تقرير تركيب عمود الاتزان للوجان .. صور + تست درايف

مساء الخير على جميع أعضاء منتدى نايل موتورز و وحوش اللوجان الكرام .. يارب تكونوا جميعا بأفضل حال و بخير .. النهاردة هاحكى عن تجربتى الشخصية فى تركيب عمود الاتزان للوجان مانيوال موديل 2011 .. طبعا كلنا عارفين ان عمود الاتزان موجود فى اللوجان الاوتوماتيك لكن مش موجود فى المانيوال بالرغم من اهميتة لأتزان العربية .. خصوصا للناس اللى بتسافر كتير زيى لانة بيزود اتزان العربية فى الملفات الحادة على سرعات عالية


مكان التركيب :

توجهت الى مركز خدمة أوتو ألفا .. و دة مركز خدمة معتمد من هيونداى لكنى لقيت عربيات كتير بتعمل صيانة هناك زى فيات و سوزوكى و كيا .. و مركز الخدمة موجود فى طريق النصر - مساكن صقر قريش - المعادى الجديدة .. لو انت جاى من مدينة نصر او مصر الجديدة هاتاخد الاوتوستراد و بعدة طريق النصر على طوووول كأنك رايح حلوان لحد ماتلاقى الدائرى بتاع المنيب معدى فوقك كمل من تحته حوالى 100 متر و ادخل الحارة البطيئة هاتلاقى قدامك كوبرى مشاة و جنبه مركز الخدمة

http://nileup.com/up/uploads/nilemotors_13695596171.jpg


خطوات التركيب :

استقبلنى المهندس المسئول عن المركز و اتكلمنا عن موضوع عمود الاتزان و أكد اهميتة .. تم رفع العربية و شفت مكان تثبيت العمود فى المقصات و القنطرة

دى صورة العمود نفسه
http://nileup.com/up/uploads/nilemotors_13695591541.jpg


و دى صورة مسامير الاتزان اللى بتثبته فى المقصات
http://nileup.com/up/uploads/nilemotors_13695587782.jpg


و دى القفايز و الجلب اللى بتثبته فى القنطرة
http://nileup.com/up/uploads/nilemotors_13695591542.jpg


تم تركيب العمود فى ساعة تقريبا بدون فك القنطرة و دة شكل العربية بعد تركيب العمود


http://nileup.com/up/uploads/nilemotors_13695599781.jpg


http://nileup.com/up/uploads/nilemotors_13695599782.jpg


تكلفة التركيب :

هى التكلفة غالية و الاسعار فلكية لكن تظل اقل من اسعار التوكيل ( اخر سعر فى التوكيل 2700 او 3000 جنية تقريبا )

عمود الاتزان ---- 950 جنية
مسامير الاتزان --- 280 جنية
قفايز ---- 360 جنية
مصنعيات ---- 300 جنية ( المصنعية شملت اصلاح فرق فى الاكصدام)
____________
الاجمالى 1890 جنية


تجربة العربية بعد التركيب :

التجربة شملت القيادة داخل القاهرة (الطريق من حلوان لمصر الجديدة) و خارج القاهرة ( طريق الكريمات الصحراوى و طريق الصعيد الصحراوى المنيا- اسيوط و الطريق الزراعى اسيوط - سوهاج ) بما يعادل 900 كم او 13 ساعة قيادة .. نعومة العفشة لم تتغير مازالت خشنة نوعا ما كذلك الثبات فى الطرق المستقيمة جيد جدا انما الفرق حسيته فى الملفات الحادة على الصحراوى و الزراعى .. ميل العربية فى الملفات قل جدا و الثبات زاد بشكل ملحوظ .. خاصة الملفات اللى سرعاتها تجاوزت ال 130 كان الثبات ممتاز و واضح .. بشكل عام انا راضى جدا عن اداء العربية و انصح بتركيب عمود الاتزان كوسيلة امان للعربية و ليس للجرى و الغرز .. أتمنى اكون قدرت اساهم فى افادة الأعضاء ولو بقدر ضئيل و ربنا يحفظنا جميعا

