نصيحة السيد زكى بتاع التكيف فى اسكندريه
السلام عليكم ورحمة الله وبركاتة
النهارده روحت وقولت اتوكل على الله واشحن التكيف بما ان الحر عمال يشد ومش عارف اروح مشاوير الصبح بسبب الحر واوقات بفكر اسيب العربيه واقضيها موصلات لانه حر وسواقه اعوذ بالله
المهم انا عندى مشكلة وهى ان فى مساوره بايظه اللى من السربانتينه لفلتر الزيت
فقولتله نغيرها او نشتريها
قالى ما ينفعش هتصرفلك فيها وهتكلف 180 جنيه قولتله اه
قالى وفلتر الزيت دخل فيه تراب وهيتغير قولتله اه ازاى بقى
قالى كده مدام دخل فيه تراب يتغير قولتله ويعمل كام قالى 220
قولتله اه لا كتر خيرك قالى ايه كانه مستنينى اوافق قولتله لا كتير مع السلامه
قالى فكر
واخدت بعضى ومشيت روحت اسئل على الماسوره ما لقيتش منها فكانت نصيحة الناس ليا هى الكبس وكانت نصيحه من قبل وانا عند الميكانيكى وانا طنشته واتارى هو معاه حق
روحت واتكلت على الله وكبستها ب 75 جنيه فقط لا غير
يعنى هو كان هيأخد بس زياده فى الماسوره حوالى 110
وانا متأكد ان فلتر الزيت ان شاء الله سليم لانه حتى ما مدش ايده عليه ولا عرف ايه اللى فيه
وركبت الماسوره وان شاء الله هشحنه بليل من ابن خالى هو شغال فنى تكيف فى اسكندريه للبترول وشحن تكيف عربية مره قدامى وكان زى الفل هخليه يكبسلى وبعدين نشحن ان شاء الله
بس بجد انا كنت رايح للسيد عن طريق المنتدى لانى شوفت ناس شكرت فيه بس باللى عمله معايا ده بصراحه ولا ليه اى لزوم ده غير اللى شغال معاه والنفخه اللى هما فيها واستحملت قولت مش هتفرق ولا ليهم حاجه عندى بس والله كلهم زفت
