عندي مشكلة بعد ما رفعت العربية بالكوريك التمساحة

**thegoodhacker** · 22-08-2008 11:53 PM

بعد ما رفعت العربية بالكوريك التمساحة النهاردة لقيت ان جزء من صاج الارضية تحت رجلي الشمال لقيتها قبت وبقت عاملة كده زي هضبة مش كبيرة اوي بس مضايقاني ....... فسالت احد اصدقائي فعرفت ان المفروض كنت احط الكوريك تحت العتب و انا ما كنتش اعرف و دخلت الكوريك جوة شوية ناحية الارضية ........
فدلوقتي اوديها لسمكري ولا حينفع ادق عليها ولا ايه الحل ؟ و السمكري حيضطر يفك فرش الارضية ؟ و حتكلفني حوالي كام ؟

**Ahmed Samy** · 23-08-2008 12:29 AM

ولا يفك ولا حاجة هما كام رزعه على الأرضية بفرشها كده بيرجعوها

المهم شكلها من تحت لو عدلة أساسا يبقة مفيش مشاكل ولو فيها عالي وواطي أساسا غالبا مابلرجعش زي الأول بس عادي ماتعيبش العربية ولا هاتحس بيها

**Adham** · 23-08-2008 09:19 PM

حصلت عندي في الهوندا زمان

رحت للسمكري حط حتة عرق خشب كبيرة عالارضية (قورمه) و خبط عليها بالمرزبة كام خبطة أتردت لمكانها زي ماكانت

**mohamed ibiza** · 23-08-2008 09:37 PM

زي ما الاخوة قالولك مش لازم يفك ولا يحزنون هو يديها بالبوكش كده و هترجع زي الاول:):)

**tamim** · 23-08-2008 09:50 PM

معلش بمناسبة الكوريك اما جيت ارفع العربية رفعت من العتب تحت الباب الشمال على طول
المهم جيت افتح الباب اتفتح بصعوبة شوية ولما جيت اقفله ما اتقفلش علشان الكالون ساب المجرى اللى المفروض يعشق فيها بمعنى اصح الباب رحل شوية ولما نزلت العربية الباب رجع زى الاول بالظبط
ده بقى عادى ولا الشاسيه فيه حاجه وان كان عادى ايه اللى خلى الباب يعمل كده

**Ahmed Samy** · 23-08-2008 10:16 PM

لو العربية موديل قديم يبقى عادي ..كلهم بيعملوا كده و خصوصا الفيات

انما لو عربية من الجداد يبقى في مشكلة

**tamim** · 23-08-2008 10:21 PM

العربية 2007
انا عايز تفسير ياجماعة ضرورى

**thegoodhacker** · 23-08-2008 11:22 PM

الف شكر لكل من شارك بالرد و ان شاء الله اوديها للسمكري يوم الاتنين ........ بس كنت عاوز اعرف حياخد مني في حدود كام ؟

**medohai510** · 24-08-2008 10:16 AM

السلام عليكم،،،
يا جماعة نصيحة لوجه الله تعالي محدش يرفع العربية من العتب أو من الدواسات (الأرضيات) ولا كمان الشاسيه، أحسن وأسلم طريقة للرفع من المقص الأمامي أو الخلفي حسب المطلوب، والمعلومه دة قالي عليها واحد بتاع كاوتش وكمان لما تنزل العربية بالتمساح متفتحش مسمار التهوية بسرعة علشان العربية متنزلش بسرعة مرة واحدة وتأثر علي المساعدين والله الموفق.