الموضوع: (الجزء الثاني) اجتهادي لتأمين الالنترا md

السلام عليكم يا رجاله ...تزكره بس بموضوع الجزء الاول من الموضوعhttp://www.nilemotors.net/Nile/353485-md.html
وكان من ضمن الناس اللي شاركو برأيهم الاخ smsxxxxxx وكان رايه عمل دائره لتأخير زمن فصل الطلمبه .قعد الموضوع ده يشتغل في دماغي طول الوقت . فعلا لو فصلت العربيه بالريموت والحراميه قريبين مني ممكن جدا يشوفيني وتحصل موا جهه مش ظريفه او انا استنى لحد ما يبعدو وساعتها مدي الريموت مش هيشتغل ويبقي معملتش حاجه. حاجه تانيه ليا صديق مركب جهاز التتبع GPS في سيراتو وكان مركبه في التوكيل بحوالي 3000 جنيه . اتثبت علي طريق اسكندرية الصحراوي في منتصف 2012 وخدو العربيه والموبايل و الفلوس وكل حاجه وفضل واقف قرابة الساعتيين تلاته علي ماركب و روح بيته وفعلا فصل العربية وعرف مكانها وكله تمام . العربية كانت راكنه في عزبه مش فاكر اسمها ايه كل اللي فيها حراميه او نضورجيه وبلغ البوليس بس طبعا البوليس قاله شكرا على المعلومه ور بنا معاك.!!! كلموه بعد كده ودفع والحمد لله صدقو معاه وخد العربيه.....المشكله في القصه دي حكايه الساعتين تلاته اللي وقفهم في الشارع على ما رجع بيته وطلع الرقم بتاع الشريحه اللي في الجهاز وفصل العربيه وفتح النت و عرف مكان العربية كانت العربية وقفت مكانها و كله تمام ...
القصص دي كلها كانت في دماغي و نزلت ادور علي الفكره نفسهااللي هي باختصار ....التأخير الزمني للأوردر بتاع فصل الطلمبه .... نزلت التوفيقيه ماحدش عارف حاجه .سألت عدد كبير من الكهربائيه فتي فتي فتي وماحدش عارف حاجه.واحد قالي اسأل عند الجماعه بتوع اللوحات الكهربيه في شارع نجيب الريحاني وكان ده اول الحبل عرفت ان اللي انا بدور عليه ده اسمه Timer of delay بس كل الموجود بيشتغل على الكهرباء 220 فولت.بعد بحث استمر ثلاته ايام في وسط البلد دلني راجل كبير علي اسم محل صغير في شارع نجيب الريحاني وقالي لو ده معندوش اصرف نظر عن الموضوع ويبقى كده المهم وصلتله وفعلا محل صغير ولكن الملاحظ انه ماشاء الله زحمه قوي . كام واد واقف بيبيع كده بس واحد بس الللي شغال بايده و الناس مستنيه تسأله خدت دوري ولما سألته هل عندك تايمر 12 فولت كانت الاجابه مفاجئه (كوري ولا تايواني و لا صيني . وعايزه كام دقيقه ؟) الله اكبر .وطلع الراجل ده مهندس كهربا وصاحب المحل . حكيتله علي اللي في بالي قالي لا سيادتك تقعد علي جنب كده وهجيلك نقعد بعض . خلص اللي في ايده وراح مطلع ورقه وقالي انت عايز ايه بالظبط قولتله عايز لاقدر الله في حالة اني اتثبت ادوس علي زرار برجلي من غير ما حد يشوف تفضل العربيه دايره لمده معينه انا احددها بعد كده تفصل ولا يمكن اعادة ادارتها مره اخري الا باستخدام الريموت الخاص بي (بتاع جهاز انزار الموتسيكل في الجزء الاول). قعد يرسم دوائر كهربيه لحد ما وصل للرسمه النهائيه وقالي في الحاله ديانت هتاخد التايمر التيايواني . طبعا ما سألتوش قلتله اوامرك(انا كنت بتعامل معاه زي احمد عيد و اخمد زاهر في( فيلم ثقافي) مكانو بيتعاملو مه المعلم الكبير برايز )ههههههههههه.
جاب الحاجات اللي هيشتغل بيها : * تايمر تايواني ماركه MAG من 1 ثانيه ال 30 دقيقه(110 جنيه)
* عدد 2 ريليه 8 طرف(50جنيه)
*دواسة قدم(15جنيه)
ركب الراجل الدايره بتوصيلتها وجربناها علي 12 فولت وكانت النتيجه مبهرة والحمد لله .

بعد كده اخدت الدايره و رحت عند الكهربائي في الاول اتلخبط شويه بس كلم المهندس وعدلو مع بعض بعض الحاجات ليتماشى النظام مع كهربة السياره . الدايره دي في حجم اي كنترول يونت بتاعت جهاز انزار . وتم تثبيت دواسة القدم تحت موكيت الارضيه خلف دواسة الفرامل .والحمد لله تمت التجربه بنجاح وانا ظبط التايمر علي 3 دقائق وكانت كافيه جدا ومفيش اي تاثير علي كهربة العربيه ولا حاجه لان كل التوصيلات على جهاز الانزار الصغير اللي تم تركيبه مسبقا....انا تعبت جدا جدا في البحث عن مكونات الدايره دي وتركيبها وتوصيلها واخفاءها بالاضافه الي التريقه من القريب و الغريب ولكن في نهاية الامر الحمد لله الموضوع يستاهل كل الكلام ده .وانا بنقل التجربه دي لاعضاء المنتدي الكرام لتعم الفائده وانا تحت امر الكل في اي تساؤل. وربنا ما يجعلني ابدا استخدمها ويحفظنا جميعا وشكرا
م.احمد صبري

المشاركة الأصلية كتبت بواسطة dr.hazem

ما شاء الله....
ربنا يباركلك ويحفظك ويحفظ العربية ويكفيك شر البلطجية...
بس عندي استفسار...
لو هنا بيثبتوك على طريق مقطوع بعيد الشر وهيقلبوك فكل حاجتك ياترى ال3 دقايق دول كفايه ولا ممكن العربية تفصل وهما لسا بيقلبوك؟؟
بالمختصر ليه مش 5 دقايق؟؟
تحياتي

sent from my lt18i using forum runner

عادي ممكن 5 دقايق .بس 3 اعتقد كافيه جدا انت لو تاخد بالك من الفيديو بتاع التثبيت اللي كان علي النيل الموضوع ماخدش 55 ثانيه وجريو الخوف ان 5 دقايق دول توصلهم لمكان امن وﻻ حاجه .