عايز بايك 250r جديد أو أستعمال نضيف. تنصحوني بأيه؟

السلام عليكم الأول علي أحلي بايكرز الأول.
دلوقتي انا بقالي كتير نفسي أجيب بايك هوندا وطبعاً الأهل كانو رافضين الفكرة.
بس مع الزحمة اللي بتزيد كل يوم وشغلي الجديد اللي بسافر له وبضطر اطلع دائري ومحور كل يوم فانا بضيع حوالي 5 ساعات رايح جاي كل يوم وساعات بتوصل ل 9 ساعات لو في حادثة ولاني مش من القاهرة ولاجي من طنطا من علي الطريق الزراعي ودا وقت كتير اوي ضايع في المواصلات لوحدها عطلة وهلك للوقت والصحة.

المهم انا بقالي فترة بقنعهم وهما بدأو يستجيبو نسبياً. مع انهم كانو رافضين الفكرة نهائياً لأني ولد وحيد والطرق عندنا زي الزفت سواء عال دائري او الطريق الزراعي.

دلوقتي اللي انا طالبه منكم نصيحتكم.
هل أجيب بايك هوندا قديم 250R ولا جديد.
انا عايزة اسافر بيه كل يوم. وخايف من الاستعمال يكون متهان او وقع قبل كدا وحالته وحشة او كان بيتحرق عليه جامد. فيبدأ يكلب مني شغل كتير او يعطل مني وساعتها كله هيشمت فيا ويقولو لي قلنالك لأ.
انا مفهمش في البايكس أوي. فعايز اعرف هل البايك ممكن يسافر كل يوم مسافة 250 ل 300 كيلو متر اجمالي المسافة رايح جاي, ولا كدا هيبقي كتير عليه.؟

انا قريت مرة ان المكن بيحل بدري او مش بيعمل كيلومتر عالي في المواتير الاسبورت.
لانها في الغالب معمولة للجري والسرعة وموتورها بيسخن فمش هيبقي مناسب زي ماتجيب عربية Sport وتخليها Everyday using car.
وخصوصاً في الحر دا مش عارف هيبقي مناسب السفر الطويل بيها كل يوم ولا لأ.

وانا بمعدل سفري 250 ل 300 كيلو كل يوم هعمل كيلو متر عالي ف وقت قليل. بعني 1000 كيلو عال عداد في أربع أيام.!
هل دا مناسب مع مكنة Race. ولااشوف حل بديل. ؟

وبكام اسعار فطع الغيار الاستهلاكية زي فلتر الزيت والزيت وتيل الفرامل والكاوتش الخلفي وبيتغيرو علي أمتي.؟
وايه تاني بيتغير بشكل دائم زي القطع المذكورة دي.؟

اسف لو طولت عليكم, بس انا حابب اعرف الحاجات المهمة دي من الخبراء اللي هنا قبل ما أخد الخطوة دي.
وأيه اللي يناسبني أكتر. بايك جديد ولا استيراد إفراج جمركي.

قلت أركب القطر انهارده بيبقي أسرع. لا بيبقي قدامة مطبات ولا حوادث ولا زحمة.
وصلت المحطة ٧ عشان اركب قطر ٧:٣٠.
والساعة دلوقتي ٩ بليل والقطر لسه متحركش ولا ركب له الجرار اللي هيمشي بيه،!
دا قطر ٧ التوربيني المباشر لاسكندرية لسه متحركش لحد دلوقتي. والناس جوة فطسانة واللي بيتخانق وحاجة أخر بهدلة.!

انا عارف ان القطارات بقالها فترة فيها تسيب وأهمال في المواعيد،

بس كدا حرام بجد, هوا أيه اللي حصل للبلد !!

صعب جدا عليك أنت القيادة كل يوم 300 كيلو .... أما بخصوص المكنة لازم تكون جديدة علشان المشوار طويل وممكن تشترى البجاج 220 جديد أفضل وأرخص ومنتشر كمكنة وكمان قطع غيار وصيانة ويستحمل المشاوير ... لكن الخطر عليك أنت من طول المشوار وكمان الخطر اللى على الطريق .. دة لو الواحد بيسوق كل يوم 100 كيلو فقط هيتعب ويفرفر ومش هيستحمل يستمر كتير ولازم يدور على بديل ... ما بالك أنت بتتكلم فى 300 كيلو حتى لو يوم ويوم بردة كتير ومرهق جدا ويعتبر أنتحار حاول تدور على بدائل من المواصلات العامة أفضل ..

