الموضوع: انا اشتريت اكسنت 2006 وعايزة مساعدة

ونسيت اقول انها الاكصدام االى فى الخلف مخبوط جامد
كل الناس قالت انا ممكن ابقى راكنة العربية ويحصلها كل دة

كل دى مشاهدات ومفيش حد قالى كلمة واحدة؟

مشكورة على الرد
وانا ساكنة فى شبرا
عايزة حد يشجن التكييف ويعملى سنتر ويشوف موضوع النور

مشكورة على الرد
وانا ساكنة فى شبرا
عايزة حد يشجن التكييف ويعملى سنتر ويشوف موضوع النور

اولا الف مبروك
ثانيا االعربيه دي ما شاء الله اقتصاديه جدا سواء في استهلاك البنزين او في قطع الغيار فمتقلقيش من اسعار الحاجات اللي بايظه دي بس غيريها واحده واحده
ابدأي اول حاجه بالكوريك لأن ده مهم دا لو لا قدر الله العجله نامت منك
بعد كده شوفي موضوع النور بتاع العربيه وايه مشكلته لو لمض ولا الفوانيس عايزه تتغير و بيتهيالي ان فوانيس الاكسنت الجوز مش هتزيد عن 300 جنيه
بعدين شوفي موضوع التكيف والشحن علشان الحر اللي احنا فيه
موضوع الازاز ده سهل بس تكلفته والله اعلم هتكون تقريبا في حدود 800 جنيه علشان تغيري المكن و وتركبي الزراير وتوصلي كهربته بس نصيحه موضوع الازاز ده مش مهم قوي يعني عادي ولما تشغلي التكيف متهيألي مش هيفرق معاكي الازاز
جسم العربيه من بره سيبيه شويه كده لغايه ما تتمكني من السواقه وبعدين ابقى شدي العربيه بويه وسمكره
يعني الاهم فالمهم

مبروك ع العربية الجديدة بس دي لو كانت علي 38 كان يبقي خير وبركة عامة اللي ادفع ادفع خلاص في واحد بتاع تكيف اسمه محمد جابر مكانه اخر شارع الترعه قبل ما تدخلي خلوصي تخشي يمين من جنب مدرسه رمسيس و بعد كده يمين تاني في اول شمال ولو تهتي اسائلي اي حد هناك عليه اما الكهربائي عشان النور ولو في قرشين يركب مكن للازاز سواء 2 قدام بس او ال 4 كلهم ويشوف لحضرتك السنتر في كهربائي يبقي محمد صبحي

عند حلواني الشرق في شارع شبرا

ادخلي الشارع اللي علي نصيتة حلواني الشرق

في اول يمين

تاني محل عايزة ميكانيكي كمان فيه ميكانيكى اسمه عماد فى المتنزه متفرع من شارع الورشه - شبرا

لما تدخلي الورشه هتدخلي اول شارع شمال فى تالت يمين هتلاقيه على شمال كده بيتميز بالامانه الشديده بجد (منقول من موضوع هنا ف المنتدي) اتمني اكون افدت حضرتك

المشاركة الأصلية كتبت بواسطة enazaky

مساء الخيييير
طبعا بسبب نصايحكم الغالية
الحمد لله اشتريت اكسنت 2006
1300 سى سى
بس اكتشفت فيها شوية حاجات (42 الف بعد الفصال )
عاملة 199 الف كم
اولا التكييف مش شغال عايز يتشحن
ثانيا : باب السواق والكبوت (الصاج ) متغيرين
الزجاج مش كهرباء
وكمان مفهاش سنتر
والفوانيس عايزة تتغير مش بتولع
ومفهاش كوريك ولا طافية
والزجاج الامامى واخد ناقرتين
وعايزة اعرف هى سعة تنك البنزين اد اية؟
وسعرها وحش ولا اية.. اشتريتها من كونتكت كارز
اصلى وانا بتعلم عليها بكتشف فيها حاجات كتيير
كان معايا حد بس الظاهر اهم حاجة عندة كانت الوداخل وعظم العربية
فياريت حد يقولى كام نصيحة
واسعار كل حاجة من دول هتتكلف كام واية الاهم انة يتعمل
لان مفيش فلوس خالص
وخصوصا انى عايزة ابدا واعمل انذار ومش عارفة فين وبكام
واشحن التكييف؟
واية اللى اخد بالى منة وانا بتعامل معها
وشكرا

السلام عليكم
انا اللي كنت ببيع العربيه الاكسنت ال 99 اللي حضرتك استغلتها أوي وبعتها علي 37
وحالتها كانت احسن كتير من اللي معاك دلوقتي

اولا ربنا يباركلك فيها مش هتندم ان شاء الله
الاكسنت فضلت معايا 5 سنين والحمد لله عمرها ما عملتها معايا
ال 1300 موفره جدا جدا ... من البوابات للبوابات ب 17 جنيه بنزين
199 الف كيلو ده كويس بس لما تيجي تبيعي الناس هتتنطط علي الموضوع ده فنصبحه خلي عينك علي العربيه دايما ومتسكتش علي حاجه فيها
بعد خبره 5 سنين .. الاهتمام الدوري بالعربيه هو أهم حاجه
موضوع التكييف ده روح لحد كويس وأتأكد ان المشكله مش في التلاجه وخليه يكشف عليه كويس
وكان المفروض متشتريش عربيه من غير ما يكون التكييف شغال لان التكييف مش فريون وبس ده موضوع كبير
هو التكييف بيطلع هوا طيب ولا فاصل خالص ؟

