-
سؤال كوميدى شوية
السلام عليكم يا أهل بروتون:
أتمنى تكونوا فى أفضل حال، عندى كام استفسار واتمنى اعرف ردكم لأنكم أهل خبرة
الحمد لله معايا Gen-2 2013 بقالها 4 شهور بس مش بخرج بيها كل يوم فنصحونى أهل الخبرة إنى أسخنها من ربع لنصف ساعة كل يومين أو ربع ساعة كل يوم لتجنب فقد شحن البطارية ( حصلت معايا مرتين قبل كدة لما سبتها يومين من غير ما سوقها أو أسخنها :( والبطارة نامت ) السؤال دلوقت:
1- هل التسخين ده مش مضر للسيارة ؟ وانا بسخنها فعلاً لمدة ربع ساعة على 20000 rpm والدنيا كويسة الحمد لله ، فهل كدة تمام ؟
2- النهاردة وأنا بدور حول العربية كالعادة للفحص السريع قبل ما أركبها لقيت غطاء البلف للعجلة الخلفية اليمنى (مش موجود ) !! والعجلة هواها شكله مضبوط ( مش نايمة) فبصراحة معرفتش أعمل ايه أروح لمحطة بنزين ولا بتاع كاوتش يقيس ضغط الهواء ويحطلى غطا تانى ولا خطر أمشى بيها كدة وأروح أجيب غطا الأول وبعدين أبقى آخد العربية للفحص ؟
3- حيث أنى اشتريت بطارية جديدة ( جافة ) ولها ضمان ( قصة يطول شرحها ) ، هل لازم كل شهر أروح اتشيك شحنها وشحن الدينامو عشان احافظ على الضمان زى ما قريت فى بعض المنتديات ولا أروح بس عند الضرورة ( لا قدر الله ) ؟
معلهش طولت عليكم وفى انتظار ردكم الكريم لأنى عايزة أخرج بيها بكرة إن شاء الله
بتمنى لكم أجازة نهاية أسبوع سعيدة
.... ملحوظة أنا رحت لمركز عصام وصفا لما اتكرر موضوع البطارية ولقيتهم ناس فى منتهى الاحترام والكفاءة زى مذكرتم و عملوا تشيك على العربية ساعتين ونص ليكون فى تسريب وملقوش حاجة الحمد لله [/FONT][/COLOR]
-
وليه بتعتبر الأسئلة دي كوميدية؟؟ دي مهمة جداً خصوصاً البطارية ومتابعتها تجنباً للمقالب البايخة بتاعة البطاريات الجافة.. وبالنسبة للكاوتش فالمسألة بسيطة خالص روح لأي بتاع كاوتش وتخليه يفحص البلف لربما يكون بيسرب ولو مفيش تسريب هايزود الهوا ويركب غطا.. ولو فيه تسريب ها يغير البلف ويركب برضه نفس الغطا اللي هو هو مكان نفس نفس الغطا القديم.. بس خلاص
-
موضوع التسخين ده اتكلمنا عليه فى المنتدى كتير
بتسخينك للعربية المدة دى كلها انتى كده بتبهدلى علبة البيئة catalytic converter
لو قريتى الكاتالوج هتلاقيه كاتبلك ان التسخين بيكون فى حدود 30 ثانية وبعدين تتحركى بالعربية بس متعديش الـ 3 rpm على كل نقلة لحد ما توصل الحرارة لدرجة التشغيل العادية
-
بلاش تسخين كل يومين زي ما بعض الناس نصحوا .... ده غلط و أستهلاك بنزين بدون أي داعي .
ممكن مشوار حلو كل أسبوع مرة واحدة و البطارية تشحن فيه و مش هاتحتاج أصلا تسخنها يوميا .
انا دلوقتي بقالي فترة كبيرة قوي بأستخدم العربية مرتين بس في الأسبوع و البطارية تمام .... أهم حاجة بس ما نشغلش أي نور أو اضاءة و العربية مش دايرة .
بالنسبة لموضوع غطا البلف
الموضوع بسيط ........ كشف عند بتاع كاوتش محترم ....... و تأخد بالك انه مش بيخرم في الكاوتش علشان يعمل عليك شغل
علشان فيه بتوع كاوتش تروحله علشان يظبط الكاوتش .... يخرملك العجلة و يقولك عندك أخرام و يفتح عليك فتحة و يخرب الكاوتش.
و بلاش موضوع التسخين ده نهائي .
-
وعليكم السلام ،،
1- موضوع انك سبتي العربية يومين من غير ما تسوقيها ولقيتي البطارية نامت دة معناه ان كان في حاجة غلط ، وتقريبا كانت المشكلة فى البطارية القديمة مادام بتقولي انك كشفتي على العربية عند عصام ومفيش تسريب كهرباء .
2- حكاية انك تروحي تكشفي على البطارية كل شهر ، لو مفيش حاجة فى شهادة الضمان بتقول انك لازم تكشفي عليها كل شهر ، يبقي مش ضروري واذا حصل حاجة لا قدر الله فى البطارية يبقي هتتغير ضمان ، اما لو كان فى شرط فى شهادة الضمان يبقي يفضل تكشفي عليها لحد ما الضمان يخلص.
3- بالنسبة موضوع تسخين العربية ربع ساعه وهي واقفة.
شحن الدينامو بيكون أكثر كفائة و العربية ماشية مش واقفة ، فلما تشغلي العربية ربع ساعه دة تسخين للموتور بدون داعي ، والاحسن انك تقضي بالعربية المشاوير الصغيرة مثلا تجيبي بها الطلبات من سوبر ماركت بعيد عنك شوية ،واذا مكنش فى مشوار عندك ، يبقي الاحسن تتحركي بالعربية 10 دقائق مثلا "كل يومين ثلاثة"وترجعي تركنيها تاني. وتسخين العربية يكون دقيقة بالكثير.
3- موضوع غطاء البلف دة مش مهم اوي ، فى بتوع كاوتش بيرموا الغطا بعد ما يضبطوا الضغط ، فالأول روحي عند ضبط الهواء فى البنزينة لو لقيتي الدنيا كويسة والضغط طبيعي او قريب منه يبقي الكاوتش تمام و البلف مش محتاج تغيير وممكن تلاقي عنده غطاء مرمي ، و اتحركي عادي بالعربية ومفيش خطورة ولا حاجة والغطا دة تجبيه براحتك فى اى وقت.
-
موضوع ان البطارية تنام لو العربية مامشيتش كل اسبوع مش مضبوط ...كده تبقى البطارية عايزة تتغير
ان ساعات باسافر شهر و اركن العربية و عادى ...مفروض البطارية تنام لو اكتر من 3شهور
بلاش تسخين اكتر من دقيقة ...و تدوير المارش بعد ما صوت انذار حزام الامان يخلص علشان المحافظة على طرمبة البنزين
-
أشكركم جميعاً على اهتمامكم ونصايحكم الغالية ، بإذن الله هروح أكشف على العجلة والبلف وبالنسبة للبطارية هتأكد من الضمان وأمشى بيها مشاوير صغيرة بدل التسخين
Content Relevant URLs by
vBSEO 3.6.0 PL2