والله الموفق والمستعان

هديك مثال علي المواصلات العامة امبارح كبديل.
الطريق في الذهاب ٣ ساعات.
وفي العودة ٦ ساعات. ليه عشان قلت هركبقطر يبقي اسرع فضلت قاعد ٣ ساعات في المحطة وفي الاخر طلعت ركبت ميكروباص برضه.
يعني توتال ٩ ساعات عال طريق رايح جاي.

وانا مش هسوق ال ٣٠٠ كيلو دايركت. لانهم متقسمين علي حوالي ١٥٠ رايح و ١٥٠ راجع. وبشوف ناس سايقة طول الطريق بموتوسيكل mz القديم او الحاجات بتاعت موظفين الحكومة مفهمش في مودلاتها بصراحة وعادي بيقضي.
بس معرفش هل البايك الهوندا تستحمل زيهم. ولا عشان هيا بتدي أداء عالي عمرها الافتراضي مش كبير زي ال Sports Cars.
يعني مينفعش تجيب فيراري ولا مازيراتي وتشغلها اجرة طول النهار مشواير او تمشي بيها كيلومتر عالي.

البجاج بصراحة مش مستلطفة أوي.
وخصوصاً لاني حلمي من وانا ف ثانوي انا اجيب بايك هوندا عشان سحبها وصوتها وشكلها وعشان ياباني.

اللي خلاني ابعد عن السفر بالعربية هوا اني كنت بضيع نفس عدد الساعات وبحس بارهاق شديد من الوقفة عال محور والدائري رايح وارجع غير الزراعي رايح وراجع برضه. وقلت استغل الوقت دا في المواصلات باني ادخل عال نت او أقرا كتاب.

ولما كنا بنبقي مشلولين عال محور ولا الدائري والاقي واحد جيه من جنبينا ببابك وشايفة بيعدي اكتر من ٢٠ عربية واحنا لسه واقفين.
بتحسر أوي عال وقفة الي احنا واقفينها والعطلة ومبقاش فيه حل غير أني أحول لبايك وربنا يستر من الطريق ويكفينا شر الحوادث,
كله بيدغ سواء بايك او عربية حامياك ممكن تتفرم في ثانية من غير ما تحسب لها لو جه وقتك..
http://www.nilemotors.net/Nile/361024-a.html

انا رأي انك متجبش بايك لأن اولا انت مش هتستحمل المشوار ده على race عشان القاعده مش مريحة ممكن حاجة كاستم بس في كل الاحوال هتتعب جدااااااااااااااااااااااا

الاسهل انك تنقل جنب الشغل و اوفر من البايك لأن بالمشوار ده انت لازم بايك نضيف و هيبقي غالي.

انا حالياً مقدرش انقل لاني شغلي مكانه بيتغير كل شهرين. شغل مساحة وخرائط GPS
يعنيمن شهرين كنا في اسكندرية. وقبلها المنيل. ودلوقتي في التجمع الخامس وأكتوبر.
فا لازم بايك..

والتعب كداكدا هتعب. سواء ف كستم او بايك او حتة عادة.
لاني بتعب حالياً في المواصلات والسفر المتواصل.
بس الأهم بالنسبة لي دلوقتي الوقت اللي ضايع في الزحمة والحوادث عن التعب.


ياريت بس لو حد يقدر يفيدني باسعار قطع الغيار الاستهلاكية وبتتغير كل كام كيلو متر.
وايه الافضل ليا اجيبة جديد هيبقي احسن.
ولا ممكن أوفر الاقي استيراد نضيف وموديلات الالفينات عشان ميتعبش مني او يحتاج شغل كتير.

وإلا هفكر في الحل الأخير. وأخر كارت ليا.
لا بيحتاج بنزين ولا مية ولا بيتعب فيالحر دا. وركوبته أخر سلطنة لو ركبت له فوق شمسية أو خيمة معتبرة ومروحة ياباني. :grinder:
https://m.ak.fbcdn.net/sphotos-a.ak/...77984678_n.jpg

بس مش هوصل للشغل في المعاد كدا. ؟؟ :36_1_50[1]:

الهوندا الجديد 250 بحوالى 35000 جنية .... ولو هتدخل فى مستعمل نظيف 400 cc مثلا فى حدود 20 ألف جنية ...

أنت أمكانياتك أية والآخوة هنا هيساعدوك أن شاء الله ..

