ولاد الحلال مخلوش لولاد الحرام حاجه .مصر بخير و مليانه رجاله الحمد لله (حريق منزل)
السلام عليكم
كنت فى مشوار و من المفترض ارجع البيت اخد الاولاد و افسحهم فى النادى .
و فجاة جالى تليفون من زوجتى بتقولى بيت الجيران بيولع جامد و محدش عارف يطفيه .
المهم قلتلها فى طفيتين حريق فى البيت تنزلهم لاى راجل من الجيران على بال ما اوصل و انا معايا طفايه كمان فى العربيه .
و ربى و ما اعبد انا اول مره اسوق فى حياتى بالشكل دا مع انى سعات بجرى .و الله العظيم مش شطاره و لا شىء .و لكنى كنت بحث العربيات و الناس بتوسعلى كان حد بيشيلهم من قدام العربيه .
و لما كانت بتزحم جامد كنت بقول للناس و ازعق البيت بيولع الاقيهم وسعوا الشارع و ركنوا على جنب بسرعة البرق
و الله اول مره فى حياتى اشوف الناس متعاونه كده فى حته زحمه جدا .
فعلا سلوك الشعب المصرى بقى احسن و اتقدم .
المهم الحمد لله وصلت البيت و سبت العربيه فى نصف الشارع و طلعت اجرى على بيت جارى فى الشارع الخلفى .و عاوز الحق اى شىء . و فاكر نفسى انى هكون اول واحد او مش هلاقى ناس بتساعد او قليلين جدا
المهم الصدمه الحلوه :
لقيت كمية بشر رهيبه بتساعد و تطفى و اللى بلغ المطافى و اللى بلغ شركة الغاز و اللى بلغ الكهربا .
و اللى قطع الكهربا
و اللى بيطفى هنا و اللى بينزل الناس من البيت من هنا و طبعا اصوات صويط جااااااااااااامد جدا .
و كميه ناس ولا يوم الحشر .من كل الطوائف اخوان و بلطجيه و ناس عاديين و صنيعيه و محامين و مدرسين و دكاتره و غيرهم
و الله كانت ملحمه و لا حرب اكتوبر
و بردو سبحان الله برغم كل الجهود دى و العدد المهول دا و الحريق مش بيطفى و محدش قادر عليه .سبحان الله يا لطيف .
خرج كل سكان البيت بسلام .
و الخوف من اشتعال المنطقه كلها لان الشوارع كلها فيها غاز و كله حاسس انه هينفجر فى اى وقت .
و رحت شيلت عربيتى من نصف الشارع و ركنتها عشان لو جت مطافى و الا حاجه
و فعلا سبحان الله المطافى وصلت فعلا .و جت 3 عربيات مطافى و عربية اسعاف
و ابتدوا يطفوا .و هوب.................. خرطوم المطافى مقطوع ...يا نهار ابيض ........... انا دمى غلى و نشف
جابو خرطوم غيره و الحمد لله طفوا الحريق و الشرطه جت و عملت محضر بالواقعه كمان و كل الجهات جت ما عدا الكهربا فقط .محدش جه من شركة الكهربا .مش عارف ليه .
بس ولاد الحلال قطعوا الكهربا من اول الحريق الحمدلله
المهم الحمد لله كل جيرانى بخير و بعافيه و مفيش مصابين الحمد لله
المطافى وصلت فى وقت . يعنى ممكن نقول معقول الحمد لله
بيت جيرانى اتحرق كامل و متبقاش فيه ولا قشه للاسف و زوجة جارى انهارت على بيتها و اثاثها . و اصيبت بصدمه عصبيه . ربنا يستر عليها
و جارى اخرجول محمول على الاكتاف لانه اغمى عليه و شدة كثافة الدخان . و لكنه الان بخير حال الحمد لله
بجد يا رجاله انهارده شفت ملحمه رهيبه جدا كل الناس بتساعد و بتقف وقفة رجاله
بقالنا كام سنه و الناس القديمه فى الشارع بتعزل و بتيجى ناس جديده منعرفهاش خالص و مبنختلطش بيهم كمان .
بس انهارد كلنا عرفنا بعض و شفت ناس كتير مشفتهمش من زمان و هما جيرانى القدام مش عارف اه اللى جابهم غير رحمة ربنا .
و الله العظيم كمية بشر رهيبه و لا ميدان التحرير فى عز الثوره
احب اشكر ربنا انه اصلح حالنا و سترها على جارى و خلى قلبنا على بعض .
الف حمد و شكر لك يا رب
و الله يا جماعه الواحد كان هيعيط من المنظر انهاده
ربنا كريم و رحمته واسعه .
و السلام ختام
