الموضوع: عملت شكوى فى مركز العبور !

النهاردة الساعة 5 و نص اتصلت ب 16101 و عملت شكوى فى مركز العبور لتباطؤهم و عدم استجابتهم فى موضوع المساعدين الخلفي للأكسنت rb

الملخص: عملت صيانة ال1000 يوم السبت 18 مايو و المهندس قاللى المساعدين مش موجودين و ادانى نمرته عشان اسأل كمان اسبوع عليهم، كلمته مش بيرد، كلمت فرع العبور مش بيرد، كلمت قسم قطع الغيار -مش فاكر اسمه بالظبط- قاللى المساعدين موجودين فى فرع اسيوط، قمت مكلم 16101 و عملت شكوى عشان يجيبولى المساعدين للعبور و احدد معاد لتركيبهم

التفاصيل:
يوم السبت 18 مايو عملت صيانة ال1000 و طلبت تغيير المساعدين المهندس قاللى مش موجودين و هنربط العفشة و خلاص، قولتله ييجوا امتى؟ قاللى اسبوع و دخلت العربية للصيانة و اما خلص سألته على نمرة عشان اتابع قاللى فى ال5000 بقى !! قلتله انت قلت اسبوع، قام مدينى نمرة موبايل بتاعته المفروض، بعد اسبوع بتكلم طبعا مش بيرد !

امبارح الاحد 26 بكلم 16101 و بسألهم عاوز اسأل على المساعدين الخلفيين للاكسنت rb عشان مكانوش متوفرين فى صيانة ال1000 فى العبور، قالولى حاضر فى حد هيتصل بيك فى خلال 3 ساعات، فعلا فى واحد اتصل بيا من قسم قطع غيار او مبيعات او حاجة كده لأنه بيقوللى المساعدين متوفرين ب 800 و شوية، قلتله مش عاوز اشترى دول بيتغيروا فى الضمان !! قاللى كده انت مش تبعى كلم المكان اللى بتعمل فيه صيانه قلتله العبور قاللى معندهمش بس موجود فى فرع اسيوط، و قفلت معاه

كلمت 16101 تانى و حكيت القصة كلها تانى بأخر مكالمة، قالولى خد نمرة العبور كلمهم، البيه ادانى نمرة غلط و كنت هتهزء على إنى بعاكس !

كلمت 16101 تالت مرة و حكيت كل حاجة تااااااااااااانى، و طلبت منهم يخلوا العبور يكلمنى ! قالولى الساعة دلوقتى 4:30 ف هيكلموك بكره قبل الظهر، قلت ماااااشى !

النهارده استنيت لحد 1:30 و كلمت 16101 للمرة ال -بطلت اعد يا جيمى- و حكيت كتاب حياتى يا عين، قالولى طيب هنخليهم يكلموك فى خلال 3 ساعات برضه !! قلتلهم و لو متكلموش؟ قالولى كلمنا نعمل شكوى

و قد كان ! 5:30 كلمت 16101 و سمّعت الشريط و طلبت عمل شكوى و فعلا عملت شكوى رقمها 3732 و مفروووووض حد هيتابع معايا خلال 48 ساعة ان شاء الله

واضح ان فى تكاسل رهيييييب و عدم الرغبة فى تغيير المساعدين ! و محدش يقوللى مش زمبهم دى المساعدين خلصوا عشان دول خلصانين من شهر او اكتر و كان مفروض يعملوا حسابهم و يطلبوهم تانى من بدرى

العبور فرع جميل طول ما انت معندكش طلبات غير عادية، غير كده زيو زى اى مكان تانى.

المشاركة الأصلية كتبت بواسطة mahmoud_afifi

واحد صاحبي عاوز يجيب مساعدين مونرو (غبور وكيلها دلوقتي) و البيه غبور بقاله كذا شهر مابيجيبش مساعدين. وهو عاوز يعمل شكوى فيه.
تقريبا انت هتعاني من نفس المشكله ! والله اعلم
ربنا معاك وخليك وراهم يانت يا هما :d

انا نفسى طويل الحمد لله :d

المشاركة الأصلية كتبت بواسطة toty_305

-أي كلام صدقني مغيرهم بعض أكثر من 10 آلاف كيلو و مفيش أي مشكله و العيب عيب مساعدين بس على العموم براحتك

هخسر حاجة لو ماسبتهمش من غير ماخد حقى؟

المشاركة الأصلية كتبت بواسطة khaledccie

انا كان ليا تجربة معاهم قريب من بتاعتك بخصوص التاخر في وصول قطع الغيار

انت هتعمل لهم شكوى في ال call center لكن اطلب منهم انهم يحولك للمدير ومش تكلم اى واحد لانه هيضيع وقتك ويبدا معاك من الاول ولن تستفاد شئ ولو بعد مية سنة

ثانيا اعمل المشكلة على موقعهم على الفيس بوك

ثالثا لو مفيش نتيجة روح لهم ابو رواش وقابل مدير قطع الغيار ومدير غبور نفسة

وانسى موضوع انك تبعت ل هيونداى كوريا لانهم ولا هيرودوا عليك بحاجه

دية الخطوات الصحيحة لو عاوز تجيب حققك وعن تجربة غير كدة يبقى بتضيع وقتك وحقك

سلام

اتمنى محتاجش اعمل كده بس عموما الف شكر عالنصيحة