ثانيا : لو ما لقتيش مكنة مستعملة نظيفة قوى هتكرة الدنيا واللى عيشانها من كثرة صيانتها وأعطالها المتكررة وقطع غيرها اللى مش منتشرة قوى

أركن أحلامك على جنب دلوقتى المكنة البجاج زيرو 220 بحوالى 12500 جنية يعنى ما فرقتش كتير عن 250 فى السى سى لكن فى فرق فى السعر خرافى .. وتريح دماغك من المستعمل دلوقتى وكمان لما تتمرن كويس وتتمرس فى القيادة وربنا يرزقك بعد كدة ولما يكون معاك أبقى أشترى جديد أو مستعمل نظيف قوى وبحالة الزيرو ومن حد يكون ثقة وعندة ضمير ..

على فكرة ذى ما حضرتك قولت من فوائد الموصلات أنك ممكن تقرأ كتاب مثلا أو تستفيد من الوقت الآنتظار دة فى أى حاجة ونوعا ما أو الى حد كبير أمان أكثر من المكنة ... لكن وأنت بتسوق المكنة لا هتقرأ ولا هتكون ريلاكس خالص وهتتسلق فى الحر اللى فوق دماغك من الشمس لكن فى العربية بتكون رأسك متغطية من الشمس ... وكمان فى الشتاء كل البيكرز وأنا منهم بنركن المكن فى الشتاء من البرد والمطرة والهواءوخلافة وبنركب مواصلات يعنى ركوب المكنة بيكون موسمى ..... وعلى فكرة بنسبة كبيرة أحيانا كتير الموتوسيكل لا يجد مكان يسير فية من كتر الزحام وبيقف بردة ومعرض لآى عربية تخبطة أو واحد يفتح باب العربية مرة واحدة من غير ما يبص فى المراية يقوم شايلك من على الآرض غير الزحاليق والزيت والرملة والتراب وخلافة

وربنا يسترها معانا جميعا والله الموفق والمستعان

هاتتعب من السفر بالبايك كل يوم دى حاجة اكيدة مفيش شك
طيب لو حصلك اى ظروف ومقدرتش تسوق بالعربية ممكن تركن فى اى حتة انما البايك؟؟؟؟؟؟؟
بس قول ميزانيتك اخرها كام وباذن الله كل حاجة هاتتحل

مش لزم ريس ممكن تجيب هورنت 600 او CB 400 super four

بعد احترامى لكل الردود اللى قالت هات بجاج افضل وارخص من اليابانى اولا مفيش وجة مقارنة اصلا بين الاتين حرام اصلا تقول البجاج افضل من الريس دا من امتا الكلام دا وبنسبة للموضوع اللى مكتوب انا انصحك تبعد عن اى حاجة بعجلتين عشان 300 كيلو دا انتحار وكمان يومى و250 جديد هتخش ف 35 الف يبقة تجبلك عربية حلوة كدة انما هتقول بجاج هورنت ريس هارلى ايا كان 300 كيلو يومى كتيررررررررررررر جدا بايك صعب اوى بصراحا فكر ف عربية كدة وبلاش بعد اذن الجميع حد يقارن بجاج بريس او فسبا بريس او صينى بريس مع احترامى لافكار الجميع بس لا يوجد وجة مقارنة والاستاذ الفاضل اللى قال 220 مفرقتش كتير عن الريس 250 الرابع بتاع البجاج بى التانى بتاع 250 صعب اوى مقارنة يا جماعة لو فى دماغك اوى بقة هوندا وانت بتقولك عايز ريس يعنى لاكاستم ولا هورنت ولة شادو هيخشو دماغك عشان شكل cbr ناس كتير بتحبو يبقة تجيب حاجة 400 فاير بحالة الفبريكا وحط تحت دى مليون خط عشان تستحمل معاك ولو ايدك فيها دايما مش هتقولك بم بس لو حالة نادرة ف الايام دى هتخش فى 27 وممكن 28 الف بس انسانى بعد كدة ركوبة بصراحا واللى مركبش يبانى مركبش موتسيكلات اصلا ويا رب تجيب اللى نفسك فية وبرضو خد بالك ان السواقة على الطريق السريع مش سهلة دى اصعب من اى حاجة وربنا يحفظنا ويحفظ الجميع

وممكن بنيلى الايطالى شكلها شيك وعندهم ال1000 سي سي اعتقد ب40 الف

والحاجات الصغيره بتبدء من 9000

ارشح فكرة عربية معلش برضوا 300 كيلوا كتير اوى بس فى حالة انك لو هتجيب بايك عالى وسحبوا شديد 600 مثلن لو هتعرف تمشى على سرعات عالية يعنى 160 140 كدة

