الموضوع: تقرير عن هيونداي i10 2013 و صيانه ال 1000 في مركز العبور

السلام عليكم جميعا
الحمد لله و الصلاة و السلام علي رسول الله

و بعد رحله بحث مطوله لعربية للمدام و بعد لف و دوران و سماع اسعار عجيبة و عربيات بحالات اعجب استخرت ربنا و قررت اجيب زيرو و امري الي الله و اهو تبقي حاجه مضمونه

المدام عندي مصممه علي حاجه تكون صغيره و اوتو و مكيفه و وقع اختيارها علي البيكانتو لكن لما لقيت انها وصلت ل 99 الف جنيه قلت لها يفتح الله و اتجهت الي اقرب بديل ليها و هي ال i10 و فوجئت برضه انها وصلت ل 85 بعد ما كانت ب 77 قبل هوجه الدولار و لان السعر يعتبر قريب من اسعار المستعمل اللي كنت بسمعها فتوكلت علي الله و جبناها
و للعلم عرفت ان سعرها وصل 90 الف بس موديل 2014

و طبعا كل ما تيجي الفرصه باخد العربية و ده تقريري عنها بعد استخدام 1500 كيلو و تقرير عن صيانة ال 1000 في مركز العبور

1- الشكل الخارجي:
العربية تصميمها عادي مش حلو و مش وحش و بيادي الغرض و العيب الوحيد فيه ان تحس ان السقف عالي حبتين و التصميم العام يميل للميني فان اكتر منه للهاتش باك
و الفيس لفت اللي عملوه و الفوانيس اللي بقت شبه فوانيس الالنترا بالشبكة الجديدة خلوا منظرها احلي و هجومي شويه و طبعا العربية نازله بجنط حديد و طاسات و في رأي الجنط السبور و خصوصا لو مقاس اكبر من ال 13 اللي راكب عليها هيخلي شكلها احلي

2- الانتريور:
الانتريور بسيط جدا و مفيهوش أي جديد
هي بس الحليه اللي في منتصف الطبلون اللي بلون مختلف اللي مديه لمسه شياكه للعربية و شخصيا عاجبني فتحات التكيف الدائرية في الاجناب و الكاسيت اللي راكب هنا طبعا مبوظ المنظر العام
و مساحات الجلوس كويسه و مناسبة انا طولي 182 سم و بقعد في الامام كويس و خلف نفسي ببقي مضايق شويه خصوصا و ان ظهر الكرسي عالي و مفيهوش تفريغات للركب لكن الاقصر مني مفيش مشاكل
و ضعيه الجلوس اقرب للميني فان و ال suv منها للصالون و تقريبا شبيه قوي بوضعيه الجلوس في الباجيرو مع الفارق طبعا :) و الكراسي الاماميه شكلها حلو و رياضي لكنها مش مريحة قوي خصوصا في المسافات الطويلة و ميزتهم انهم جلد و قماش

3- المحرك:
العربية نازله بمحرك 1100 سي سي 70 حصان في رأي كافي جدا للعربية
التسارع لا باس بيه بالنسبة لحجم المتور و استجابته في الاول ضعيفة لكنه بيبقي كويس بعد كده و جبت بها 160 و ده تقريبا اخرها هههههه
و في فيديو لتسارع العربية اخر الموضوع

4- القيادة:
طبعا العربية city car بامتياز و الباور كويس و مناسب للزحمة و حجم العربية مساعدها برضه
العفشه في رأي ناشفة حبتين و الكراسي مزوده الاحساس ده و العربية بتمييل للتنطيط شويه و خصوصا من الخلف و طبعا ده بسبب التورشن بيم و خفه وزن العربية
لكن النشوفيه دي مساعداها في الملفات و خدت بيها ملفات لا باس بيها و العربية مقالتش لا مع ميلان بسيط و في رأي لو وضعيه الجلوس اوطي حبتين مكنتش حسيت بحاجه لكن في نفس الوقت العربية مبتحبش الغرز خالص و ردود فعلها للتغير المفاجئ في الاتجاه مش ظريف ابدا لكن ده لا يعيبها لأنها مش مخصصه لكده اصلا
الفرامل كويسه و لا باس بيها و طبعا لا abs و لا يحزنون و علي قد العربية و عيبها انها مش قد كده علي السرعات العالية و لو ضربت فرامل جامد علي سرعة العربية بتحدف و العيب الثاني هو ال fading و ده طبيعي في عربية في الكاتيجوري ده
و ارتفاع العربية مناسب جدا و الحمد لله مش بتحك في مطبات و طبعا زي كل الهيونداي تقريبا مع الحمل بتنزل من ورا لكن مش لدرجه انها تحك

