السلام عليكم ورحمة الله وبركاته
زى العنوان بالظبط كده
لو جالك واحدة من معارفك وطلبت منك ان تاخد ابنها الرضيع اللى يمكن عمره ميتخطاش ال 3 شهور تربيه
لان عندها توأم وهى تعبانة شوية ومش قادرة على الاتنين
هتوافق ولا هترفض !!!
عرض للطباعة
السلام عليكم ورحمة الله وبركاته
زى العنوان بالظبط كده
لو جالك واحدة من معارفك وطلبت منك ان تاخد ابنها الرضيع اللى يمكن عمره ميتخطاش ال 3 شهور تربيه
لان عندها توأم وهى تعبانة شوية ومش قادرة على الاتنين
هتوافق ولا هترفض !!!
حصلت مع جماعه قرايبنا من بعيد
وبروا البنت تربيه الخدامين
ولا تغذيه كويسه ولا تعليم
:eee:
فى ناس تتمنى
طبعا اوافق من ناحيه ربنا هيرزقك برزقو من ناحيه من فرج عن مؤمن كربه من كرب الدنيا من ناحيه ولد صالح يدعو لك يعني شجره عصافير ده لو كنت تقدر
هو صعب لان الام موجوده وهيكون فيه عذاب للطرفين
للام الوالده
والام المربيه
حصل امامى مرتين حتى عمر معين و رجع للاصليين مرة اخرى بس بعد ماتربى بطباع مختلفة و لم يندمج مع الابوين الحقيقين و نفسيا اعتقد انة و ضع صعب و غير مقبول لمجتمعاتنا
مش قادرة يعني ايه؟؟ مقدرة مادية يعني؟
اذا كان الوضع مؤقت ولمدة لا تزيد عن سنة و نصف من عمر الطفل ليه لأ
بس بيبقى بشروط ووضع تربية معين علشان الطفل ما يتاثرش نفسيا
بس انا جدتى الله يرحمها كانت بتربى 9 من اولادها و ماكنش فيه مشاكل مش عارف الجيل ده فيه حاجة غلط ولا الغلط كان من جدتى :)
ليه لا
كان زمان بيبعتوا اولادهم مع المرضعات عشان يشبوا في ظروف امثل
وكلنا عارفين سيره الرسول عليه الصلاه والسلام
انا هوافق بس بشرط يعيش معايا طول عمره لاني مش بعد لما اربيه واعاملة كانه ابني يجي في وقت ابوه وامه يطلبوه وياخدوه علي الجاهز الاب والام مش اللي خلفو الاب والام اللي ربو وتعبو وسهرو علي راحة ابنهم لحد مايبقا راجل وحتي كمان لما يتجوز ويخلف ويبقا له بيت الاب والام بيفضلو شايلين همه
لو تعبانة ماديا اساعدها و اللى اصرفه على الطفل فى رعيتى اديه لها شهريا
تعبانة من اعباء الاطفال يبقى بتدلع علشان محدش بيرمى ضنه
الاطفال مهما كان محدش هيقدر يربيهم ويديهم كل الرعاية والاهتمام اللي هما محتاجينها في السن دا زي أمهم لأنها هيا اللي تعبت فيهم وشالتهم ف بطنها تسع شهور وتعبت أكتر في ولادتهم فمحدش هيقدر قيمتهم ويخاف عليهم قدها.
مهما كان اللي هيخاد طفل مش هيعاملة بنفس الحب والحنان ببساطة لانه متعبش فيه.
لو راح لمكان يتربي فيه بفلوس هيبقي همهم الاول الربح. ولما ياخدو الفلوس هيدلوة جزء فقط لا يذكر من الرعاية اللي محتاجها والباقي هتبقي معاملة خدامين زي ما الاعضاء ذكرو. او واحد احنا مستحملينه عشان بيدفع علبه فلوس بس وغير كدا ميلزمناش.
الحالة التانية اللي هيا لو ادينا الطفل لحد مش بيخلف من غير فلوس او حتة بفلوس كمساعدة بسيطة في الاول هيبقي حلو وجميل في الاول ونعمة من عند ربنا. لكن،، أول ما يبدأ يعيط الساعة ٢ و ٣ بليل في عز النوم والتعب هيبقي مش حلو ولا جميل وهيبدأ الضرب فيه والشخيط والتلطيش..!!