شوف ياباشا
انت تنسى الموتوسيكل في سواقه 300 كيلو دول بتوع كل يوم
طيب وانت صاحي الصبح فايق
وانت راجع هلكان هتسوق ازاي ؟؟؟
انا خايف عليك مش اكتر
مشوارك بعيد أجر شقه قريبه من الشغل وتعايش

وانسى اي حاجه تانيه ياتقضيها مواصلات وخلاص

احترامى لكل الردود بس الراجل هو حابب كده حابب يركب موتوسيكل ريس يروح بية كل يوم ويجى 300 كيلو المفروض ترودوه على السؤال
الهو عايزة هو مقتنع بالهو بيعملة

وانا اسف او كنت زعلت حد

أولاً أنا بشكر كل الناس اللي ردت عليا لأني أكيد أستفدت من كل الردود وأراء الناس,
وإن شاء الله ي حد يفكر في بايك ويبدأ ب 250 يكون الموضوع دا مفيد ليه.

وأنا هرد علي كل واحد رد عليا تقديراً لمشاركته.

اقتباس:

---

المشاركة الأصلية كتبت بواسطة abdm

الهوندا الجديد 250 بحوالى 35000 جنية .... ولو
هتدخل فى مستعمل نظيف 400 cc مثلا فى حدود 20 ألف جنية ...

أنت أمكانياتك أية والآخوة هنا هيساعدوك أن شاء الله ..

ثانيا : لو ما لقتيش مكنة مستعملة نظيفة قوى هتكرة الدنيا واللى عيشانها من كثرة صيانتها وأعطالها المتكررة وقطع غيرها اللى مش منتشرة قوى

---

أنا عرفت سعر الهوندا 250 الجديد,
وكنت مستكتر السعر دا برضه عليه لأني لو هدفع المبلغ دا في حاجة 250 ونازل بسلندر واحد كمان, حتي لو كان نفس أداء ال 2 سلندر القديم, بس هيبقي أفضلي ساعتها أني أجيب حاجة 400 جديدة أفراج جمركي ومش عاملة كيلو متر عالي,
بس كل قلقي كان من إن دي هتكون أول بايك ليا, والطرق أنهارده ماشاء الله زي الزفت, وانا مش هبقي أعرف هيبقي التعامل مع البايك عامل أزاي عشان أتصرف في موقف زي طريق مكسر أو مطب جديد علي الطريق مكنش معمول أو حفرة.

فكنت خايف من أني أبداء علي مكنة عالية 400 أو 600 بدل ما تبهدلني في المواقف دي..
ودا اللي خلاني أفكر في 250 جديد لأني كل اللي شوفته 250 طالع عينه, وحسيت أنها هتكرهني في الدنيا زي ما حضرتك وضحت, فعشان كدا مكنتش عارف أعمل أيه أجيب جديد وتقعد 4 أو 5 سنين بعدين أغير ل حاجة عالية وأكون أتمكنت أوي وأدخت خبرة كفاية, ولا هل ال 400 مش هتفرق كتير عن ال 250.

وأنا فعلاً بأستفاد من المواصلات في الوقت اللي بعرف أعمل فيه حاجات سواء علي النت او قراية, بس المشكلة أنك لما مش بتلاقي مواصلات, بتبقي كاره نفسك وكاره اليوم وعايز تروح وملكش نفس تعمل حاجة, ونفسك لو تبقي فيه حاجة خفيفة تحت رجلك تروحك علي طول.
دا كان هدفي من البايك..

اقتباس:

---

المشاركة الأصلية كتبت بواسطة abdm

أركن أحلامك على جنب دلوقتى المكنة البجاج زيرو 220 بحوالى 12500 جنية يعنى ما فرقتش كتير عن 250 فى السى سى لكن فى فرق فى السعر خرافى .. وتريح دماغك من المستعمل دلوقتى وكمان لما تتمرن كويس وتتمرس فى القيادة وربنا يرزقك بعد كدة ولما يكون معاك أبقى أشترى جديد أو مستعمل نظيف قوى وبحالة الزيرو ومن حد يكون ثقة وعندة ضمير ..