موضوع باب السواق والكبوت دي غلطه من اللي شاف العربيه .. بس الحمد لله .. اتأكد ان الباب بيقفل كويس وان توصيلات الكهربا متوصله فيه مظبوط .. والكبوت شوف العضم بتاعوا ملزوق بسيليكون ولا لا .. لو لا نصيحه اعملوا عند حد بيفهم .. وشوف وانت بتدور العربيه الكبوت بيتهز او بيترج ولا لا

الزجاج مش كهربا دي مش مشكله كبيره .. بس السنتر مهم جدا وهينجز بس روج لكهربائي نضيف اوي .. وبعد ما يركب السنتر اتاكد من باقي كهربا العربيه .. هو في حدود 400 جنيه .. ومتسترخص في السنتر .. ولو هتجيب متجبش الينتر اللي بيركب في المفتاح لانه بيتكسر بعد فتره .. خلي المفتاح لوحده والسنتر لوحده ودي نصيحه معرفتهاش غير بعد ما المفتاح اتكسر مني ورحت عملت واحد تاني


الفوانيس ممكن تكون كهربا .. الاكسنت لو مظبطش الفيوزات زي ما مكتوب عليها هتخرف ... انا كنت بغيرهم بنفسي ..
بس ممكن تكون كتاوت .. ودي برضه رخيصه .. يمكن أحلي حاجه في العربيه ان قطع غيارها رخيصه .. بس في المقابل مش معمره خالص

الكوريك مهم جدا جدا ... وكنش المفروض تاخد العربيه من غير كوريك
هات الكوريك التمساح مش اي حاجه تانيه

الزجاج الامامي والنقر اللي فيه ... حط ايدك علي النقر لو باينه وحاسس بيها روح بسرعه احقن الزجاج .. لو مش حاسس بيها من الناحيتين تبقي من جوه .. لو ده الزجاج الاصلي متخفش مش هيحصل حاجه .. كان عندي نقره كده واعدت بيها 3 سنين وبعت العربيه بيها عادي

تنك البنزين 40 لتر وعمري ما عرفت املاه للاخر .. دايما 25 لتر .. وتقريبا دي كانت مشكله عوامه .. بس مكنش بيفرق معايا الموضوع ده ... في واحد قالي اكشف علي العوامه وواحد قالي ده رمل في التانك .. بس انا دايما كنت بفول ب 56 جنيه .. ودول بيمشوني اسبوع فمش بحس بمشكله

سعرها عالي شويه .. بس الحمد لله .. الاكسنت مش بتفرق من 99 ل 2006 كلهم نفس الشكل .. ونفس كل حاجه الفكره في الانجيكشن ولا كربرتير



كل اللي فات ده حاجه واللي جاي حاجه تانيه خالص
هقولك كل حاجه تعملها بعد خيره 5 سنين
وكل الحاجات اللي لازم تخلي بالك منها
الاكسنت عربيه هايله .. قطع غيار وبنزين موفر .. متجيبش فوق ال 120 لاي سبب مهما كان .. العربيه خفيفه .. جرايه جدا بس خفيفه .. لو عدت من جنبك عربيه سريعه شويه هتحس بالدريكسيون بيلف لوحده .. عشان كده لازم لازم تظبط زوايا وترصص وتتاكد من الكاوتش

سحب العربيه مع التكييف وحش .. ودي حقيقه بس ليها حل
في قطعه بتتركب جنب التكييف بتعلي الموتور كانك دايس بنزين دي لازم تتاكد انها شغاله وكويسه

التابلوه هتلاقي فيه شروخ ... لو ملقتش الحق وهات حاجه تغطي التبلوه كله ومتسبوش في الشمس وكل يومين استخدم ملمع للتبلوه .. او فازلين .. التبلوه مهم وبيتشقق بسرعه وفي كل موديلات الاكسنت ومتاحولش تغيره او تعالجه

مياه خضرا وبس .. غير كده لا ... زيت موبيل ال 5000 او الاعلي .. وبيتغير كل 4000 .. روح بنزينه ونضف الردياتير بمنضف ب 10 جنيه بيقعدوا في الدوره 10 دقايق

طبعا لازم تغير سير الكاتينه والفلاتر وسير الدينامو وسير التكييف ده اساسي وبعد كده في مواعيدهم

تيل الفرامل الامامي والخلفي وشوف الطنابير ... دول مهمين اوي لانهم مش معمرين في الاكسنت

في شريطيين اسود في سقف العربيه من بره .. اتاكد انهم ملزوقين كويس لانهم بيلموا ماه وممكن يعملوا برومه

اخر حته في الزجاج اللي ورا لما العربيه بتتبل او بتتغسل او الدنيا بتمطر بيلموا مياه وبتعمل بروما

فرش جلد للارضيه مهم

زيت الدبرياج والفرامل والفتيس

اسحبهم كلهم وغيرهم وحط جديد .. واشتري العلب بتاعه الزيت بنفسك متزودش من عند الراجل .. لا انت بنفسك
انا كنت بجيب الزيوت دي من موبيل .. حتي الباكم بتاع الفرامل من موبيل

عيب الاكسنت ... التبلوه .. الفوانيس اللي ادام بتتكسر من اماكن تثبيتها في الشاسيه .. جوان غطا التكيهات بيجيب زيت .. اشتري واحد اصلي ب 20 جنيه وانبوبه سيليكون حراري ب 10 والميكانيكي متخلوش يربط جامد .. يدوبك يقفل المسامير وخلاص

البوجيهات شمعه واحده كفايه .. وهات الانجليزي او الياباني اللي في العلبه الصفرا مش الحمرا


ده اللي فكره دلوقتي
ولو احتجت حاجه كلمني انا تحت امرك ... وربنا يباركلك فيها ... اهم حاجه حافظ علي العربيه ودايما ايدك فيها .. وغير الحاجات دي في الاول ضروري ..