دا الامهات العادية اللي لسه متجوزين جديد او صغار في السن بيعملو كدا,, أومال اللي مش تعبان فيه هيعامله أزاي.؟!!
لأنه مش بتاعهم دا التفكير اللي هيجي في بالهم ساعتها, ساعة التعب منه والمسؤلية. ولانه جه بسهولة فمش هيبقي فيه خوف عليه زي خوف الام عليه اللي جابته بعد تعب وشوق ليه. وحتي ضحكته اللي هيا المفروض بتفرح قلب الأم الأصلية مش هيكون ليها طعم كبير ولا تأثير بالنسبة لهم زي ما بيحصل مع الأم الأصلية وبيهون عليها كل التعب. لأنهم عارفين انو مش بتاعهم وانو من واحدة غيرهم وبرة عنهم لأم تانية.
الأهم انو لو افترضنا ان الناس عاملوة كويس ودا صعب يحصل اليومين دول في الظروف اللي احنا عايشين والضغط النفسي الكفاية علي كل واحد فينا من البلد. ان الطفل دا لو كبر واتعود علي الام اللي بتربيه و وشوش الناس اللي ربوة مش هيبقي مع أمه بنفس الطريقة.
ولو هما ليهم طباع وحشة هياخدها وهيا هتستغربة وممكن تكرهه وتحس انه مش ابنها ويحصل فجوة ما بينهم. ويبقي الموضوع أصعب.
لان الطفل شخصيتة بتتشكل في مراحل الطفولة من أمه وطريقتها واسلوبها معاه.
لو اتربي مع ناس تانين ف الفترة دي مش هياخد طباعهم ومش هيبقي ابنها.
الطفل مسؤلية أمه. والأم اللي تتخلي عن طفلها اللي عنده ٣ شهور متبقاش أم..
وإلا زي ما ذكر احد الاعضاء هيا كدا بتدلع وكانت واخدة الحمل لعبة او تجربة او منظرة قدام الناس.. وطالما الطفل ومسؤليته مكنش معمول حسابها مكنتش تجيبه من الأساس.
دا جزء منها ومحدش هيربيه ولا يخاف عليه زيها.
صورة شوفتها عال فيس بالصدفة بعد ما قفلت المنتدي. لسه محطوطة أنهاردة حبيت ارجع واشارك بيها ف الموضوع يمكن..
https://www.facebook.com/photo.php?f...count=1&ref=nf
https://m.ak.fbcdn.net/sphotos-a.ak/...54103812_n.jpg
For irresponsible Moms to have Fun,, Children's should be locked up in their Dungeon and Captivated.
الام مش قادرة بسبب المرض عندها ms
وعندا طفل اكبر عمره 4 او 5 سنين
وجابت توأم وشايفة انها مش قادرة وتعبانة جدا ومش عارفة تراعى التوأم ولا حتى الطفل الاكبر
وعاوزة اللى يراعيها هى نفسها لانها دائما تقول مش قادرة
لما قالتلى انا اندهشت جدا من انها بتتكلم جد
وكان سؤالى هتقدرى تبعدى عنه ويكبر بعيد عنك عادى قالتلى اة منا مش قادرة
طيب والاب موافق ومش هيزعل ان ابنه هيتربى بعيد عنه قالتلى اة موافق لانه شايفنى تعبانة ومش قادرة اراعيهم فقالى اللى يريحك
قولتلها طيب هاتى واحدة تسعدك فى البيت قالتلى منا هجيب برضه واحدة تسعدنى عشان الولد التانى والطفل الاكبر
طيب ليه بقا مانتى هتجيب حد يساعدك ليه تفرطى فى ابنك
انا مش مستوعبة بصراحة انى اتخلى عن ابنى مهما كان تعبى
لا حول و لا قوة الا بالله
الناس جرالها ايه
يعني هي فوجئت انها حامل في توام مثلا
و طالما تعبانه قوي زي ما بتقول بتحمل ليه من اساسه
يعني يجيبوا العيال و يرموهم
احنا لو بلد محترم كنت قلت لك بلغي عنها ياخدوا منها العيال
حد بالفكر ده هيطلع عيال شكلها عامل ازاي