---

بالنسبة للمكنة البجاج الزيرو, زي ما وضح ماجيك روك, أني نفسي أجيب بايك هوندا.
ولو هجيب بايك يا أجيب بايك ياباني يا مش هجيب,,
لأن القصة مش قصة فلوس, أنا عايز كواليتي, وأكيد كل واحد فيكم معاه بايك هوندا أو حتي سوزوكي أو أي حاجة ياباني لما كان بيشوفها قبل ما بيجيبها كان بيبقي نفسه فيها,

وكان صوتها بيخطف قلبه كدا وهيا ماشية, وبيقول someday :inlove:
هجيب واحدة وأمشي بيها كدا وأسمع الصوت الجميل دا, وأكيد البجاج مش هتديك لا الأداء دا ولا الصوت دا.:N_no[1]:

فاصعب عليا أني أجيب بجاج ولو حتي بنص المبلغ,
زي ما لو معايا فلوس تجيب عربية صيني زيرو أو ياباني أستعمال,
يا هجيب الياباني, أو هستني لحد ما أكمل تمن الياباني زيرو وأجيبها مرة واحدة, دي وجهة نظري وتفكيري.

اقتباس:

---

المشاركة الأصلية كتبت بواسطة abdm

على فكرة ذى ما حضرتك قولت من فوائد الموصلات أنك ممكن تقرأ كتاب مثلا أو تستفيد من الوقت الآنتظار دة فى أى حاجة ونوعا ما أو الى حد كبير أمان أكثر من المكنة ... لكن وأنت بتسوق المكنة لا هتقرأ ولا هتكون ريلاكس خالص وهتتسلق فى الحر اللى فوق دماغك من الشمس لكن فى العربية بتكون رأسك متغطية من الشمس ... وكمان فى الشتاء كل البيكرز وأنا منهم بنركن المكن فى الشتاء من البرد والمطرة والهواءوخلافة وبنركب مواصلات يعنى ركوب المكنة بيكون موسمى .....

---

وموضوع الحر والشمس, متهيألي لو أنت ماشي بسرعة معقولة يعني 80 أو 100
مش هتحس بحر, ولا شمس لو لابس الخوزة مش كدا ولا أيه ؟
أومال الناس اللي بتسوق الموتسيكلات ال MZ والحاجات القديمة دي كل يوم عال طريق ومن غير خوذة كمان بيبقي أحساسهم أيه ؟
وبالنسبة للشتاء بصراحة مأخدتش بالي من النطقة دي إلا من ملاحظتك دي دلوقتي,
بس أنا متهيألي أن الدنيا مبقتش تشتي زي الأول.

وفعلا زي مانت قلت,

اقتباس:

---

المشاركة الأصلية كتبت بواسطة abdm

وعلى فكرة بنسبة كبيرة أحيانا كتير الموتوسيكل لا يجد مكان يسير فية من كتر الزحام وبيقف بردة ومعرض لآى عربية تخبطة أو واحد يفتح باب العربية مرة واحدة من غير ما يبص فى المراية يقوم شايلك من على الآرض غير الزحاليق والزيت والرملة والتراب وخلافة

وربنا يسترها معانا جميعا والله الموفق والمستعان

---

بس في أغلب الوقت بيعرف يعدي بنسبة كبيرة, وبشوفها كل يوم واحنا واقفين,
والحوادث مع أن نسبتها أعلي وأكتر في البايك من خطأ الغير لو مش من اللي راكب البايك, بس أنا مؤمن بإنه مش هيحصل حاجة وحشة لحد إلا لو مكتوبة له, والمواقف اللي بتقابلك وأنت سايق البايك بتعلمك أزاي تكون حذر أكتر من السواقين مع الوقت ومتمشيش في كل حتة بسرعة لكن بسرعة معقولة لحد ما توصل للطرق اللي انت حافظ أنها مفتوحة ومفهاش مطبات ولا تكسير.

أنا شاكر ليك علي ردك تاني, وعلي دعائك
وربنا يستر طريقك وطريقنا وطريق المسلمين يارب. :tumb:

اقتباس:

---

المشاركة الأصلية كتبت بواسطة alfath8

هاتتعب من السفر بالبايك كل يوم دى حاجة اكيدة مفيش شك
طيب لو حصلك اى ظروف ومقدرتش تسوق بالعربية ممكن تركن فى اى حتة انما البايك؟؟؟؟؟؟؟
بس قول ميزانيتك اخرها كام وباذن الله كل حاجة هاتتحل

---

بصراحة أنا مفكرتش في موضوع أني هتعب من البايك دا خالص, زي مانا بتعب من المواصلات لما بعد فيها بال 6 ساعات, سواء لما كنت بستني في محطة القطر ويبقو عاملين إضراب أو أطلع عال سريع والأقيه قاطعينه وكل العربيات واقفة.!
يعني قلت البايك ساعة او ساعتين بالكتير هكون في البيت. أنما 6 ساعات دي بتبقي نفخ.

