ايه افضل طريق للترقى فى العمل النفاق ام الاجتهاد ؟؟؟؟

عاوزنين نتناقش فى الموضوع ده
بحكم خبراتكم
ايه اقصر طريق للترقى فى العمل؟؟
إن الواحد ينافق اصحاب الشغل؟؟
ولاّ يجتهد فى شغله و يسيب الباقى على ربنا؟؟
ولاّ يعمل الاتنين مع بعض؟؟ ولو انه صعب تلاقى حد يكون مجتهد و منافق فى نفس الوقت
انا شوفت قدامى ان النفاق و الكذب هو اقصر طريق للنجاح فى الشغل.
و ان الواحد لو كان مجتهد فى شغله بس مش بينافق و مش بيدى حد اكبر من حجمه ؛ بيكون مش مستحب وجوده خصوصا من رؤساءه.

مش المفروض ان صاحب العمل بيبقى ليه شغل ياخده؟؟
و ان الموظف ليه مرتبه بياخده و خلاص على كده؟؟
طب تخيل نفسك شغال فى مكان (وصعب انك تشتغل فى غيره الايام دى)
ولقيت ان المنافقين والxاس هم اللى واخدين وضعهم
و الناس اللى فى حالها مهمشين
هتعمل ايه؟؟
هتنافق زى اللى بينافقو؟؟
ولاّ هتفضل مستمر على مبدأك؟؟
ولاّ هتسيب الشغل ده وتقعد فى البيت تستنى حاجه تناسب اسلوبك وشخصيتك؟؟
اتمنى تكون اجابتنا واقعية الواحد يقدر يطبقها

ملحوظه
النفاق فى العمل مقصود بيه كاذا حاجه منها:
1:الكذب
2:المجاملات الباهته ووصف الاشخاص بما ليس فيهم
3:تدبير مؤامرات على اشخاص بعينهم للتخلص من وجودهم
4:كسر الروح المعنويه لمن يراه مجتهد و ملىء بالحماس حتى لا يتفوق عليه
وحاجات تانيه كتير انتو اكيد عارفينها

العمل

صدقنى عن تجارب كتير
الشغل بأمانه وبدون نفاق او رياء هو اللى هيخليك تنجح
اوعى تبص للامثلة اللى بتنافق وبتشوفها بتنجح لان نجاحها وقتى فقط
انت بتعامل ربنا فى شغلك فالأول والاخر وحتى لو مشوك من الشغل لانك مش بتنافق فثق تماما انك هتمشى وضميرك مرتاح وربنا راضى عنك

وده لا يمنع طبعا بعد المجاملات الرقيقة لرؤسائك فى الاعياد والمناسبات وفى العمل والثناء على جهودهم فى العمل ولكن بدون تمادى او نفاق

وخليك عارف انك بتعامل ربنا فى الاول والاخر ولا تغضب ربنا لارضاء بشر

الاجتهاد ومعامله الله والاخلاص والضمير هما الصح لكن مش دايما هوه اللي بيكون الحل السريع بمعنى ان الموضوع بيختلف حسب شخصيه المدير وازاي هوه نفسه وصل لمنصبه. لو وصل بالنفاق يبقى لازم تنافقه عشان يرقيك ولو وصل بالاجتهاد هيدي المنافقين على دماغهم ويشجع المجتهدين. وفيه ملحوظه مهمه جدا وهيه ان لو المدير هوه مالك العمل هيكون استجابته أكتر للمجتهدين لأن في الاخر مصلحته الشخصيه مرتبطه بشكل قوي بمصلحه الشغل.

وفي النهايه المجتهد كده كده مش هيعرف ينافق ولا المنافق هيعرف يجتهد.

مع الاسف في مصر و الدول العربيه و الأفريقية النفاق و الأساليب الملتويه هي اسرع الطرق للوصول الي القمه وده بسبب جهل المديرين و خوفهم من ان يتخطاهم اللي تحتهم لانهم اكثر خبره منهم او احيانا كنوع من التوفير من الاداره حتي انها تستغني عن المدير و تجيب واحد تحته مرتبه اقل و كده كده هو مش بيحضر الذره. كمان من المشاكل الشهيرة ان المدير ما بيحاولش يعمل مسار وظيفي لكل موظف يعني كأنه بيعلق جزره للموظفين و الكل بيسعي للحصول عليها بأي طريقه سواء مشروعه او غير مشروعه و في الحاله دي من الحاجات اللي ممكن توقف الموظف الدين و التربيه لانها بتعمله خطوط حمراء لا يتعداها و بيضطر يستحمل حاجات مستفزه زي ترقيه قرد متملق بدلا منه . في بس نقطه مهمه جدا الواحد لازم ياخد باله منها و هي انه يتقي الله في عمله علشان مرتبه يبقي حلال و يجتهد علي قد ما يقدر و يتعلم شغله كويس فإذا ربنا كرمه و اترقي يبقي خير و بركه و إلا ربنا يرزقه بمكان تاني يقدره و يعوض عليه بفرصه أعلي و احسن من اللي ضاعت منه لان اللي بيترقي بالنفاق و عن طريق عمل المكائد لزملاؤه بيعيش عنده عقد نقص من اللي اقل منه و بيبقي حاقد عليه ده غير انه بيفقد احترامه لنفسه و للي حواليه كمان لانهم حتي وان كانت الناس بتظهر الاحترام لكن من جواها غير كده