و الخوف اصلا انها لو ملقتش حد ياخد منها العيل تبيعه ولا حاجه
ما احنا في زمن ما يعلم بيه الا ربنا
لا طبعا موافيش
جدي الله يرحمه كان بيقول مثل : يامربي في غير ولدك يازاراع في غير ارضك
انا اربي واتعب وفي الأخر يجي ابوه وامه ياخدوه علي الجاهز
لو هي تعبانه تجيب داده (مربيه) تساعدها في شغل البيت وهي تربي العيال او ممكن في الحاله دي جوزها يتجوز واحده تانيه تساعدها
بصي يفندم الحل الصحيح للحالة دي إن زوجها يتجوز تاني وزوجته الجديدة يختارها بمواصفات معينة من التدين والصفات الشخصية مثل الحنية الشديدة والطيبة وهيا تربيله عياله وفي نفس الوقت يقدر هوا يشيل مسؤولية زوجته المريضة "شفاها الله وعافاه وأعانها على تحمل ما هي فيه"
هههههههههههههه
متقلقوش انا متزقعة ان الحل ده يحصل فى اى وقت
هيجيبلها واحدة من الاخوات تساعدها
اوعوا تفهمونى صح ;-)
ربنا يشفيها و يشفى مرضى المسلمين
لو فيه استطاعة مادية ممكن تجيب دادتين او حتى لكل طفل دادة و هى اللى تشرف عليهم و تابعهم او حد من الاهل يساعدها تطوعا خلال الفترة دى او جوزها يدور على انسانة لا تنجب و تراعى ربنا فى اولاده و اللى اتحرم من النعمة اكيد هيقدرها
لكن ليس الحل ابدا انها ترمى ولادها لغيرها مهما كان مرضها لان ده هروب من المسئولية
وفي حل تاني
في حضانات بتاخد من سن 3 شهور من الصبح للساعه 5 او 3 تقريبا اعتقد ده هيريحها اكتر
عندي بنوته واحده بس ومكنتش بتنيمي السن ده
كنت محتاج اوديها لحد يربيها ههههههههههههه
ربنا يشفيها يارب
مرضها صعب جدا زوجتى مصابه بنفس المرض مرحله اولى
دى كده لاتقدر تربى او تراعى حتى من معها فى البيت عندما تأتى لها الهجمات (المرض ده بيحاولوا يطلعوا له علاج بس لسه)
فعلا اللى زيها الموضوع صعب بس الكارثه انها لو تركت ابنها لحد يربيه هتزعل جدا وده هيزيد عليها المرض لان الغضب مدمر فى التصلب العصبى المتناثر
ربنا معاها ويشفيها يارب
ابني لسه رامي دلوقتي القلم بتاع خاله من الدور التامن وراح قاله ياخالو انا رميت القلم من الشباك والقلم نزل علي السن بتاعة واتكسر لو كان نزل علي دماغ حد كان خرمههاله
عيال عايزه يد من حديد عشان تربيها
أستاذة سما, هوا ليه حضرتك مذكرتيش إنها مريضة في بداية الموضوع عشان تاخدي أكبر قدري من المشاركات والاراء من الأعضاء اللي ممكن فكرة منهم تكون مفيدة جدا بالنسبة لها ومجتش علي بالها.
يعني دلوقتي كل اللي قرأ الموضوع في الأول جه في تفكيره انا وباقي الاعضاء انها أم مهملة وغير مسؤلة.
ودولقتي كله بيدعيلها بعد ما كان بيذم فيها.!! بس برضه مفيش حلول كفاية ليها.
أعتقد أنو كان من الأفضل انك توضحي ظروفها من الاول كنتي اخدتي ردود قيمة من الاعضاء اللي شاركو, واراء ممكن تساعدها بدل ما يذمو فيها صفحة ونص ويمشوا من غير ما نسمع رأيهم فالحاجة اللي تساعدها.
وأنا رأيي دلوقتي انها لو كانت هتجيب حد تبقي واحدة كبيرة عشان عنين الزوج مهما كان وعشان مرضها فيمضطرش يبص برة او الشيطان يوسوس له..
