة كان الغطا بتاعها مقلوب لفوق و جابت زيت من تحت
راح التوكيل قالولو 14 الف جنيه و ناس نصحته يضغط عليهم و كانت النتيجة ان العربية اتعملت ب 3600ج و برضو في التوكيل بس بدل ما قالولو ان كل حاجة هتتغير صلحو بعض الحاجات و حاجات تانية غيروها و في حاجات قالولو يعملها برا عند ناس هما يعرفوهم
حاول تروح التوكيل و تتكلم معاهم و تقولهم كدا كتير و انا مش هغير علبة الدريكسون و شوفولي حل و ربنا يسهلك الخير

هو طبعا الرقم دة وهمي...
ودة ببساطة لان التوكيل اول مقاسية بيعملها هي تغيير التالف...يعني ما بيعملش اصلاح..
طبعا زي ما الاخوة قالو...انت ممكن تروح وتفهم منهم لية العلبة كلها هاتتغير...ولو في طريقة لاصلاح جزء معين او حتي استيرادة مخصوص يبقي افضل....وان شاء الله ..العربية هاترجع زي الاول واحسن...

قدر الله و ما شاء فعل
زاي ما الاخوة اتفضلوا و قالوا .....تاخد مقايسة من التوكيل و تمسك بند بند تفصصوا..... إيه اللي ممكن يتصلح و إيه اللي يتغير ....و اللي يتغير بكام و ممكن أجيبوه منين من بره..(ده اللي أنا عملته زمان في موقف مشابه حصل معايا أيام الفليشيا و ما كانش بقالها كام شهر ).........ربنا معاك

اقتباس:

---

المشاركة الأصلية كتبت بواسطة محمدعيسى

ليا واحد صاحبي كان معاه بونتو و العربية دخلت منه في بلاعة كان الغطا بتاعها مقلوب لفوق و جابت زيت من تحت
راح التوكيل قالولو 14 الف جنيه و ناس نصحته يضغط عليهم و كانت النتيجة ان العربية اتعملت ب 3600ج و برضو في التوكيل بس بدل ما قالولو ان كل حاجة هتتغير صلحو بعض الحاجات و حاجات تانية غيروها و في حاجات قالولو يعملها برا عند ناس هما يعرفوهم
حاول تروح التوكيل و تتكلم معاهم و تقولهم كدا كتير و انا مش هغير علبة الدريكسون و شوفولي حل و ربنا يسهلك الخير

---

الكلام ده مظبوط
معظم التوكيلات في المقايسه المبدئيه بيفترض ان كل حاجه هاتتغير
عشان كده بيطلع رقم هلامي في الاول
لكن اقعد مع المهندس وفهمه ان انت عايز تلم التكلفه ولو حاجه هاتتصلح وترجع مكانها يبقي اوكيه

السلام عليكم

أولا أسف قوي علي التأخير بس النت كان مقطوع عندي للأسف
المهم الحمد لله النهارده روحت أستلمت العربيه من التوكيل و أندهشت لما قالول المطلوب 2800 جنيه بس :)

الحمد لله علي كل شيء لما سألتهم إيه الي حصل قالولي علبة الدركسيون طلعة سليمة و شوية حجات تانيه كده كنا هنغيرها طلعت سليمه فا سبناها
فا الحمد لله خلصت علي 2800

ألف شكر ليكو كلكوا علي الإهتمام و المشاركه و ربنا ما يجبش لحد حاجه وحشة إن شاء الله

طب الحمد لله انها جات علي قد كده
الف الف مبروك:)

حلو اوى 2800 مقارنه بالرقم الاولانى :)

خلى بالك بقى وربنا يحفظهالك .. معلش هيا عين واخدتها

الحمد لله
و شكرا قوي يا حازم و حسام و ربنا يوفقكوا إن شاء الله