ما مدى إمكانية تركيب immobilizer للعربية ؟

**Walid_M** · 23-05-2013 03:24 AM

الإخوة الأعزاء
بعد التحية ...

مع التزايد الكبير لسرقة السيارات وأشهرها مؤخراً النترا وكمان الاوبترا في إسكندرية تحديداً وغيرهم .
بدأ الجميع في إتخاذ بعض الاحتياطات التي تؤمن العربية ..
من تركيب جهاز إنذار لقاطع للمارش لقاطع لطرمبة البنزين والأقفال ................. الخ

حتى جهاز التتبع أنا شايفه غير عملي مع التراخي الواضح من الشرطة !!!

يعني ممكن لا قدر الله العربية تسرق ولا يكتشف صاحبها سرقتها إلا بعد عدة ساعات !!!

ولو حددت مكانها فين الشرطة اللي حتروح تجيبها !!!
أو ممكن تؤجر كتيبة إعدام لتحرير السيارة !!!

هذا لا يمنع من جودة الجهاز ... إنما أنا شايف ال immobilizer هو آمن شيء للعربية وصعب تجاوزه إلا بالونش ودي صعبة نوعاً ما !!!

نيجي للمهم بقى !!!

المنتدى ما شاء الله به العديد من الخبراء في كافة المجالات ...

عايزين بقى نفكر ونحاول تنفيذ فكرة إضافة نظام ال immobilizer للعربيات اللي بدون !!

وخصوصاً إن العربيات دي بيبقى فيها موديلات بها immobilizer في فئات أخرى أو حتى الخليجي !!

أنا لما بحثت قليلاً في الموضوع لقيته ممكن التنفيذ وليس مستحيلاً !!
لكن المشكلة إنك تقدر تنفذ بتكلفة إقتصادية !!!

عذراً على الإطالة ... وأتمنى من الجميع التجاوب ..

تحياتي ...

**aymanshebl** · 23-05-2013 06:10 AM

والله هو ممكن يتنفذ بس مين اللى هيركبه التوكيل اللى مش عارف يسد فى صيانة العربية الاعتيادية و لا الكهربائية اللى بيفتو و كمان لو العربية لا قدر الله اتثبتت الايمبولايزر هيفيد فى ايه؟

**el diesel** · 23-05-2013 07:27 AM

سيدى الفاضل الخطر الحقيقى دلوقتى هو التثبيت على الطريق و السرقة بالاكراه ولو حضرتك متابع هاتلاقى ان تقريبا يوميا فيه على الأقل عربيتين بيتسرقوا على الطرق داخل القاهرة
الحل مؤقتا هو انك تاخد احتياطاتك كلها من " قفل دريكسيون خامة نضيفة - مفتاح فصل كهرباء - جهاز انذار - غطاء للعربية " وبعدين تستودعها لله فهو خير حافظاً

**ahmedalaahosny** · 23-05-2013 08:04 AM

كلامك مظبوط فعلا ماهو لولا التوكيلات ربنا يسامحهم هما اللى بيشيلوا ويحطوا ويعملها فئات عشان يكسبوا ماعلينا هو ممكن بس انت عايز واحد محترف جامد عشان مايلخبطش ف حاجة لان فكرة الايموبليزر ان العربية مابتدرش الا بالمفتاح الاصلى لان جواه تقريبا نص الشريحة والكونتاك جواه النص التانى فبتدور لانى جربت الاسبير ومادارتش ف جالينا اكسكلوسيف بتاعه الحاج

**Elawany13** · 23-05-2013 01:00 PM

طيب مش مفتاح الفصل يعتبر امبولايزر بس فلاحى ههههههههههههه ؟

**SYD** · 23-05-2013 04:29 PM

المشاركة الأصلية كتبت بواسطة Elawany13

طيب مش مفتاح الفصل يعتبر امبولايزر بس فلاحى ههههههههههههه ؟

بالظبط كدة

فكرة الأيموبلايزر بتعتمد علي 3 مكونات لازم يكونوا عندك في العربية

1- كنترول للعربية ecu (موجود في المحركات التي تعمل بالحقن)
2- قارئ للشفرة (code reader)
3- شفرة في المفتاح

الثلاثة علي بعض بيكونوا نظام الحماية immobilizer

يوجد في المفتاح شريحة (في سماكة عود الكبريت وبطول لا يتعدي ال0.8 سم او 8 مل) بيكون عليها شفرة
وفي قارئ للشفرة بيكون موجود في العربية - هذا القاري متوصل بكابل في نهايته scanner حول الكونتاكت - وكابل أخر موصل القراءات إلي الecu
اول حضرتك لما تحط المفتاح في الكونتاكت بيشتغل الscanner وبيعمل مسح للشفرة الموجودة علي المفتاح ويرسلها للقارئ اللي بدوره بيطابقها بالشفرة المخزنة عليه
ويرسل كل الdata للكنترولر سواء بالتوافق matching او لا error
وبعدها بيقرر الecu يوصل الكهرباء لأدوات الأدارة (طرمبة بنزين + رشاشات)

لو حاولت تدور العربية بمفتاح مصطنع
هتدور ولكن في خلال من 2-3 ثواني هتبطل تاني
ليه ؟؟
انت لو دورت بدون شفرة هتحاول العربية تدور ميكانيكال فقط ولكن بدون اي دعم للبنزين

اتمني تكون الفكرة وصلت

وفكرة عواني بتاعة مفتاح الفصل - تعتبر الأصل في عمل الأيموبلايزر ولكن بشكل بدائي
يعني لو قدرت تقطع أمداد البنزين إلي الرشاشات او الكاربراتير بفكرة حلوة وسهلة واتوماتيكية زي المفتاح المشفر هتبقي بالظبط عندك ايموبلايزر بيتي

تحياتي