بص لا تستطيع ان تخدع كل الناس كل الوقت يعنى الرقاصين بعد فترة بينكشفوا وبيبان الكويس من الرقاص نصيحتى بحكم عملى فى التنمية البشرية اجتهد واظهر عملك يعنى غلف منتجك فى ورق شيك وقدمة بشكل شيك

اكيد طبعا الاجتهاد فى العمل هو اللى هيخليك ترتقى + ان مافيش حد من زمايلك هيقدر يتكلم عليك من وراك ويقول انك وصلت للى انت فية دة بسبب النفاق

وكمان حاجة مهمة اوى , انك تبقى محلل الفلوس اللى داخلة بيتك وعارف انها جاية من تعبك ومجهودك مش من النفاق وانك تاخد مكافأت وتترقى وتاخد فلوس اكتر بدون تعب

- ان بطريقة النفاق انت بتضيع الفرصة على زمايلك اللى ماشيين كويس ومجتهدين فى شغلهم , لان طبعا المدير مش بيبقى شايف غير المنافق لانة بيضحك فى وشة وممكن يعمل نفسة سجادة عشان يمشى عليها صاحب العمل

وربنا يكفينا شر النفاق والمنافقين

العمل و الأجتهاد طبعا بس لازم يكون عندك ذكاء فى التعاملات و لازم تعرف تبين مجهودك و شغلك كويس جدا.. ده مش نفاق .. يعنى مالكش دعوة بشغل غيرك ولا تزر حد ولا تجيب سيرة حد بس لو عملت حاجة كويسة تبينها بما يرضى الله عشان حقك ما يضعش ..

أخي الكريم
موضوع طيب وجميل
دعني أقول لك الاتي :-
إذا أردت الوصول
فهناك طرق ملتوية وهي :-
1- لا تعدّل على مديرك ولاتبيّن أنك أفضل منه .
2- إقتنع بكل مايقوله حتّى ولو كانت بداخلك قناعة داخلية إنه على خطأ
3- إتفق معاه دائما في وجهة نظره حتى لو كان بيتكلم عن الطقس والمناخ
4-إرفع هاتفك وجامله فالمناسبات وألاعياد
5- لا تقم بصداقة مباشرة أمامه مع مع أكبر منه في العمل كي لا بشعر بالحقد والغيرة
6- حسسه دائما ان مجهودك ده ماهو اللي مجرد فكرة انت إقتبستها منه ونفذتها .
ألاساليب الشريفة :-
-1عامل الله ولا تنتظر جاه أو سلطان .
2- حب الناس والبيئة المحيطة بك من اول عامل البوفيه لغايت رئيس مجلس الاداره ولا تقلّل من قيمة أحد مهما كان .
3- بذل الجهد في العمل وجعله في المقام ألاول لأولوياتك .
4- التطلع الى الكورسات والمراجع مما يجعلك في مستوى علم وثقافه قد يصيب من حولك بالحقد تجاهك .
5- كن على خلفية تامة بما يحدث داخل الشركة حتى لو كان بعيدا كل البعدعن مجالك الوظيفي .
6- بادر وتطوّع الى أعمال أخرى حتّى ولو كانت بعيدة عن مجال عملك لأنه يتيح الفرصة لك لمعرفة الكثير والكثير قد يساعد باقي أفراد عملك وحل مشاكلهم ولكن بما لا يضيع وقتك وعملك .
7- حاول دائما ان تكون صاحب وجهة نظر وقدّم مقترحات هدفها ألاساسي هو تطوير الشركة مع ألاخذ بالاعتبار أن تكون هذه الاقتراحات بأقل التكاليف .
8- تواصل مع مديرك بشكل غير مبالغ فيه وحاول ان تقدّم له أفكار جيدة تكون محط دراسة وتنفيذ .