وفعلاً انا كذا مرة أبقي رايح أسكندرية أو القاهرة وأحس أني هلكان أركن علي جنب الطريق بالعربية وأسيبها دايرة وأقفل الازاز والسنتر وأغفل شوية, عشان لو حصل حاجة أطلع بالعربية علي طول,
وكان تفكيري إن البايك مش هتعب فيه ولا هحس أني عايز أنام زي العربية لما بتسوق مشوار طويل بسرعة بطيئة,,

بس اللي حصل أني كان الفترة اللي فاتت قدامي بايك 600 وكان سعرة في سعر ال 250 جديد وكنت شايفة ممتاز جداً وقلت خلاص هجيبة, طلعت جربته مع صاحبة ومكنتش أنا اللي سايق كمان.
ال G-Force اللي كنا بنسمع عنها في الفورملا وان, أو لما تركب عربية عليها مكنة عالية وسحبها عالي وتحس أنك بتتسحب كدا وانت جوا العربية, متجيش حاجة جنب الأحساس اللي أنا حسيته من سحب البايك دي.

التجربة كانت بالظبط 12 دقيقة يعني مكملتش ربع ساعة, ولما نزلت حسيت أني باخد نفسي أكني كنت جاي بجري من مشوار,
بس دا عشان كنا بنجري بيه كل الغيارات كنا بنقفلها, مش عارف لو كنا ماشين مثبتين سرعة 100 مثلا أكيد الأحساس بالتعب هيكون أقل.

وساعتها حسيت أنو ممكن يكون مرهق في السفر فعلاً بدل ما يريح,
بس أنا لسه مش متأكد, وحاسس أن التعب دا عشان كنا بنقفل الغيارات التلاتة الأولي,

ولأني ساعات بشوف ناس كتير سايقة بايك ورايقة وسايقة بأيد واحدة والايد التانية علي ركبتها وأخر روقان ولا أكنه قاعد علي الكرسي ف بيتهم.!

اقتباس:

---

المشاركة الأصلية كتبت بواسطة sasa.fireblade

مش لزم ريس ممكن تجيب هورنت 600 او cb 400 super four

---

بصراحة أنا لسه جديد زي ما وضحت, ومفهمتش أيه الهورنت ويفرق في أيه عن البايك الهوندا.
أنا عملت جوجل عليه لقيت شكله شبه البايك العادي بس معرفش حاجة عنه, ياريت تبقي توضح لي أيه الفرق بينه وبين الهوندا 600 مثلاً ؟

اقتباس:

---

المشاركة الأصلية كتبت بواسطة magic_rock

بعد احترامى لكل الردود اللى قالت هات بجاج افضل وارخص من اليابانى اولا مفيش وجة مقارنة اصلا بين الاتين حرام اصلا تقول البجاج افضل من الريس دا من امتا الكلام دا وبنسبة للموضوع اللى مكتوب انا انصحك تبعد عن اى حاجة بعجلتين عشان 300 كيلو دا انتحار وكمان يومى و250 جديد هتخش ف 35 الف يبقة تجبلك عربية حلوة كدة انما هتقول بجاج هورنت ريس هارلى ايا كان 300 كيلو يومى كتيررررررررررررر جدا بايك صعب اوى بصراحا فكر ف عربية كدة وبلاش بعد اذن الجميع حد يقارن بجاج بريس او فسبا بريس او صينى بريس مع احترامى لافكار الجميع بس لا يوجد وجة مقارنة والاستاذ الفاضل اللى قال 220 مفرقتش كتير عن الريس 250 الرابع بتاع البجاج بى التانى بتاع 250 صعب اوى مقارنة يا جماعة لو فى دماغك اوى بقة هوندا وانت بتقولك عايز ريس يعنى لاكاستم ولا هورنت ولة شادو هيخشو دماغك عشان شكل cbr ناس كتير بتحبو يبقة تجيب حاجة 400 فاير بحالة الفبريكا وحط تحت دى مليون خط عشان تستحمل معاك ولو ايدك فيها دايما مش هتقولك بم بس لو حالة نادرة ف الايام دى هتخش فى 27 وممكن 28 الف بس انسانى بعد كدة ركوبة بصراحا واللى مركبش يبانى مركبش موتسيكلات اصلا ويا رب تجيب اللى نفسك فية وبرضو خد بالك ان السواقة على الطريق السريع مش سهلة دى اصعب من اى حاجة وربنا يحفظنا ويحفظ الجميع

---

كلام حضرتك مظبوط,
وأنا وضحت دا في المشاركة دي,

اقتباس:

---

بالنسبة للمكنة البجاج الزيرو, زي ما وضح ماجيك روك, أني نفسي أجيب بايك هوندا.
ولو هجيب بايك يا أجيب بايك ياباني يا مش هجيب,,
لأن القصة مش قصة فلوس, أنا عايز كواليتي, وأكيد كل واحد فيكم معاه بايك هوندا أو حتي سوزوكي أو أي حاجة ياباني لما كان بيشوفها قبل ما بيجيبها كان بيبقي نفسه فيها,

وكان صوتها بيخطف قلبه كدا وهيا ماشية, وبيقول someday :inlove:
هجيب واحدة وأمشي بيها كدا وأسمع الصوت الجميل دا, وأكيد البجاج مش هتديك لا الأداء دا ولا الصوت دا.:n_no[1]:

فاصعب عليا أني أجيب بجاج ولو حتي بنص المبلغ,
زي ما لو معايا فلوس تجيب عربية صيني زيرو أو ياباني أستعمال,
يا هجيب الياباني, أو هستني لحد ما أكمل تمن الياباني زيرو وأجيبها مرة واحدة, دي وجهة نظري وتفكيري.

---

وشكلي كدا هصرف نظر عن ال 250 لأني بعد ما جربت ال 600 معنديش أستعداد أركب بايك أسمع منه صوت من غير ما يسحب بيا وأحس بنفس الأحساس اللي حسيته في ال 600.

بس مش عارف لسه أبدأ ب 400 ولا 600 أنت أيه رأيك ؟
وعندي سؤال ليكم يا جماعة في واحد قالي إن ال 400 قطع غيارة رخمة علي عكس ال 600,
وإن المكنة ال 600 عمتاً مشاكلها أقل من ال 400,
هل الكلام دا صحيح ولا لأ.

اقتباس:

---

المشاركة الأصلية كتبت بواسطة dem0

وممكن بنيلى الايطالى شكلها شيك وعندهم ال1000 سي سي اعتقد ب40 الف

والحاجات الصغيره بتبدء من 9000

---

بصراحة أول مرة أسمع عنها برضه,
أنا أعرف ان معظم البايك ياباني كا هوندا وسوزوكي وياماها وكوزاكي,
او الحاجات الهندي.

أيه ظروف الأيطالي, وليه سعرها قليل كدا ؟ هل بالسعر دا هيا ف كاتيجوري البجاج ؟
ولا الايطالي كويس ؟

اقتباس:

---

المشاركة الأصلية كتبت بواسطة sasa.fireblade

ارشح فكرة عربية معلش برضوا 300 كيلوا كتير اوى بس فى حالة انك لو هتجيب بايك عالى وسحبوا شديد 600 مثلن لو هتعرف تمشى على سرعات عالية يعنى 160 140 كدة

---

يعني كدا ال 600 هيبقي مرهق طول الوقت لو أنا جيبته زي مانا وضحت في المشاركة دي,
ويبقي ال 400 أحسن ؟

اقتباس:

---

أنا كان تفكيري إن البايك مش هتعب فيه ولا هحس أني عايز أنام زي العربية لما بتسوق مشوار طويل بسرعة بطيئة,,

بس اللي حصل أني كان الفترة اللي فاتت قدامي بايك 600 وكان سعرة في سعر ال 250 جديد وكنت شايفة ممتاز جداً وقلت خلاص هجيبة, طلعت جربته مع صاحبة ومكنتش أنا اللي سايق كمان.
ال g-force اللي كنا بنسمع عنها في الفورملا وان, أو لما تركب عربية عليها مكنة عالية وسحبها عالي وتحس أنك بتتسحب كدا وانت جوا العربية, متجيش حاجة جنب الأحساس اللي أنا حسيته من سحب البايك دي.

التجربة كانت بالظبط 12 دقيقة يعني مكملتش ربع ساعة, ولما نزلت حسيت أني باخد نفسي أكني كنت جاي بجري من مشوار,
بس دا عشان كنا بنجري بيه كل الغيارات كنا بنقفلها, مش عارف لو كنا ماشين مثبتين سرعة 100 مثلا أكيد الأحساس بالتعب هيكون أقل.

وساعتها حسيت أنو ممكن يكون مرهق في السفر فعلاً بدل ما يريح,
بس أنا لسه مش متأكد, وحاسس أن التعب دا عشان كنا بنقفل الغيارات التلاتة الأولي,

ولأني ساعات بشوف ناس كتير سايقة بايك ورايقة وسايقة بأيد واحدة والايد التانية علي ركبتها وأخر روقان ولا أكنه قاعد علي الكرسي ف بيتهم.!