تقرير رائع .. الف مبروووووك يا وسيم وربنا يباركلك فى عربيتك ويرزقك خيرها
والطلعة الجاية الكاوتش حتنبسط اكتر والعربية حتفرق معاك اكتر ان شاء الله
العمود دة الاصلى زى بتاع الاوتو ولا مختلف عن الاوتو ؟؟؟

عموووور فينك يا راجل من زمان ليك وحشة .. الله يبارك فيك يا حاج ربنا يخليك .. العمود و مسامير الاتزان أصليين إنما القفايز مش بتوع اللوجان للأسف بس انا استشرت ميكانيكي رينو وأكدلي ان مفيش مشكلة والعمود راكب مظبوط .. انا بجد كان نفسى اغير الكاوتش بس لقيت التكاليف هاتزيد فاقلت اخليها مع صيانة العشرين اكون استهلكت البريلانتس شوية .. تصدق رحت للراجل بتاع الجنوط اللي ف شارع 45 ف ميامي لقيت طقم الجنوط التايوانى ب 3600 و فيه حاجات ب 3800 ؟!

ألف مبروك ..

الله يبارك فيك يا دكتور

الف مبروك يا وسيم و خطوة 100 100 و انا عارف قد ايه انت كنت مصمم عليه =)

عاوزك تظبط الكام صورة اللي مش باينين و ترفعهم على موقع تحميل نايل موتورز علشان عاوز اثبته

الله يبارك فيك يا حاج محمود .. انا فعلا كنت مصمم على الخطوة دى من زمان خصوصا عشان السفر الكتير على الصحراوى .. بس يا اخى الصور كانت واضحة فى النهار وانا رافعها كلها من نايل اب .. لية اختفت ؟؟؟ .. عموما الصور اهى

مسامير الاتزان

http://nileup.com/up/uploads/nilemotors_13695895621.jpg


قفايز و جلب التثبيت فى القنطرة

http://nileup.com/up/uploads/nilemotors_13695895632.jpg


بس انا مش عارف ارجعهم فى الموضوع تانى .. لو تتعب ظبطهم انت بقى

ألف ألف مبروووووووك يا وسيم باشا أخيراً ركبته ياراجل :)
متشكرين جداً على التقرير الممتاز وربنا يباركلك في العربية
أنا كنت متأكد انت هتركبه :) الموضوع مغري بس مكلف نسبياً

العمود جبته منين والمسامير والجلب دى

الف مبروك وربنا سترها على الجميع

اقتباس:

---

المشاركة الأصلية كتبت بواسطة porsche911tt

ألف ألف مبروووووووك يا وسيم باشا أخيراً ركبته ياراجل :)
متشكرين جداً على التقرير الممتاز وربنا يباركلك في العربية
أنا كنت متأكد انت هتركبه :) الموضوع مغري بس مكلف نسبياً

---

الله يبارك فيك يا كبير وعقبالك إن شاء الله .. هو فعلا الموضوع مكلف جدا بس هايزود ثقتك في العربية و أهو أمان لو سرحت و دخلت ملف بسرعة ..

اقتباس:

---

المشاركة الأصلية كتبت بواسطة blackhorse123

الف مبروك وربنا سترها على الجميع

---

الله يبارك فيك يا استاذ احمد ومتشكر لمساعدتك ليا انك عرفتنى بالمهندس شريف .. بالرغم من انى ماحستش بنعومة في العفشة أو موضوع ان العربية متكتفة بس فرق الثبات علي الطريق واضح ومحسوس

اقتباس:

---

المشاركة الأصلية كتبت بواسطة mohmmedzohier

العمود جبته منين والمسامير والجلب دى

---

بص يا باشا العمود نفسه استيراد متاخد من لوجان تانية لكن المسامير والقفايز جديد .. والقفايز مش بتاعتها لكن تؤدي الغرض

مبروك عليك . و عقبال الكاوتش .

اقتباس:

---

المشاركة الأصلية كتبت بواسطة frhateg

مبروك عليك . و عقبال الكاوتش .

