الموضوع: هل ال bmw 316 موديل 87 ام ال 128 موديل الثمانينيات

السماره لو حالتها حلوه هتبقى ناعمه و صوت الماتور بتاعها هادى
جربت اسوقها مره فى طريق سفر كانت حلوه مش وحشه بس متنفعش للتخان زيى كده

شكرا جدا لردك المهم :)

بلاش بى ام قديم الا لو حالتها ممتازة غير كدا هتقرفك جدا جدا

المشاركة الأصلية كتبت بواسطة eleanor

طيب ماتفكر فى البيجو 504 وممكن تكيفها وعربيه سفر وحماره شغل وعفيه

الحالة الحلوه منها هاتبقى اغلى من كده اكيد
غير ان قطع غيارها الاصليه نادرة و غالية اكيد
و الموجود حاليا كله مضروب

طب ماتفكر فى ال 323 عربية ناعمة جدا وموفرة جدا فى البنزين سحبها ممتاز وثباتها ممتاز وقطع غيارها موجودة ومش غالية ومعمرة جدا

المشاركة الأصلية كتبت بواسطة nesr6060

البى ام موديل 78 ييبقى صح كدا بى ام e21 هى عربيه جامده ومحترمه وانا الصراحه كنت عاوز اجيبها بس خد بالك قطع غيارها فى السما فمانصحكشى بيها لان انا سالت عن الشبكه الاماميه بتاعتها لوحدها الراجل قالى بتتكون من 3 قطه وال 3 مع بعض بيعملوا 700 جنيه فكنت هصوت لوجبتها على اد ما هى عربيه جرايه وتستحمل و بتبقى 89 حصان فيما فوق وبتجيب معاك السرعه اللى انت عاوزها بس قطع غيارها بتخرب بيت الواحد لو مش فارق معاك حوار قطع الغيار يبقى هاتها واعمل حسابك فى حوالى 2000 جنيه زياده عن تمنها علشان لو عازت منك اى مصاريف تانيه وده بيحصل بنسبه 99.9% وعلى فكره العربيه اسمها شارك او e21 واوعى تجبها اكتر من 1600 سىسى ولا يقولك 200 ولا 1800 ولا 2500 علشان التجميع هتبهدلك بنزين على فكره سعرها 15 الف مش 18 كتير عليها 18 الا لو كانت مكيفه وباور وموتور انجيكشن

بالنسبه للرينو انا كنت شايفها ب 20 و 18 الف حوار اقل حاجه ب 22 دى الصراحه اول مره اعرف لان انا اخر مره نزلت فيها السوق كان من شهر بالظبط وكانت قدامى عامله 18 و 20 وحاله محترمه

الستروين على فكره قطع غيارها مش عاليه اوى قطع غيارها تقريبا زى السمارا والرينو معقوله ويمكن كمان ارخص من الرينو هى عيبها الوحيد الثبات و مبتجريش يعنى عاوزها يبقى ما انصصحكشى تعدى بيها ال 100 كم /س وسعرها من 14 ل 20 الف حسب الكماليات والحاله

الادا سمارا انا الصراحه شوفتها معجبتنيش حسيت انها ناشفه وسواقتها صاعبه وبتهبد بيا فى الارض كانى راكب عربيه نقل غير كدا شكلها مش اوى وامكانيتها مش اوى والتوب سبيد بتاعها زى الستروين فانا شايف ان البيجو 205 اجمل منها مليون مره

البيجو 205 راى دور عليها هى احسن حاجه فى قطع الغيار وفى الفئه دى وسعرها زى الرينو تقريبا وبتعديش ال 20 الف الا لو كان صاحبها بيستهبل الصراحه وتستحمل مععاك

ال 128 نصيحتى بلاش خاصه لو هتسافر بيها واحنا فى الصيف لان انا يوم ما ركبتها كرهتنى فى العربيات لان حد يصدق عربيه اخدها من التجمع الخامس لغايه الجيزه وماشى بيها على 90 و 95 بالكتير على الدائرى وتسخن منى فى المنيب حتى مكملتشى مشوار الجيزه على حته واحده وده كلوا ليه علشان كنا فيها 3 اشخاص ومعانا 3 شنط ليه ده لو راكب كارو مكانشى الحصان تعب

وعندك اليهاتسو شارد طبعا دى اخر حاجه تفكر فيها علشان قطع غيارها غاليه برده بس ارخص طبعا من البى ام

وعندك الريجاتا طبعا احسن مليون مره من ال 128 لو قررت تجيب فيات

انت لو تقولى معاك كام بالظبط هقولك لان انا كنت بدور الاول على عربيه فى حدود 15 ل 20 بس ربنا كرمنى وجبت ابيزا 94 ب 35 الف

صحيح عندك الابيزا 89 ل 92 احسن اختيار من اللى فاتوا كلهم وموتور سيستم بورش وسعرها هتلاقيه معاك مش هيعدى ال 20 الا لو كانت روعه الصراحه وياريت لو تجيبهاا بجد عربيه محترمه وتنورنا فى القسم بتاعنا

انا معايا 15 الف ..
ومش عاوز اتهاون في موضوع الفين او تلاته زياده عليهم عشان هيفرقوا معايا لو جبت ب 15 الف وخليت معايا الالفين الزياده دول احتياطي لاى احتاجات تحتاجها العربيه بعد كده ..
انا عايز عربيه لو حبيت ابيعها بعد مده اعرف ابيعها او ازود عليها وابدلها .. يعني مش عربيه اتدبس فيها وتكون حلوة ومحبوبه وسوقها ماشي ..
علي فكره انت نصايحك غاليه جدا وقيمه واتمنى انى مشغلكش معايا واتعبك :)
thanks