الأول نورت قسم هيونداي يا باشا
أنا هقولك على رأيي في العربية بناء على عشرة مع العربية دي دامت 8 سنين و 204 ألف كم
أنا كان معايا أكسنت 2005 من الزيرو و لسه بايعها أول الشهر ده
بالنسبة للسعر حسب حالة العربية بس 47 ألف رقم مبالغ فيه
يعني لو العربية فابريكة بالكامل بره و جوه و حالتها ممتازة مش محتاجة مصاريف و كم معقول في حدود 120 ألف كم تعمل أخرها خالص 44-45 الف جنيه
*المميزات:
1- سيارة اعتمادية قليلة الأعطال
2- استهلاك بنزين ممتاز تعملها جوه البلد حوالي 230 كم في الصفيحة لو مضبوطة
3- سهلة الصيانة عند أي حد و قطع غيارها موجودة عند البقال و ببلاش
4- سحب السيارة جيد جدا لحد 80 كم/ساعة و تحس أنها طلقة في التسارع أول في تاني
5- عفشة طرية مريحة في المشي
6- تكييف أداؤه ممتاز (الهيونداي كله تكييفه حلو)
7- حجم السيارة معقول مناسب لأسرة صغيرة
8- زوايا الرؤية من الزجاج الأمامي و الخلفي و المرايات الجانبية ممتازة و تحس أنك شايف الطريق كله من كل ناحية كويس
9- مفيش حاجة اسمها العربية بتسخن - مؤشر الحرارة اخره التلت حتى لو درجة الحرارة 45 و ماشي في عز الزحمة عجلة عجلة على الغيار الأول
*العيوب:
1- الكنبة اللي ورا ضيقة شوية بالذات لو الكراسي الأمامية رجعت للأخر
2- شنطة السيارة حجمها صغير
3- التسارع من بعد ال 100 كم/ساعة بطيء و بعد ال 120 بطيييييييء
4- العربية ثابتة لحد 120 كم/ساعة بعد كده الثبات بيقل بعد ال 150 أنت و حظك
5- لو راكبين 4 أفراد بالغين في العربية هتوطى جامد معاك و لازم تاخد بالك مع كل المطبات
رأيي الأجمالي في العربية أنها ممتازة مقارنة لسعرها فعلا ممتازة
لو أنت مش في مقدرتك تجيب حاجة جديدة زيرو توكل على الله و هات الأكسنت عربية فعلا مريحة
بس أهم حاجة في المستعمل أنك تلاقي عربية حالتها فعلا حلوة
مناسبة لأسرة صغيرة مش للأسر الكبيرة
أتمنى أني أكون قدرت أفيدك
المفضلات