والواحدة الكبيرة دي ترعي الولاد تحت اشرافها وقدام عنيها وتكون Full time عشان صحيان البيبي بليل, وتنام في غرفة الأولاد.
او لو الوالد يتكفل بيه في فترة المساء مع ان دا هيكون صعب لظروف شغله بس ربنا يعينهم وييسر أمورهم ويشفيها قريب.
توضيح للمشاركين فى الموضوع لان مرض الام صعب وربنا يشفيها ويهون عليها
مرض ms
او التصلب العصبى المتعدد (المتناثر )
ده مرض ملوش علاج للآن وعلاجه مكلف جدا جدا والعلاج بيكون عباره عن ادويه وابر تأخر هجمات المرض فقط وليس للشفاء (الشفاء من عند الله فى كل حال ) هم يجتهدون لايجاد علاج لانهم يعتقدون من اسباب الهجمات ان جهاز المناعه بيهاجم الجسم نفسه لانه بيعتقد ان تآكل الاعصاب ده ميكروب او اى شىء مضر فجهاز المناعه للجسم بيهاجم الاعصاب
المرض ده ممكن الام فجأه تصاب بعمى مؤقت لفتره معينه
وممكن يحدث لها شلل لفتره معينه ايضا
وفى المراحل المتقدمه شلل وعمى وعلاجه مرهق جدا لوهى بتاخد ابر انترفيرون بيتا
يعنى هى اصلا محتاجه مجهود كبير لتراعى نفسها وقت الهجمات لان بيدربوا المريض انه هو اللى يعطى نفسه الابره تحت الجلد وقت بدايه الهجمه
الدعاء لها ولكل مريض بالشفاء
انا وضحت من البداية انها تعبانة
ولما لقيت الردود فاكرة انه تعب دلع وضحت نوع المرض
وان كنت لازلت مش مستوعبة انهم الاتنين موافقين عادى انهم يودوا الولد يتربى عند حد
خاصة ان الحمل ده مكنش بالساهل وكان فى زيارات للاطباء وسعى ليه
يعنى مادامت هى وزوجها عارفين انها مريضة وانها مش بتقدر تخدم نفسها ولا الطفل اللى عندها
اسعى واحاول اجيب اولاد تانى ليه ؟
عشان ارميهم !!!
مش عاوزة اقول كان كان طفل في التوام مريض وكانت بتدعى انه يموت وتقوله انا بحتسبه عند ربنا
ادخل بيه الجنة عشان انا مش قادرة على الاتنين
مهما كان مرضى مش هدعى على ولادى ولا هتنازل عن واحد منهم
ومفيش حد هيربى طفل زى امه مهما كان
اعتقد انها هتجيب حد يساعدها فى شغل البيت وترتيبه
لكن مش حد مقيم
لا حول ولا قوة الا بالله
ربنا يعفو عنها ويشفيها لولادها وجوزها يارب
ايه نوع التعب؟ لو تعب مادى يبقى ممكن أتكفل بيه وبمصاريفه وهو فى حضن أمه
ولو تعب جسمانى ممكن أتكفل بمربية تربى الاتنين مع بعض فى بيت أهلهم برضه
لكن انى أخد الطفل عندى وأربيه صعب جدابالذات لو أنا عندى أولاد لأنى عمرى ماحاساوى بينهم فى المعاملة وبالتالى حاظلم الطفل وأسبب له مشاكل نفسية
والمثل بيقول :يامربى غير ولدك يابانى فى غير ملكك
أنا رديت أول مرة من غير ماشوف المشاركة دى..عموما يبقى الحل انى لو ظروفى تسمح أجيب لهم مربية وأتكفل بأجرها ومصاريفها وأساعد أهل الطفل بمبلغ شهرى لو غلابة .... أو الحل التانى زى ما اتقال ان جوزها يتجوز واحدة تانية وياسلام لو كانت عاقر أو من أهل الزوجة ويشترط عليها تربية الأولاد
وربنا يشفيها ويشفى كل مريض
الموضوع ده كان منتشر في القرن الماضي
انا اعرف ناس كانو مربيين اطفال في وسط اولادهم
اما لانهم ايتام
او لعدم مقدرة الاب والام الاصليين ماليا
لكن دلوقتي الموضوع دع شبه انقرض