5- الكماليات و وسائل الامان:
و لااااا الهوي معاك ربنا

نيجي بقي للعيوب و ده طبعا من وجهة نظري

1- اولا العربية بتنزل من غير سنتر و لا انذار و اكيد ولا امبولايزر و التوكيل مش بيركبهم ولو ركبتهم بره هتطلع من الضمان
2- العربية نازله من غير أي buzzer للتنبيه يعني لو نسيت نور او باب مفتوح بالسلامة كده
3- الكاسيت اللي نازل فيها نوعه جولدي حاجه نص كم و السماعات نازله قدام بس و صوتهم في الضياع و طبعا لو غيرت الكاسيت او ركبت سماعات تانيه انت كده بره الضمان
4- طبعا كون العربية هاتش بالك و حسب قوانين الايرودينامكس أي تراب او مايه بتدوس عليها هتطلع علي الزجاج الخلفي و خصوصا ان العربية من غير دلايات و طبعا مفيش مساحه خلفيه لان دهب يعتبر كماليات هنا في مصر و ده طبعا يلزم انك تركن عشان تنظف الزجاج الخلفي لو جت عليه حاجه و كتر خيرهم انها نازله بسخانات
5- درج الطبلون من غير كالون و غير مضاء

نيجي بقي لصيانه ال 1000
طبعا اتصلت و خدت معاد و كان يوم الجمعة و كان ميعادي الساعة 10 في فرع العبور
رحت طبعا في الميعاد و كنت رقم 39 و المهندس استلم مني العربية و سالني عن أي مشاكل و فك وش الكاسيت و الولاعة اداهم لي و قالي افضيها من أي حاجه مهمه و طبعا سالته علي تركيب الانذار و السنتر و كان نفس الرد انه مينفعش و سالته علي الفوجات و برضه مينفعش و الغريب انها تقريبا مش موجودة إلا عندهم يعني لو عايز اركبها لازم اشتريها من عندهم و اركبها بره و طبعا هطلع بره الضمان
المهم طلعت الاستراحة كانت زحمه و لقيت مكان بالعافية و كان ملاحظ ان في عائلات كتير مش عارف عشان يوم جمعه و لا صيانة العربية بقت فسحه المهم قعدت ساعة و ربع عقبال ما العربية دخلت و طبعا صيانة ال 1000 عباره عن تغير زيت و فلتر و تربيط عفشه و رجلاش للفرامل و دمتم و الغريب ان العامل اخد اكتر من ساعة و نص في عمل ده و الملاحظ لكاعه في الشغل و كل شويه مش عارف يروح يجيب ايه و يجي و يرغي مع اللي جنبه و هكذا
بعد كده العربية طلعت من الصيانة و المفروض انها راحت الغسيل و برضه بعد ساعة و كل ما اسال يقول لي معلش الدنيا زحمه و في الاخر نادوا علي رقمي نزلت للمهندس اداني امر الدفع و التكلفه كانت 350 جنيه و ده تمن الزيت و الفلتر و المصنعيه مجانا و دفعت و طلعت استلمت العربية و المفاجاه لا اتغسلت و لا يحزنون و هي اصلا كانت نظيفة بس ضيعوا عليا حوالي الساعة علي الفاضي و انا كنت زهقت فمرضتش اشتكي و خدت العربية و مشيت
الخلاصه ان مركز العبور ده من بره هلا هلا و من جوه يعلم الله و ماشيين بمبدأ الصيت و لا الغني و انا عارف انه ممكن يكون صرح بالنسبة لتوكيلات تانيه بس مع احترامي انا اتعاملت في الكويت مع مراكز بربع الحجم بتاع مركز العبور ده لكن بنظام و كفائه اعلي بمراحل

في النهاية اتمني التقرير يكون عجبكم و ادعوا لي بالستر و ان ربنا يبعد عنا سواقين النقل و الميكروباص و التكاتك
و اسيبكم مع الصور و الفيديو

الشكل الخارجي









الطبلون


الكرسي


اقصي سرعه




فيديو التسارع من 0-100
[youtube]http://www.youtube.com/watch?v=R98ZuWcP_tw[/youtube]