الفرامل بتزيق في الاوكتافيا كل لما اقف

السلام عليكم
ازيكم يا وحوش
الفرامل في الاوكتافيا عندي كل لما اقف بتزيق تزييقه غريبة كدة مش بتصفر، التيلات كلها جديدة
سألت كذا صنيعي وكل واحد عمال يفتي برأى وانا لايص في النص
واحد قالي العربية محتاجة تتغسل من تحت
والتاني قالي التيلات اللى ورا محتاجين يتغيرو مع انهم جداد
واخيرا صنيعي قالي رش عليها اسبراي مش عارف اسمه ايه كدة هيظبطهالك عند اي مركز خدمة سيارات

يا تري دى تكون من اية يا رجالة ؟
وانهي الصح في كل الفتي والهري دة
انا مبقتش اثق في كلام الصنيعية بمليم صراحة من ساعة ما غيرت البطارية والكتاوت

لو صوت التزييق اللي بتتكلم عليه ده وانت واقف و بتتحرك سنة سنة ...و الصوت غليظ...ده عادي جداً و موجود تقريباً في كل العربيات...ماتقلقش منه يعني

جايز يكون فيه اتربة فعلا حصلت معايا ولما غسلت العربية كويس الصوت راح

حاول تبدأ بالاسهل اغسل العربية ومش هتخسر حاجة

عندى الصوت دة ومفيهوش قلق

اقتباس:

---

المشاركة الأصلية كتبت بواسطة nadernabil

لو صوت التزييق اللي بتتكلم عليه ده وانت واقف و بتتحرك سنة سنة ...و الصوت غليظ...ده عادي جداً و موجود تقريباً في كل العربيات...ماتقلقش منه يعني

---

تمام كدة
وكمان لو التيل مش اصلي هيصفًر وكمان ساعات حته تراب بين التيل والطنابير ممكن تعمل كدة أغسل العجل والطنابير جامد في اي بنزينه وشوف كدة

لأ أنا فاهمك أكيد الصوت دا عامل زي صوت تقريط على ربط مسمار أو ما شابه

وبيظهر لما تكون راجع من مشوار والفرامل سخنة بس

مظهرش عندي غير لما خرطت الطنابير للأسف ........... ياريت حد يساعدنا

مع العلم ان الصوت يزيد وكأنك بتزود التقريط عالمسمار مثلاً كل ما تدوس بقوة أكتر على الدواسة مع نفس الضغطة الأولى


يعني هيا ضغطة واحدة بس كل لما تزود قوتك بتزيد التقريطة

انا عندي نفس الصوت ده قدام و روحت لمكانيكي فكينا التيل سليم بس قالي التيل ناشف اول مرة اسمع عن حاجة اسمها تيل ناشف اصلا المهم سنفرهولي وبعدينن مشيت بيها تقريبا شهر مسمعتش الصوت خالص وبعدين رجع تاني وسعات يطلع صوت وسعات لأ كبرت دماغي قولت هيسنفر التيل تاني آلاقيه خلص خالص قولت مش مهم لما يجيب أخرو اغيرو واريح نفسي والله اعلم كلامو صح ولا لأ

الصوت ده عندي ورحت للتوكيل كذا مرة و قالي عادي مفيش مشكلة

ابدا بالاسهل وانك تروح تغسل العربية وتشوف الصوت لو راح يبقى كان شوية تراب وخلاص لو مراحش اعتقد ممكن يكون نوعية التيل وحشة

راجع ضغط الكاوتش زي ما مكتوب علي الباب

عادى جدا وهيروح ويجى تانى وهتسمعه اكتر مع التكييف مفيش منه قلق

انا كان عندي الصوت ده يوم الاربعاء اللي فات و اول مرة يطلعلي فرحت لمركز الخدمة اللي بتعامل معاه فك العجلة اليمين و صنفر التيل و نضف الطنابير بالهوا المهم ركب و مشيت جربت شوية و مكنش فيه صوت و بعد كده رجع تاني بعدها بنص ساعة المهم طلعت بيها مشوار طويل ( سفر يعني ) تقريبا شبه راح مسمعتهوش من يوم السفر .