الموضوع: مقارنة غريبة شويتين

المشاركة الأصلية كتبت بواسطة ehabspc

السلام عليكم و رحمة الله و بركاته و كل عام و انتم بخير

أنا فى البداية أحب أقولكم انى كنت خلاص على وشك أجيب الجين 2 و فجأة عرفت ان الواجا كامبرو نزلت و روحت شوفتها
بالغضافة لكل كماليات الجين 2 تزيد عنها المالتى فنكشن و الكاسيت التحفة و طبعا وسع الشنطة و الصالون و الباركينج سينسور

يعنى نفس الصاج و نفس الموتور وكماليات اعلى
و تخيلوا نفس السعر كاملة أوتوماتيك ب 90000
طب يا جماعة انا كنت لاقيت ان الجين 2 بتتباع فى إنجلترا ب 11000 استرلينى حد يصدق

معقولة عربية تنزل عندنا أرخص من سعرها برة
ما بالك ان الواجا سعرها المفروض أعلى طب تنزل بالسعر ده إزاى؟؟؟؟

و الله يا جماعة اللى محيرنى دلوقتى هوة أسعار قطع الغيار و كمان سعر إعادة البيع
كل اللى أرجوه نصيحة لوجه الله من واحد بروتوناوى يكون خبير بالعربية و أكيد حيكون متابع أخبارها يدلنى ع الصح

و آسف على انى طولت عليكم و انا تحت أمركم

مين قالك إن كماليات الواجا أكتر من كماليات الجين 2
الأثنين تقريبا متساويين في الكماليات ما عدا حاجتين

الجين 2 الأوتوماتيك فيها مثبت سرعة و الواجا مش فيها
الواجا فيها سي دي ام بي ثري و الجين 2 أوديو بس

--------------

روح اتفرج على الأثنين و اللي تعجبك أتكل على الله و أشتريها
بالنسبة لإعادة البيع
الجين 2 أحسن علشان منتشرة أكتر و ليها زباين أكتر
و بالنسبة لقطع الغيار
الواجا الجديدة فيها موتور جين 2 و بالتالي قطع الغيار تشترك فيها السيارتين من حيث قطع غيار المحرك
إنما قطع غيار العفشة و الحاجات التانية مش عارف
و لكن أعتقد برضه مش هاتفرق كتير و أسأل في التوكيل برضه

و قطع الغيار متوفرة خارج التوكيل و جوه التوكيل و السيارتين بينتشروا دلوقتي إنتشار كويس و معاهم بيزيد تواجد قطع الغيار
و أدخل قسم البروتون و أفتح المواضيع هناك عن قطع الغيار و أماكن تواجدها
و ربنا معاك
و في الآخر
الجين 2 شبابي أكتر من الواجا
الواجا عائلية أكتر من الجين 2

شكرا

الله ينور عليك يا استاذنا و عمدة البروتون

انا كنت حاسس ان حضرتك اول واحد حيرد عليا

الصراحة انا الواجا هى اللى تناسبنى أكتر بس المشكلة الوحيدة شكلها الكلاسيك شوية و أنا روحت شفتها بالمحرك الكامبرو

طيب انا لاحظت حضرتك ان فى فرق بين السيارة داخل البلد ( سيارة مدينة ) و فى السفر

زى الياريس مثلا و الهوندا سيتى يقولوا عليهم بتوع مدينة مش سفر

اما الجين 2 و الواجا الكامبرو اكيد عشان نفس المحرك بيقولوا ان امكانيتها و عزمها و توفيرها للبنزين بيظهر بس على الطرق الطوالى

فهل الفرق ده مهم اوى و بيأثر على استهلاك الموتور و عمره
علما بأن ان كل مشاويرى داخل البلد

صحيح كمان ايه لغز ان سعرهم عندنا أقل من السعر اللى بتتصدر بيه لانجلترا

هل اللى بتنزل عندنا ايه حكايتها؟؟؟ هل ده معقول

أستاذ أيهاب ....... أهلا بيك
بالنسبة لأسئلة حضرتك
طبعا قيادة داخل البلد دائما
يبقى على طول عربية 1300 ......
لا أنت محتاج قوة الموتور في حاجة و لا محتاج ثبات
و لكن محتاج توفير بنزين
طبعا دي نصيحة أخوية ............ لك أن تأخذ بها أو لا و أيضا حسب أحتياجاتك

يعني الموتور الكامبرو حلو قوي في إستهلاك البنزين أكتر على الطرق الطوالي و معقول داخل البلد
يعني داخل البلد بيعمل تقريبا 10 كم لكل لتر بالتكييف
و أعتقد أن 1300 هاتزيد شوية و ممكن تبقى بتاع 12 أو 13 كم لكل لتر

بالنسبة للفرق ما بين إستهلاك البنزين بين النوعين
أنا وضحت قبل كدا و كمان فيه موضوع مفتوح في قسم البروتون فيه إستهلاك الجين 2 للوقود داخل و خارج المدينة

طبعا شكل الواجا كلاسيك أكتر و ده بقى اللي يقدر يحدده أنت فقط

بالنسبة للعربيات اللي بتنزل أنجلترا و أختلاف الأسعار
هاتلاحظ إن الجين 2 أو الواجا هما العربيات الوحيدة اللي بينزلوا السوق المصري أرخص من برة
أنا في الحقيقة معنديش تفسيرات كتيرة للموضوع
إلا أن
التوكيلات في مصر للسيارات الأخرى التي عليها طلب تقوم برفع الأسعار كما يحلو لها لأن سيارتها مطلوبة و بالتالي أرباح أكثر على حساب العميل و لكن العميل مبسوط و بيدفع ......... يبقى التوكيل يعمل اللي هو عايزة
أما بالنسبة للبروتون
فهي ماركة غير مشهورة و بعض الناس أساسا ميعرفوش يعني أيه بروتون
فتوكيل عز العرب ميقدرشيرفع السعر دلوقتي
ممكن يرفع لما يكون عليه طلب عالي قوي زي العربيات التانية و ده بيحصل تدريجيا
و بالنسبة للنسخة اللي أنت شوفتها في انجلترا دي نسخة فيها فرش جلد و أوتوماتيك