---

آمين يارب .. مع صيانة ال 20 إن شاء الله .. متشكرين لذوقك ياباشا

ازاي يا باشا سفرياتك كتير بالعربيه و لسه مكملتش 20000

بص حضرتك انا مش باتحرك بالعربية داخل سوهاج خالص .. بافضل المشى كنوع من الرياضة .. انما استخدامى للعربية للسفر سوهاج - المنيا 200 كم أو سوهاج - القاهرة 500 كم .. و انا باسافر المنيا مرة كل شهر أو شهرين و القاهرة بالكتير مرتين فى السنة .. والعربية موديل 2011 يعنى مالحقتش تمشى هى حاليا عاملة 14300 كم .. بس أدى الحكاية ..

لو كلنا بنفكر زيك كده مكنشى هيبقى فيه ازمة مرور ابدا

الناس برضه معذورة يا استاذ عمرو .. أقل مشوار فى القاهرة من بيتك لشغلك 20 30 كم .. و لو هاتخرج بالليل مع اصحابك نفس الحكاية .. وكل بيت اصبح يملك عربيتين و تلاتة .. وماحدش بيرضى يوصل حد عشان مايتعطلش جنبه .. لازم الدنيا تزحم والمرور يتشل .. والناس خلقها يضيق و العربيات تخبط فى بعض .. تصدق انا الاسبوع اللي قعدته في القاهرة يمكن خرجت بالعربية 3 4 مرات و باقى الاسبوع بالمترو .. يا راجل اروح من اشارة روكسى لسيتى ستارز ف ساعة إلا ربع ؟! و الساعة 11 بالليل يعنى مش وقت ذروة ولا زحمة

20 30 كيلو بين البيت و الشغل يا وسيم يبقى قريب

انا المسافة بين بيتي و شغلي 55 كيلو رايح و زيهم جاي =d

اقتباس:

---

المشاركة الأصلية كتبت بواسطة gebreel

20 30 كيلو بين البيت و الشغل يا وسيم يبقى قريب

انا المسافة بين بيتي و شغلي 55 كيلو رايح و زيهم جاي =d

---

لا يا محمود انت ربنا يوفقك .. هانت يابنى .. كلها 10 كيلو و توصل جنوب افريقيا ..

الله ينور عليك يا باشا

اقتباس:

---

المشاركة الأصلية كتبت بواسطة lawerxx10

الله ينور عليك يا باشا

---

علينا و عليك يا باشا .. متشكر لمرورك

الف مبروك يا باشا مع انى ليا تعليق على الاسعار بس يا جماعة الاسعار مبالغ فيها والحاجات دى تيجى اقل من كدة بكتير لان المسامير دى مثلا بتاعة الكليو زى اللى عندى بالظبط وعمود الاتزان ده مش غالى كدة عند زعتر وممكن اديلك رقمه تسال عليه والمصنعية استعباط
اسف والله بس انا كتبت الكلام ده علشان لو حد حب يكرر التجرية
كمثال المسمارين دول ب 50 جنيه
اوعى تزعل بس المركز ده غالى اوى !!

ياريت لو حضرتك تدينى تفاصيل أكثر رقم زعتر ده و الموضوع كل ممكن يتكلف كام

ألف مبروك يا باشا

الله يبارك فيك يا حاج .. متشكر لمرورك

يعنى معنى كده ان الرينو لوجان بتتنزل من غير عمود اتزان اصلا

طب هل النيو لوجان من غير عمود اتزان برضه ؟
و هل ده نوع من انواع التوفير يعنى ؟

اقتباس:

---

المشاركة الأصلية كتبت بواسطة diesel

يعنى معنى كده ان الرينو لوجان بتتنزل من غير عمود اتزان اصلا

طب هل النيو لوجان من غير عمود اتزان برضه ؟
و هل ده نوع من انواع التوفير يعنى ؟

---

رينو لوجان أتوماتيك بتنزل بعمود اتزان . نيو لوجان لم تنزل أوتو حتى الآن ولا أعرف أخبار نيو لوجان مانيوال

العربيتين الوحيدين الى نزلوا من غير استبليزر.....اللوجان مانيوال والصنى EX القديمة
و انا معايا صنى القديمة و عملت زيك و ركبت استبليزر امامى و خلفى
و الف مبرووووووووك :Bravo:

جميل جدا فى الملفات على سرعات عالية .. خصوصا لما العربية تعوم و تيجي تلمها بيفرق جدا