---

ولا ال 1600 هيبقي كويس مشيت بيه مشي معقول,
يعني من 90 ل 100 علي حسب ظروف الطريق, والنقلات علي أر بي أم قليل.؟

اقتباس:

---

المشاركة الأصلية كتبت بواسطة abdulkhaleq

شوف ياباشا
انت تنسى الموتوسيكل في سواقه 300 كيلو دول بتوع كل يوم
طيب وانت صاحي الصبح فايق
وانت راجع هلكان هتسوق ازاي ؟؟؟
انا خايف عليك مش اكتر
مشوارك بعيد أجر شقه قريبه من الشغل وتعايش

وانسى اي حاجه تانيه ياتقضيها مواصلات وخلاص

---

عندك حق, أنا فيه أيام ببقي مروح فيه خلصان, ومش شايف قدامي.
وفيه أيام كمان ببقي نازل الصبح عايز أنام..

ألف شكر علي أهتمامك وقلقك, وفعلاً هوا البايك في الظروف دي مجازفة
بس أنا ظروف شغلي بتصعب عليا أني أخد شقة في مكان واحد لأننا بنتنقل ممكن كل شهر تقريباً,
وأي شقة تيجي تأجرها بتاخد منك شهر تأمين + شهر مقدم.
ولو جيت تمشي بعد شهر ساعات كتير تحصل معانا ميرضوش يرجعو فلوس التأمين وتضطر يا تعد شهر كمان, يا تسيبها وتمشي.!
وأصلا عشان تلف وتدور عشان تلاقي شقة كويسة بتبقي دوخة, ومفيش وقت حالياً اليوم بيعدي بالعافية..

والمواصلات اللي بقت صعبة بعد أزمة البنزين والزحمة علي الطريق من العربيات بسبب أزمة البنزين والسولار هيا اللي خلتني أفكر في البايك لأني كنت تعبت بجد.

اقتباس:

---

المشاركة الأصلية كتبت بواسطة Tarek546

احترامى لكل الردود بس الراجل هو حابب كده حابب يركب موتوسيكل ريس يروح بية كل يوم ويجى 300 كيلو المفروض ترودوه على السؤال
الهو عايزة هو مقتنع بالهو بيعملة

وانا اسف او كنت زعلت حد

---

أستاذ طارق, أكيد مفيش حد هيزعل ولا حاجة دا رأيك, وأنت زوق عشان تتأسف وتطلب من الناس أن محدش يزعل منك, دا رأيك
وأنا أستفدت فعلاً من ردود اللي ناس قالتها, والنصايح اللي قالو عليها لأنها من واقع تجربتهم ودا اللي كنت محتاجة,

وشكراً علي ردك وأهتمامك بإن الرد يكون علي السؤال بتاعي,
ومتقلقش أنا إن شاء الله هفضل ورا الموضوع لحد ما أجيب بايك وتكون حاجة نضيفة,

وأنضم لكل البايكرز المحترمين واللي منورين القسم هنا.. :tumb:

اقتباس:

---

المشاركة الأصلية كتبت بواسطة leitosr

أستاذ طارق, أكيد مفيش حد هيزعل ولا حاجة دا رأيك, وأنت زوق عشان تتأسف وتطلب من الناس أن محدش يزعل منك, دا رأيك
وأنا أستفدت فعلاً من ردود اللي ناس قالتها, والنصايح اللي قالو عليها لأنها من واقع تجربتهم ودا اللي كنت محتاجة,

وشكراً علي ردك وأهتمامك بإن الرد يكون علي السؤال بتاعي,
ومتقلقش أنا إن شاء الله هفضل ورا الموضوع لحد ما أجيب بايك وتكون حاجة نضيفة,

وأنضم لكل البايكرز المحترمين واللي منورين القسم هنا.. :tumb:

---

يا باشا تشرف بص يا معلم انت ابدا بال 250 حلو

وحاجة حلوة تعمل 12-14 الف تخدها تنساها


وبعدين هى البجاج والبينلى دية موتوسيكلات

هو الهوندا حلو انت شوف كده وظبت مع نفسك

بص حضرتك انا بردو مبتدئ بس انا اسمع ان الكاستم اريح في المسافات الطويلة من الريس عشان قعدته وهو اساسا معمول عشان المسافات الطويلة عكس الريس اللي معمول عشان السرعة موتوره حامي . شوف كدة الهوندا شادو هاتعجبك والا لا وربنا يوفقك في اللي فيه الخير