الإجابة تتلخص فى آيه واحدة

( إن الله لا يضيع أجر من أحسن عملا )

وإذا لم تأخذ حقك فى الوقت الحالى فيقينا ستجده فيما بعد هكذا وعد الله لنا يكفيك أن تظل ثابتا على مبادئك

مجتهدا فى عملك وإعلم أنه ما طار طير وإرتفع إلا كما طار وقع فمن إرتفع بنفاق ومداهنة وبسرعة فسريعا ما

يقع ومن إرتفع بجهد وتعب وعرق وتخطى الصعاب فمن الصوبه جدا أن يقع

انتا فى مصر
كدا او كدا هتفضل زى منتا ده اصل لو فى شغل

اقتباس:

---

إذا أردت الوصول
فهناك طرق ملتوية وهي :-

---

اقتباس:

---

-إرفع هاتفك وجامله فالمناسبات وألاعياد

---

هو كده يبقى طرق ملتويه؟؟
غير متفق معاك تماما

مش عايز أقول حكم ومواعظ وكلام انشا..فيه أماكن شغل مابينفعش فيها غير النفاق..لكن تذكر انك مش حاتستمر طول عمرك فى مكان واحد..وعن تجارب كثيرة الشغل بجد وأمانة هو اللى حايفيدك مهنيا ونفسيا ويزود فرصك تنقل مكان أحسن

اقتباس:

---

المشاركة الأصلية كتبت بواسطة beshomilan

هو كده يبقى طرق ملتويه؟؟
غير متفق معاك تماما

---

انا بقول وجامله
كتير منا بيكون مديره معكنن عليه
ومع ذلك بيعمل كده فالمناسبات والاعياد
لا أتكلم عن المعايدة الحقيقة
يارب تكون وجهة نظري وصلت

اشتغل بجد بس خلى عندك لباقه و ذكاء اجتماعى بحيث تقدر تبين شغلك من غير ما تتحسب على اللى بيزرو الناس و ميتقالش عليك تنك و تلاقىهم شغالين فى سيرتك من وراك خصوصا لو المدير وش ذلك

من ارضى الناس في سخط الله سخط الله عليه واسخط عليه الناس ومن ارضى الله في سخط الناس رضي الله عنه وارضى عليه من اسخطهم في رضاه
في النهايه عامل ربنا ولا تعامل الناس

فى فرق بين الحاجة الصح. . .و بين الواقع. . . اراء كتير من أخوة اللى ردوا اكدتلك على الحاجة الصح. . . انا برضه كنت فاهم كده لما ابتديت حياتى العملية و ده الطريق اللى مشيته. . . لكن بعد 15 سنة شغل. . . اقدر اقولك بكل صراحة. . . ان الواقع بيقول ان اللى الوصول لشئ فى شغلك مش شرط يكون طريقه الشغل. . . لكن الطرق التانية بتوصل اكتر و اسرع. . . لو واحد بيوصل بسبب شغله بيوصل قدامه اربعة بالطرق الملتوية. . . طب تعمل ايه لو انت من النوع اللى بينقرض و مازال بيعتقد ان الشغل الجد هو الطريق الحقيقى لكن مش هتلاقى تقدير و هتشوف ناس تانية عمالة تتنطط حواليك و انت محلك سر. . . ساعتها عزاءك هيبقى انك بتراعى ضميرك وتعمل الصح. . . على رأى استاذ غسان :-)

عن تجربه شخصيه
الاجتهاد ثم الاجتهاد واتقان عملك وخاطب كل من هو امامك بقدر عقله
وانا فى عملى الذى اتقنه واحترفه طلبتنى اكبر شركه صناعه ماكينات نسيج دائرى فى المانيا لتعطينى دوره تدريبيه
بسبب ان مهندس الشركه شاف شغلى بنفسه وسئل صاحب المكان والرجل اعطانى حقى بسبب اجتهادى لا اكثر
والحمد لله ناجح فى عملى بسبب اجتهادى وتوفيق الله لكن النفاق لاينفع ابدا لانك لن تستطيع ان تنافق وتخدع كل الناس

شكرا ليكم يا جماعه على مشاركتكم والردود اللى استفادنا منها
ربنا يرزقنا بالرزق الحلال الواسع

المجامله والاجتهاد همه سبيل النجاح فى مصر وخاصه---النفاق

فعلا اللي بيعد يتنطط للمديرين بيترقي بسرعة . واللي بيجتهد بيتحط عليه زيادة وبرده مبيبقاش عاجب.

والوضع ده موجود طول مالادارة مصرية حتي لو شركات عالمية او مالتي ناشيونال.