السلام عليكم كنت راجع من العين السخنة فى اجازة يومين كدة تغير جو خاصة بعد علقة الامتحانات
المهم كنت راجع على طريق الجيش (القطامية -العين السخنة) والصراحة الطريق ممتاز و امان جدا ولما وصلت عند محطة الرسوم وانا داخل على القاهرة لقيت مجموعة واقفة وبتسألنى لو فية شكوى من الطريق فوقفت واكلمت معاهم وقلت ليهم ان الطريق ممتاز
المهم راح قالى انت كسبت معانا هدايا و سحب (طبعا انا عارف انة نصب واشتغالة) بس الولاد صدقت وفرحت اننا كسبنا و كما الدخول على سحب عربيتين بس الشرط ان لو كسبنا العربية تكون بأسم المدام فطبعا لما المدام سمعت كدة صممت اننا نشترك فى السحب
طلبوا 50 جنية تأمين وكارنية النادى و كان الشرط حضور حفلة تانى يوم الساعة 7 حيتم السحب ونكسب الاجهزة وسحب على العربية و دعوة للعشاء فى مطعم مع التأكيد ان موظف من الشئون الاجتماعية حيحضر الحفلة و السحب
المهم رحت فى الميعاد طبعا لافى حفلة ولا زفت بس رجعولى 50 جنية و الكارنية و كان المطلوب ان احضر لمدة ساعتين اسمع شرح المندوب وبعد كدة خزائن الجوائز تتفتح
طبعا الموضوع اصبح واضح انة اشتغالة بس المدام صمممت اننا نحضر (حتكسب عربية باسمها)
ابتدى الشرح وكانت البنت عمالة ترغى فى حاجات اى كلام لغاية ما الواحد دماغة ورمت والمهم بعد كدة اتضح انة تيم شير لقرية زبالة فى العين السخنة والاسعار غالية
كنت خلاص مش قادر و عايز امشى وكان عدى ساعتين و ربع ودى عمالى ترغى فى هبل قلت لها يا تقولى السعر كام يا اما حقوم امشى قالت اصل السعر لازم المدير هو اللى يقولة
بعد شوية جة واحد وقالى على السعر قولتلة حفكر وارد عليكم و ابتدت بقى الغلاسة بتاعت البيع ، دة عرض لقطة ازاى ترفضة طيب اية اسباب الرفض وكلام سخيف و الصراحة انا اتخنقت وبعد كدة قام علشان البنت تكمل معانا تانى
رحت قايم وقلت لهم انا مش فاضى لتضيع الوقت دة كلة وجة المدير وقلتلهم انا ماشى لان الاسلوب معجبنيش وضيعت وقت على الفاضى و مش عايز سحب ولا جوائز
فكل اللى يرجع من الطريق دة لا ينخدع من موضوع الجوائز لان كلة نصب